ភាគីកម្ពុជា បានបញ្ជាក់ទៅលោក កាស៊ីត ភិរម្យ ថា ការចាប់ខ្លួនជនជាតិថៃចំនួន ៧នាក់កន្លងមកនេះ ជាការអនុវត្តតាមច្បាប់អន្តោប្រវេសន៍កម្ពុជា។
លោក ហោ ណាំហុង និងលោក កាស៊ីត ភិរម្យ បានជួបចរចាទ្វេភាគីនៅក្នុងប្រទេសឥណ្ឌូណេស៊ី នៅពេលដែលបានទៅចូលរួមក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ាន កាលពីថ្ងៃទី១៧ ខែមករា ដល់ថ្ងៃទី១៨ ខែមករា កន្លងទៅថ្មីៗនេះ។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រីបានមានប្រសាសន៍ប្រាប់អ្នកកាសែតនៅឯក្រសួងការបរទេស នៅថ្ងៃទី១៩ ខែមករាថា ការចាប់ខ្លួនជនជាតិថៃចំនួន ៧នាក់កន្លងមក គឺនីតិវិធីរបស់តុលាការកម្ពុជា។
លោក ហោ ណាំហុង ថ្លែងបញ្ជាក់ដូច្នេះ ៖ «ខ្ញុំក៏បានជម្រាបលោក (កាស៊ីត ភិរម្យ) ទ្បើងវិញ ក៏ដូចជាសេចក្ដីថ្លែងការណ៍របស់ក្រសួងការបរទេសកន្លងមក។ យើងធ្វើនេះ គឺតាមនីតិវិធីច្បាប់តុលាការ ដោយគ្មានគំនិតចង់ធ្វើអាក្រក់ជាមួយប្រទេសថៃទេ គ្មានការគុំកួនទេ។ នេះជានីតិវិធីរបស់តុលាការទៅតាមច្បាប់អន្តោប្រវេសន៍របស់កម្ពុជាយើង»។
អាជ្ញាធរកម្ពុជា បានចាប់ខ្លួនជនជាតិថៃចំនួន ៧នាក់ កាលពីថៃ្ងទី២៩ ខែធ្នូ ឆ្នាំ២០១០ កន្លងទៅ ក្រោមបទចោទថា បានចូលក្នុងទឹកដីកម្ពុជា ដោយខុសច្បាប់ នៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាប់នឹងខេត្តស្រះកែវ ប្រទេសថៃ ដើម្បីប្រមូលព័ត៌មានសម្ងាត់។
រហូតមកដល់ថ្ងៃទី១៨ ខែមករា ថ្មីៗនេះ តុលាការកម្ពុជា រាប់ទាំងតុលាការសាលាដំបូងរាជធានីភ្នំពេញ និងសភាស៊ើបសួរនៃតុលាការសាលាឧទ្ធរណ៍ បានសម្រេចដោះលែងជនជាតិថៃ ចំនួន ៦នាក់ហើយ ឲ្យនៅក្រៅឃុំបណ្ដោះអាសន្ន នៅក្នុងចំណោម ៧នាក់ ប៉ុន្តែស្ថិតក្រោមការឃ្លាំមើលរបស់តុលាការកម្ពុជា គឺឲ្យស្ថិតនៅក្នុងស្ថានទូតថៃ នៅកម្ពុជា មិនឲ្យរត់គេចខ្លួនទេ។
ជនជាតិថៃម្នាក់ដែលសភាស៊ើបសួរនៃតុលាការសាលាឧទ្ធរណ៍បានសម្រេចកាលពីថៃ្ងទី១៨ ខែមករា បន្តឃុំខ្លួននៅក្នុងគុកព្រៃសនោះ មានឈ្មោះ វីរៈ ស៊ុំក្វាមឃីត (Veera Somkwamkid) ភេទប្រុស ដែលមានតួនាទីជាអគ្គលេខាធិការបណ្ដាញប្រជាជនប្រឆាំងអំពើពុករលួយ និងជាមេដឹកនាំក្រុមអាវលឿងរបស់ថៃ។ ជនជាប់ចោទរូបនេះ ត្រូវបានតុលាការសាលាដំបូងរាជធានីភ្នំពេញ បានចោទប្រកាន់ក្រោមបទចារកម្ម និងចូលក្នុងទឹកដីកម្ពុជា ខុសច្បាប់ ដើម្បីប្រមូលព័ត៌មានសម្ងាត់។
មេធាវីរបស់ជនជាប់ចោទថៃរូបនេះ គឺលោក ប៉ិច វិច្ឆិកា បានមានប្រសាសន៍ថា លោកមិនទាន់បានទទួលដីកាពីតុលាការក្រុងភ្នំពេញ អំពីថ្ងៃបើកសវនាការនៅឡើយទេ៕