ម្ដាយពលការិនីនៅពោធិ៍សាត់អំពាវនាវឲ្យជួយកូនស្រីនៅម៉ាឡេស៊ី

ម្ដាយពលការិនីមួយរូបនៅខេត្តពោធិ៍សាត់ បានអំពាវនាវសុំឲ្យអង្គការសិទ្ធិមនុស្សជួយយកកូនស្រីគាត់មកពីប្រទេសម៉ាឡេស៊ី វិញ ពីព្រោះនាងបានចប់កុងត្រាការងារនៅក្នុងប្រទេសនោះហើយ។

ដោយ មណ្ឌល កែវ
2012-10-07

pb.mp3

អ្នកស្រី អែម សុខុម អាយុ ៦០ឆ្នាំ ម្ដាយរបស់ពលការិនី ឆឺយ សុភ័ណ្ឌ ផ្ដល់បទសម្ភាសន៍ដល់វិទ្យុអាស៊ីសេរី កាលពីថ្ងៃទី៤ តុលា ឆ្នាំ២០១២។

RFA/Mondulkeo

ស្ត្រីអ្នកភូមិឈ្មោះ អែម សុខុម អាយុ ៦០ឆ្នាំ ជាប្រជាពលរដ្ឋនៅភូមិអូរត្រាវ សង្កាត់រលាប ក្រុងពោធិ៍សាត់ ជាម្ដាយបង្កើតរបស់ពលការិនីនៅប្រទេសម៉ាឡេស៊ី ឈ្មោះ ឆឺយ សុភ័ណ្ឌ។ គាត់បានឲ្យដឹងនៅព្រឹកថ្ងៃទី៧ ខែតុលា ថា កាលពីថ្ងៃទី២៨ កញ្ញា កន្លងទៅ កូនស្រីគាត់បានទូរស័ព្ទមកប្រាប់ថា ថៅកែបានវាយធ្វើបាបយ៉ាងខ្លាំង ដោយកូនស្រីគាត់មិនព្រមបន្តកិច្ចសន្យា ១ឆ្នាំទៀត។

គាត់ថា ថៅកែបានរកលេសចោទកូនគាត់ថា បានធ្វើឲ្យខូចម្សៅនំប៉័ងរបស់គេឥឡូវ គេកាត់ប្រាក់ខែដែលធ្វើបានជាង ២ឆ្នាំនោះអស់ហើយ ហើយត្រូវធ្វើការបន្ថែម ៦ខែទៀត ទើបរួចថ្លៃការខូចខាត៖ «ថៅកែព្យាយាមបណ្ដេញកូនខ្ញុំចេញពីផ្ទះគេ បន្ទាប់ពីវាមិនព្រមចុះកិច្ចសន្យាបន្ត។ បន្ទាប់ពីកូនខ្ញុំទូរស័ព្ទលើកក្រោយនេះ ថៅកែវាបិទមិនឲ្យកូនខ្ញុំទូរស័ព្ទមកទៀត។ ចាប់ពីពេលហ្នឹងមក គេធ្វើបាបរហូត ហើយព្យាយាមបណ្ដេញកូនខ្ញុំចេញពីផ្ទះគេ ដើម្បីរួចពីការបង់លុយឈ្នួលឲ្យកូនខ្ញុំ។ ខ្ញុំឥឡូវបារម្ភពីកូនស្ទើរឆ្កួតទៅហើយ...»។

តាមឯកសារបញ្ជាក់ថា ពលការិនីឈ្មោះ ឆឺយ សុភ័ណ្ឌ បានចេញទៅធ្វើការនៅប្រទេសម៉ាឡេស៊ី នៅថ្ងៃទី១០ ខែកក្កដា ឆ្នាំ២០១០ តាមរយៈក្រុមហ៊ុនហ្វ៊ីលីម័រ (PHILIMORE Cambodia)។ រយៈពេលជាង ២ឆ្នាំនេះ ពលការិនីឈ្មោះ ឆឺយ សុភ័ណ្ឌ ធ្លាប់បានទូរស័ព្ទមកគ្រួសារតែម្ដងគត់ កាលពីឆ្នាំ២០១១ និងលើកចុងក្រោយនេះគឺកាលពីថ្ងៃ២៨ កញ្ញា ឆ្នាំ២០១២ ដែលនាងបានប្រាប់ពីការធ្វើបាបពីសំណាក់ថៅកែ ហើយសុំឲ្យម្ដាយនាងរកមធ្យោបាយជួយយកនាងត្រឡប់មកស្រុកខ្មែរវិញ។

