កម្ពុជាបន្តផ្អាកនាំពលករខ្មែរទៅម៉ាឡេស៊ី
h090712in.mp3
មន្ត្រីជំនាញរបស់រដ្ឋាភិបាលកម្ពុជា អះអាងថា ការផ្អាកនេះនឹងអាចបញ្ចប់បាននៅពេលណាដែលមានការព្រមព្រៀងគោរពសិទ្ធិពលករក្នុងប្រទេសនេះ។
អគ្គនាយកការងារ លោក សេង សក្កដា មានប្រសាសន៍ថា ប្រទេសកម្ពុជា កំពុងពិភាក្សារកការព្រមព្រៀងចំពោះការបញ្ជូនពលករខ្មែរទៅកាន់ប្រទេសនេះ ប្រកបដោយសុវត្ថិភាព។ លោកបន្តថា ការផ្អាកជាបណ្ដោះអាសន្ននោះ នឹងបញ្ចប់ល្គឹកណាតែបានរកឃើញដំណោះស្រាយដ៏ល្អមួយ។
កាលពីខែតុលា ឆ្នាំ២០១១ កន្លងមក រដ្ឋាភិបាលកម្ពុជាបានប្រកាសផ្អាកបណ្ដោះអាសន្នការបញ្ជូនពលករបម្រើតាមផ្ទះ ទៅប្រទេសម៉ាឡេស៊ី គឺនៅចំពេលដែលមានរឿងអាស្រូវជាច្រើន អំពីការរំលោភបំពាន ដែលបានកើតឡើងនៅក្រុមហ៊ុនជ្រើសរើសពលករនៅបរទេស និងនៅមណ្ឌលបណ្ដុះបណ្ដាលពលករនៅកម្ពុជា។
បើទោះជាមានការអះអាងជាញឹកញយពីការរំលោភបំពានសិទ្ធិសេរីភាពពលករខ្មែរ ដែលភាគច្រើនជាស្ត្រីក៏ដោយ ក៏អគ្គនាយកការងារនៃក្រសួងការងារ និងបណ្ដុះបណ្ដាលវិជ្ជាជីវៈ លោក សេង សក្កដា បញ្ជាក់ថា ករណីមិនសមប្រកបនៃការចាកចេញទៅរកការងារធ្វើនៅក្រៅប្រទេសនោះ គឺមានតិចតួចបំផុត។ ផ្ទុយទៅវិញ ការងារនៅក្រៅប្រទេសបានផ្ដល់ចំណូលយ៉ាងច្រើន ដែលជាផ្នែកមួយនៃការជំរុញកំណើនសេដ្ឋកិច្ចនៅកម្ពុជា។
បើទោះជាយ៉ាងណា កម្ពុជាបានត្រៀមរួចរាល់ហើយនូវសេចក្ដីព្រាងអនុស្សរណៈយោគយល់គ្នាជាមួយប្រទេសម៉ាឡេស៊ី។
រដ្ឋលេខាធិការនៃក្រសួងកិច្ចការនារី អ្នកស្រី សាន អារុណ មានប្រសាសន៍ថា ភាគីទាំងពីរ គឺកម្ពុជា និងម៉ាឡេស៊ី បានគ្រោងទុកហើយថា នឹងជួបប្រជុំនៅក្នុងខែតុលា ខាងមុខ។
ក្នុងរយៈពេលដែលប្រទេសទាំងពីរ ពុំទាន់មានកិច្ចព្រមព្រៀងនឹងគ្នានេះ ពលករខ្មែរដែលកំពុងធ្វើការនៅក្នុងប្រទេសម៉ាឡេស៊ី បានជួបការលំបាកជាច្រើន ដែលកើតឡើងដោយសារការបង្ខិតបង្ខំអោយបន្តកិច្ចសន្យាដោយខុសច្បាប់។ ហើយការនេះ បង្ហាញតាមរូបភាពនៃការបាត់ដំណឹងពលករ។
នាយកប្រតិបត្តិអង្គការខារ៉ាម កម្ពុជា (CARAM) លោក យ៉ា ណាវុធ លើកឡើងថា ពួកគេប្រឈមនឹងការទទួលទោសតាមច្បាប់អន្តោប្រវេសន៍របស់ប្រទេសនេះ ប្រសិនបើពួកគេយល់ព្រមបន្តកិច្ចសន្យាណាមួយ។
បើទោះជាយ៉ាងណា លោក យ៉ា ណាវុធ បានទទួលស្គាល់ដែរថា ប្រទេសនីមួយៗមានអធិបតេយ្យភាពដែលពុំអាចអោយប្រទេសណារំលោភបាន ហើយការនេះជំរុញអោយកិច្ចព្រមព្រៀងកម្ពុជា និងម៉ាឡេស៊ី ពិបាកលេចចេញជារូបរាង។
ចំពោះប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការផ្អាកជាបណ្ដោះអាសន្ននៃការនាំពលករ គឺជាចំណុចគន្លឹះដែលកម្ពុជា អាចប្រើប្រាស់ជាសំពាធ ដើម្បីអោយប្រទេសម៉ាឡេស៊ី យល់ព្រមចូលរួមបង្កើតកិច្ចព្រមព្រៀងអោយបានឆាប់រហ័ស។ ម្យ៉ាងទៀត កម្ពុជាដែលជាប្រធានអាស៊ាន ក៏អាចសហការជាមួយសមាជិកដទៃទៀត ជំរុញអោយមានការជជែកពីបញ្ហាដែលកំពុងជួបប្រទះជាមួយប្រទេសម៉ាឡេស៊ី។
របាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈអោយដឹងថា បច្ចុប្បន្ននេះមានពលករខ្មែរប្រមាណ៥ម៉ឺននាក់ កំពុងធ្វើការជាជនចំណាកស្រុកនៅប្រទេសម៉ាឡេស៊ី។ ការបូកសរុបប្រាក់បៀវត្សដែលពួកគេទទួលបាន គឺមានចំនួនប្រមាណ២០៤លានដុល្លារក្នុងមួយឆ្នាំៗ។
បើទោះជាយ៉ាងនេះក្ដី មន្ត្រីអង្គការសង្គមស៊ីវិល បានយល់ឃើញស្រដៀងគ្នាថា ការពង្រីកទីផ្សារការងារក្នុងប្រទេស គឺជាជម្រើសដ៏ល្អបំផុតក្នុងការបង្វែរការធ្វើចំណាកស្រុកអោយងាកមករកការងារដែលមិនប្រឈមខ្លាំងពីការជួញដូរ និងការរំលោភបំពានសិទ្ធិ។
ដោយពិនិត្យឃើញបទពិសោធន៍នៃផលវិបាកនៃការបញ្ជូនពលករទៅប្រទេសម៉ាឡេស៊ី មន្ត្រីអង្គការមិនមែនរដ្ឋាភិបាល អំពាវនាវអោយរដ្ឋាភិបាលយកចិត្តទុកដាក់ត្រៀមរៀបចំទុកជាមុនអោយបានល្អិតល្អន់ នៅមុនការបញ្ជូនពលករខ្មែរទៅក្រៅប្រទេស ជាពិសេសប្រទេសកាតា ដែលកម្ពុជាទើបយល់ព្រមអោយមានកិច្ចព្រមព្រៀងនាំពលករ នៅខណៈដែលកម្ពុជាមិនទាន់មានស្ថានទូតនៅក្នុងប្រទេសនោះនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
