មន្ត្រីមន្ទីរឧស្សាហកម្ម រ៉ែនិងថាមពលខេត្តកំពត ឲ្យដឹងថា ភ្លៀងកក់ខែប៉ុន្មានថ្ងៃជាប់ៗគ្នានៅដើមសប្តាហ៍ក្នុងបំណាច់ខែកុម្ភៈនេះ បានបំផ្លាញការផលិតអំបិលកំពុងផលិតក្នុងស្រែអស់រាប់ម៉ឺនតោន និងបានធ្វើឲ្យខាត់បង់ថវិកាអស់រាប់សិបម៉ឺនដុល្លារអាមេរិក។
មន្ត្រីឧស្សាហកម្ម រ៉ែនិងថាមពល ដែលស្នើមិនឲ្យវិទ្យុអាស៊ីសេរីបញ្ចេញឈ្មោះនិងសំឡេង មានប្រសាសន៍បញ្ជាក់ថា ភ្លៀងកក់ខែបានធ្វើឲ្យប៉ះពាល់ដល់ការផលិតអំបិលយ៉ាងតិច១សប្តាហ៍ ទើបអាចប្រមូលផលបានជាថ្មី ប៉ុន្តែប្រសិនបើភ្លៀងនៅបន្តធ្លាក់បន្តទៀតនោះ ការផលិតអំបិលនឹងមិនអាចផលិតបានឡើយ។
លោក លី សេង ប្រធានសមាគមផលិតអំបិលកម្ពុជា មានប្រសាសន៍ឲ្យវិទ្យុអាស៊ីសេរីដឹងថា ប្រសិនបើភ្លៀងកក់ខែនៅបន្តធ្លាក់ចាប់ពីខែមីនា ដល់ខែមេសាទៀតនោះ មានន័យថា ការផលិតអំបិលក្នុងឆ្នាំ២០១០នេះ អាចនឹងមិនគ្រប់តាមផែនការទីផ្សារប្រើប្រាស់ក្នុងស្រុក១០ម៉ឺនតោនក្នុងមួយឆ្នាំនោះទេ។ លោកឲ្យដឹងថា នៅដើមសប្តាហ៍កន្លងមកនេះ ភ្លៀងកក់ខែបានបំផ្លាញអំបិលកំពុងផលិតក្នុងស្រែអស់ជាងមួយម៉ឺនតោន។
លោក លី សេង បានឲ្យដឹងដូច្នេះ ៖ «ប្រសិនបើបួនដប់ថ្ងៃមានភ្លៀងបន្តធ្លាក់មកទៀត ប្រហែលជានៅតែខ្វះ ព្រោះនៅកំពតភ្លៀងកក់ខែ ភ្លៀងប្រហែលជា៤ថ្ងៃជាប់»។
ទោះយ៉ាងនេះក្តី ការផលិតអំបិលនៅឆ្នាំ២០១០ ត្រូវបានលោក លី សេង បញ្ជាក់ឲ្យដឹងថា កម្ពុជា ផលិតបានអំបិលយកទៅស្តុកទុកក្នុងឃ្លាំងបានជាង៦ម៉ឺនតោននៃផែនការផលិតអំបិលដប់ម៉ឺនតោនក្នុងមួយឆ្នាំ។ លោកឲ្យដឹងថា រដូវនៃការផលិតអំបិលអាចបញ្ចប់នៅចុងខែមេសា គឺសល់ពីរខែទៀតទើបចប់ ប៉ុន្តែបើភ្លៀងបន្តបំផ្លាញដល់ការផលិតអំបិលទៀតនោះ គឺការផលិតមិនអាចគ្រប់តាមតម្រូវការប្រើប្រាស់ទីផ្សារក្នុងស្រុកឡើយ។
លោក លី សេង បញ្ជាក់ដូច្នេះ ៖ «វាអស់ប្រហែល១ម៉ឺនទៅ១ម៉ឺន៥ពាន់តោន។ បើសិនជារាំងពីពេលនេះទៅ អាកាសធាតុល្អ យើងរំពឹងថានឹងគ្រប់»។
សមាគមផលិតអំបិលបានឲ្យដឹងថា ការផលិតអំបិលកាលពីឆ្នាំ២០០៩កន្លងទៅ កម្ពុជាផលិតអំបិលមិនបានគ្រប់តាមផែនការទីផ្សារប្រើប្រាស់ក្នុងស្រុក១០ម៉ឺនតោន ដោយសារមានភ្លៀងធ្លាក់ច្រើនរំខានដល់ការផលិតអំបិល។ លោក លី សេង ឲ្យដឹងថា កង្វះខាតអំបិលកាលពីឆ្នាំ២០០៩ តម្រូវឲ្យប្រទេសកម្ពុជានាំអំបិលចូលពីប្រទេសចិនជិតបីម៉ឺនតោន ដើម្បីបង្គ្រប់តម្រូវការប្រើប្រាស់ទីផ្សារក្នុងប្រទេស។ លោកឲ្យដឹងផងដែរថា បច្ចុប្បន្ននេះអំបិល១តោនមានតម្លៃ៥០ដុល្លារអាមេរិក។
មន្ត្រីមន្ទីរឧស្សាហកម្ម រ៉ែនិងថាមពលខេត្តកំពត បានឲ្យដឹងថា ផ្ទៃដីទុកសម្រាប់ផលិតអំបិលនៅខេត្តកំពត មានចំនួនជាង៣.៣០០ហិកតា ការពារដោយច្បាប់៕