ទាក់ទិនចំពោះបញ្ហានេះ ស្នងការរងនគរបាលខេត្តពោធិ៍សាត់ ទទួលបន្ទុកប្រឆាំងការជួញដូរមនុស្ស និងការពារអនីតិជន គឺលោកស្រី ក្ដាន់ សុផល បានជំរុញឲ្យគ្រួសារពលការិនីដែលកំពុងមានបញ្ហាបាត់ដំណឹង ឬទទួលរងការធ្វើបាបពីថៅកែនោះ មកដាក់ពាក្យបណ្ដឹងដើម្បីអ្នកស្រីមានមូលដ្ឋានក្នុងការជួយសង្គ្រោះ។

លោកស្រី ក្ដាន់ សុផល៖ «បងឲ្យគាត់មកដាក់ពាក្យបណ្ដឹងមកខ្ញុំ ដើម្បីស្រួលខ្ញុំស្រាវជ្រាវ។ ខ្ញុំធ្វើបែបបទរួចបញ្ជូនទៅអគ្គស្នងការនគរបាលជាតិ ខាងនាយកដ្ឋានប្រឆាំងការជួញដូរមនុស្ស និងការពារអនីតិជន។ អត់អីទេ ឲ្យតែស្គាល់ក្រុមហ៊ុនយើងអាចជួយគាត់បាន។ ឲ្យគាត់មកជួបខ្ញុំមក...»។

មន្ត្រីផ្នែកអង្កេតអង្គការលីកាដូ ខេត្តពោធិ៍សាត់ កញ្ញា មិត សាមួន មានប្រសាសន៍ថា បន្ទាប់ពីទទួលបានពាក្យបណ្ដឹង អង្គការលីកាដូ បានរៀបចំបែបបទបញ្ជូនទៅការិយាល័យកណ្ដាលរបស់អង្គការនៅភ្នំពេញ ដើម្បីជួយពលការិនីរូបនេះហើយ។

ដូចគ្នានេះដែរ ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា បានជំរុញឲ្យគ្រួសារពលការិនីរូបនេះមកកាន់ទីស្នាក់ការនៃមជ្ឈមណ្ឌលអប់រំច្បាប់សម្រាប់សហគមន៍ បំពេញបែបបទផ្សេងដើម្បីជាមូលដ្ឋានសម្រាប់មជ្ឈមណ្ឌលធ្វើសកម្មភាពជួយសង្គ្រោះ។

លោក មឿន តុលា មានប្រសាសន៍ថា ក្នុងរយៈពេលដែលប្រទេសទាំងពីរពុំទាន់មានកិច្ចព្រមព្រៀងនេះ ពលករខ្មែរដែលកំពុងធ្វើការនៅក្នុងប្រទេសម៉ាឡេស៊ី បានជួបការលំបាកជាច្រើនដែលកើតឡើង ដោយសារការបង្ខិតបង្ខំអោយបន្តកិច្ចសន្យាដោយខុសច្បាប់។ លោកថា ពួកគេប្រឈមនឹងការទទួលទោសតាមច្បាប់អន្តោប្រវេសន៍របស់ប្រទេសនេះ ប្រសិនបើពួកគេយល់ព្រមបន្តកិច្ចសន្យាណាមួយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (2)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

I Know that every company is collecting money of usd10,000 per each to lobby to open to send Khmer Housemaids to work in Malaysia again. Why can we let Malaysia to take advantages from ours? Without new MOU with Malaysia, our government should not send anymore.

Oct 08, 2012 03:42 AM

អ្នកអានអនាមិក

I used to work with this company Philimore around one year. The real boss of this company is from Malaysia, he is very rich and closed with Ministry of Labour of Cambodia. I may suggest Cambodia Government not to send Cambodian people to work in Malaysia anymore. Every suffering from Cambodian ladies are more than enough bitter experiences who are working in Malaysia

Oct 08, 2012 03:04 AM