សេចក្ដីស្នើនេះ បានធ្វើឡើងនៅគ្រាដែលកម្ពុជា បានធ្វើជាម្ចាស់ផ្ទះនៅក្នុងកិច្ចប្រជុំស្ដីអំពីការអភិវឌ្ឍសេដ្ឋកិច្ចតំបន់ត្រីកោណនៃប្រទេសកម្ពុជា វៀតណាម លាវ លើកទី៦ ហៅកាត់ថា ស៊ី.អិល.វី. (CLV) ដើម្បីត្រួតពិនិត្យឡើងវិញនូវផែនការប្លង់មេ ឆ្នាំ២០១០ និងឆ្នាំ២០១១ ដែលទើបនឹងបានកែប្រែដើម្បីបង្កើនកិច្ចសហប្រតិបត្តិការនៃប្រទេសទាំងបី។
កិច្ចប្រជុំកំពូល CLV បានធ្វើឡើងដំបូងនៅឆ្នាំ២០០៤ នៅប្រទេសលាវ សំដៅពង្រឹងកិច្ចសហប្រតិបត្តិការអភិវឌ្ឍសេដ្ឋកិច្ចនៃខេត្តនៅតាមព្រំដែននៃប្រទេសទាំងបី មានដូចជាខេត្តមណ្ឌលគិរី រតនគិរី ស្ទឹងត្រែង ក្រចេះ ខេត្តអាតាពើ សារ៉ាវ៉ាន់ សេកុង ចំប៉ាសាក់ ប្រទេសលាវ និងខេត្តដាក់ឡាក់ ដាក់ណុង យ៉ាឡាយ ប៊ិញផឿក និងកនទុម នៃប្រទេសវៀតណាម។
ផែនការនៃការអភិវឌ្ឍន៍នៅតំបន់ត្រីកោណនេះ រួមមានការអភិវឌ្ឍហេដ្ឋារចនាសម្ព័ន្ធ ការអភិវឌ្ឍកសិកម្ម ឧស្សាហកម្ម ទេសចរណ៍ និងពាណិជ្ជកម្ម សម្របសម្រួលលំហូរទំនិញឆ្លងកាត់ព្រំដែន និងលុបចោលនូវបញ្ហារាំងស្ទះនានា ដោយមានការរួមបញ្ចូលគ្នានៃបញ្ហាគយ និងបែបបទនៃការនាំចូល។
ប្រទេសជប៉ុន ធ្លាប់បានផ្ដល់ទឹកប្រាក់ចំនួន ២០លានដុល្លារ សម្រាប់គាំទ្រដល់ការអភិវឌ្ឍនៃតំបន់ត្រីកោណនេះរួចមកហើយ៕