ការចេញសេចក្ដីប្រកាសព័ត៌មាននោះ គឺបានធ្វើឡើងនៅបន្ទាប់ពីមានបេសកកម្មរបស់បុគ្គលិក IMF ដែលដឹកនាំដោយលោក Luis Valdivieso នៅក្នុងប្រទេសកម្ពុជា រវាងពីថ្ងៃទី២៨ ខែមីនា រហូតដល់ថ្ងៃទី៥ ខែមិថុនា ឆ្នាំ២០០៨ កន្លងទៅនេះ ។
នៅក្នុងបេសកកម្មនោះ បុគ្គលិក IMF បានជួបជាមួយនឹងមន្ត្រីជាន់ខ្ពស់របស់រដ្ឋាភិបាលនិងបានពិភាក្សាអំពីការអភិវឌ្ឍនិងគោលនយោបាយម៉ាក្រូសេដ្ឋកិច្ច ផងដែរ ។
មន្ត្រី IMF ក៏បានជួបពិភាក្សាជាមួយតំណាងមកពីសហគមន៍ជំនួញនិងដៃគូអភិវឌ្ឍន៍ផងដែរ ។
IMF បានឲ្យដឹងថា ការធ្លាក់ចុះនៃកំណើនសេដ្ឋកិច្ចនេះ បណ្ដាលមកពីការធ្លាក់ចុះនៃការនាំចេញសម្លៀកបំពាក់ដោយសារតែតម្រូវការក្រៅស្រុកមានការថមថយនិងបណ្ដាលមកពីការប្រកួតប្រជែងក្នុងតំបន់កាន់តែមានភាពតានតឹងឡើង ។
IMF បានឲ្យដឹងទៀតថា វិស័យទេសចរណ៍នៅប្រទេសកម្ពុជា កាន់តែមានភាពប្រសើរឡើង ហើយថា ប្រទេសកម្ពុជាដែលជាប្រទេសនាំស្រូវចេញនោះ បន្តទទួលផលពីស្រូវឡើងថ្លៃ បើទោះបីជាការកើនឡើងនៃតម្លៃម្ហូបអាហារបានប៉ះពាល់ដល់ប្រជាពលរដ្ឋកម្ពុជា ដែលងាយនឹងរងគ្រោះ ជាពិសេស អ្នកក្រីក្ររស់នៅទីក្រុង និងអ្នកដែលគ្មានដីធ្លី ។
នៅក្នុងសេចក្ដីប្រកាសព័ត៌មាននោះ ក៏បានបញ្ជាក់ពីការកើនឡើងនៃអតិផរណាក្នុងប្រទេសកម្ពុជា ក្នុងឆ្នាំ២០០៨នេះ ផងដែរ ៕