កម្ពុជាកំពុងធ្វើសេចក្ដីព្រាងច្បាប់ស្ដីពីការបង្ការ និងពន្លត់អគ្គិភ័យ
h080112ko.mp3
ច្បាប់អគ្គិភ័យនេះ គឺគេបានតាក់តែងឡើងជាលើកដំបូង ដែលកន្លងមកគេបានប្រើប្រាស់ក្រមព្រហ្មទណ្ឌ ដើម្បីផ្ដន្ទាទោសដល់ជនបង្កអគ្គិភ័យនោះ។
រដ្ឋាភិបាលកម្ពុជាកំពុងធ្វើសេចក្ដីព្រាងច្បាប់ស្ដីពីការបង្ការ និងពន្លត់អគ្គិភ័យ ក្នុងគោលបំណងឲ្យប្រជាពលរដ្ឋបង្កើនការប្រុងប្រយ័ត្ន ហើយនៅក្នុងច្បាប់នេះនឹងមានចែងពីការផ្ដន្ទាទោសដល់សមត្ថកិច្ច និងអ្នកបង្កអគ្គិភ័យឲ្យជាប់ពន្ធនាគារពី ៣ឆ្នាំដល់១៥ឆ្នាំ។
អនុរដ្ឋលេខាធិការក្រសួងមហាផ្ទៃ លោក អ៊ុក គីមលេខ ដែលជាប្រធានក្រុមអ្នកតាក់តែងច្បាប់ ស្ដីពីការបង្ការ និងពន្លត់អគ្គិភ័យ មានប្រសាសន៍នៅថ្ងៃទី១ សីហា ថា ច្បាប់ស្ដីពីការបង្ការ និងពន្លត់អគ្គិភ័យ ត្រូវបានតាក់តែងឡើងដោយក្រសួងមហាផ្ទៃ ហើយបានបញ្ជូនទៅកាន់ទីស្ដីការគណៈរដ្ឋមន្ត្រី ដើម្បីពិនិត្យមើល កាលពីពេលថ្មីៗនេះ។
លោកថា សេចក្ដីព្រាងច្បាប់ស្ដីពីការបង្ការ និងពន្លត់អគ្គិភ័យ ដែលមាន៨ជំពូក និង៣៣មាត្រា ត្រូវបានតាក់តែងឡើងក្នុងគោលបំណងសំខាន់ដើម្បីធានាសុវត្ថិភាព និងសន្តិសុខសាធារណៈ និងទប់ស្កាត់គ្រោះអគ្គិភ័យដែលចេះតែកើតឡើងឥតឈប់ឈរ។
លោក អ៊ុក គីមលេខ៖ «យើងនឹងបង្ខំជារួម គឺថាសេចក្ដីត្រូវការច្បាប់នេះ គឺថាសំខាន់ណាស់។ ដើម្បីធានាសន្តិសុខ សុវត្ថិភាព សណ្ដាប់ធ្នាប់សាធារណៈ ហើយពិសេសការពារអាយុជីវិត ទ្រព្យសម្បត្តិរបស់ប្រជាពលរដ្ឋ។ វាទាក់ទងនឹងការមហន្តរាយប្រជាពលរដ្ឋ។ វាទាក់ទងនឹងភាពក្រីក្ររបស់ប្រទេសជាតិយើង ដែលយើងត្រូវការចាំបាច់ណាស់។ ខ្ញុំលឺព័ត៌មានថា ប្រហែលជាថ្ងៃទី៧ ខែសីហា ខាងមុខនេះ នឹងមានការប្រជុំបឋមរវាងក្រុមអ្នកបច្ចេកទេស មុននឹងដាក់ប្រជុំពេញអង្គគណៈរដ្ឋមន្ត្រី»។
លោក អ៊ុក គីមលេខ បញ្ជាក់ទៀតថា សេចក្ដីព្រាងច្បាប់នេះបានដាក់បញ្ចូលនូវចំណុចខ្លឹមសារសំខាន់ៗដូចជា ការផ្ដន្ទាទោសដល់កម្លាំងសមត្ថកិច្ចណាដែលបំពេញតួនាទីមិនបានល្អ ហើយស្វែងរកលាភសក្ការៈដើម្បីប្រយោជន៍ផ្ទាល់ខ្លួនក្នុងពេលបំពេញបេសកកម្ម ដែលត្រូវផ្ដន្ទាទោសឲ្យជាប់ពន្ធនាគារពី ៦ខែដល់ ២ឆ្នាំ និងជនបង្កអគ្គិភ័យ អាចជាប់ទោសពី ៣ឆ្នាំទៅដល់ ១៥ឆ្នាំ។
