លោកនាយករដ្ឋមន្ត្រី ហ៊ុន សែន បានថ្លែងនៅក្នុងសារជូនជនរួមជាតិនៅថ្ងៃទី២៧ តុលាថា ការដែលប្រទេសកម្ពុជា បានចូលជាសមាជិកគណៈកម្មាធិការបេតិកភណ្ឌពិភពលោកនេះ ជាមោទនភាពថ្មីមួយទៀតរបស់ប្រទេសកម្ពុជា និងធ្វើឲ្យកេរ្តិ៍ឈ្មោះ និងកិត្យានុភាពរបស់ប្រទេសកម្ពុជា កាន់តែលេចធ្លោខ្ពស់ត្រដែតលើឆាកអន្តរជាតិ។
លោកនាយករដ្ឋមន្ត្រី ហ៊ុន សែន បានមានប្រសាសន៍ទាក់ទងជាមួយកម្ពុជា បានចូលជាសមាជិកគណៈកម្មាធិការបេតិកភណ្ឌពិភពលោក នាមហាសន្និបាតលើកទី១៧ ថា ៖ «អ៊ីចឹងទេ យើងនឹងខិតខំបំពេញកាតព្វកិច្ចក្នុងឋានៈជាសមាជិកអង្គការមួយនេះ ហើយខិតខំធ្វើឲ្យបានល្អ មិនមែនចូលហើយដើរពើងទ្រូងនោះទេ មិនមែនទេ។ អាហ្នឹងត្រូវគោរពធ្វើតាមក្រឹត្យក្រម លក្ខន្តិកៈរបស់គេ ព្រោះថ្ងៃក្រោយយើងត្រូវឈានជើងចូលទៅ ដូចជាសមាជិកក្រុមប្រឹក្សាសន្តិសុខអង្គការសហប្រជាជាតិ យើងឈានទៅដល់នេះ ដល់នោះ។ យើងបានឃើញហើយ ប្រទេសរបស់យើងធ្លាប់ធ្វើ ហើយឆ្នាំ២០១២ ត្រូវធ្វើប្រធានអាស៊ានទៀត»។
ប្រទេសកម្ពុជា បានចូលជាសមាជិកនៃអង្គការយូណេស្កូ (UNESCO) នៅឆ្នាំ១៩៥១ ហើយទើបតែបានចូលជាសមាជិកគណៈកម្មាធិការបេតិកភណ្ឌពិភពលោកនៅឆ្នាំ២០០៩៕