នៅក្នុងលិខិតផ្ញើជូនសមភាគីថៃ លោក កាស៊ីត ភីរុមយ៉ា (Kasit Piromya) នៅថ្ងៃទី១២ ខែតុលា ឆ្នាំ២០០៩ លោក ហោ ណាំហុង រដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានស្នើឲ្យដាក់បញ្ហាទំនាស់រវាងប្រទេសកម្ពុជានិងថៃនៅតំបន់ប្រាសាទព្រះវិហារ ចូលទៅក្នុងរបៀបវារៈនៃកិច្ចប្រជុំកំពូលអាស៊ានដែលថៃនឹងធ្វើជាម្ចាស់ផ្ទះ។
យោងតាមលិខិតការទូតនេះ សេចក្តីស្នើរបស់លោក ហោ ណាំហុង គឺធ្វើឡើងបន្ទាប់ពី លោក កាស៊ីត ភីរុមយ៉ា រដ្ឋមន្រ្តីក្រសួងការបរទេសថៃ ដែលស្រង់ប្រសាសន៍ដោយកាសែត បាងកកប៉ុស្តិ៍ ថា លោកនឹងស្នើសុំការឯកភាពពីកិច្ចប្រជុំកំពូលអាស៊ានឲ្យមានការបង្កើតអង្គការអព្យាក្រឹតមួយដែលអាចផ្តល់ផ្លូវសម្រាប់ប្រទេសថៃនិងកម្ពុជាដោះស្រាយទំនាស់។
សន្និសីទកំពូលរបស់មេដឹកនាំអាស៊ានទាំង១០ប្រទេស ដែលរួមមានកម្ពុជា លាវ វៀតណាម ថៃ ភូមា ម៉ាឡេស៊ី ឥណ្ឌូណេស៊ី ប៊្រុយណេ ហ៊្វីលីពីន និងសិង្ហបុរី នឹងមានការចូលរួមផងដែរពីសំណាក់ដៃគូពិភាក្សាទាំង៦ គឺប្រទេសចិន ជប៉ុន កូរ៉េខាងត្បូង ឥណ្ឌា អូស្ត្រាលី និងនូវែលហ្សេឡង់ដ៍៕