ពាក់ព័ន្ធនឹងការរៀបចំសេចក្ដីព្រាងច្បាប់ស្ដីពីការបង្ការ និងពន្លត់អគ្គិភ័យនេះ លោកវរសេនីយ៍ទោ នេត វន្ថា ប្រធានការិយាល័យនគរបាលបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ បានសម្ដែងការគាំទ្រ។ លោកសង្ឃឹមថា នៅពេលដែលច្បាប់នេះចូលជាធរមាន ប្រទេសកម្ពុជា ពិសេសរាជធានីភ្នំពេញ នឹងអាចកាត់បន្ថយនូវគ្រោះអគ្គិភ័យបាន។
លោក នេត វន្ថា៖ «ដោយសារប្រជាពលរដ្ឋ ទី១ គាត់យល់ ទី២ កន្លែងទីតាំងអាជីវកម្មឋានគាត់អនុវត្តតាមបទដ្ឋានណែនាំរបស់ច្បាប់ ទី៣ មន្ត្រីអនុវត្តច្បាប់ គឺមានប្រសិទ្ធភាពក្នុងការប្រតិបត្តិការជាក់លាក់ដូចជា មន្ត្រីអនុវត្តច្បាប់របស់យើងកន្លងមកនេះ គឺមានការធ្វេសប្រហែសអ៊ីចឹង ពេលនេះគឺមានទោសដែរ បើសិនគាត់ធ្វេសប្រហែសមិនចូលរួម ឬមួយមិនប្រឹងពន្លត់ឲ្យបានចប់ជាស្ថាពរ ឬមួយមានទទួលលាភសក្ការៈពីប្រជាពលរដ្ឋ អាហ្នឹងគាត់មានទោសដែរ។ ច្បាប់នេះចេញមក យើងសង្ឃឹមថាល្អសម្រាប់ប្រជាជនកម្ពុជាយើង ពិសេសក្រុងភ្នំពេញដែលមានលំនៅឋានច្រើន»។
គ្រោះអគ្គិភ័យបានកើតឡើងនៅក្នុងរាជធានីភ្នំពេញ ចាប់តាំងពីខែមករា ដល់ខែកក្កដា ឆ្នាំ២០១២ មានចំនួន៤៨ករណី គឺបានបង្កឲ្យឆេះខូចខាតផ្ទះល្វែងចំនួន ៤៧ល្វែង ផ្ទះសង់ដោយថ្មខាងក្រោម ឈើលើជាង ៣០ខ្នង រួមទាំងតូបលក់ដូរជាង២០តូបទៀត។ ករណីនេះបានបង្កឲ្យមានមនុស្សរងរបួស ប៉ុន្តែពុំបណ្ដាលឲ្យស្លាប់នោះទេ។
កាលពីថ្ងៃទី២៣ កក្កដា ករណីគ្រោះអគ្គិភ័យមួយបានកើតឡើងនៅចំណុចផ្សារទួលសង្កែ ក្នុងខណ្ឌឫស្សីកែវ រាជធានីភ្នំពេញ ដែលមន្ត្រីជំនាញបានចាត់ទុកថា ជាករណីមួយមានលក្ខណៈទ្រង់ទ្រាយធំ។
ទាក់ទងទៅនឹងករណីអគ្គិភ័យនេះដែរ សាលារាជធានីភ្នំពេញបានចេញផ្សាយសេចក្ដីប្រកាសព័ត៌មានមួយថា គ្រោះអគ្គិភ័យដែលបានកើតឡើងនៅចំណុចផ្សារទួលសង្កែ សង្កាត់ទួលសង្កែ ខណ្ឌឫស្សីកែវ កាលពីថ្ងៃទី២៣ កក្កដា កន្លងទៅ ត្រូវបានជនអគតិមួយចំនួនចោទប្រកាន់សមត្ថកិច្ចថា មិនបានបំពេញកាតព្វកិច្ចរបស់ខ្លួន ហើយបែរជាទារប្រាក់ដោយមិនបាញ់ទឹកពន្លត់អគ្គិភ័យ និងបានបាញ់ទឹកតែផ្ទះណាឲ្យលុយប៉ុណ្ណោះ។
ករណីនេះបានធ្វើឲ្យសមត្ថកិច្ចបាក់ទឹកចិត្តក្នុងការបំពេញការងារ ហើយថា គួរតែពលរដ្ឋណាដែលស្ថិតក្នុងហេតុការណ៍នោះ បានឃើញសមត្ថកិច្ចណាទារប្រាក់ពីប្រជាពលរដ្ឋ ត្រូវសរសេរជាលាយលក្ខណ៍អក្សរបែបអនាមិក ផ្ដល់ជូនមកសាលារាជធានីភ្នំពេញ នូវឈ្មោះ និងលេខរថយន្តរបស់បុគ្គលខិលខូចទាំងនោះ ដើម្បីចាត់វិធានការ និងដាក់ពិន័យដល់អ្នកដែលធ្វើឲ្យប៉ះពាល់ដល់កិត្តិយសសមត្ថកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
