កម្ពុជាចាញ់ឆ្នោតនៅឯក្រុមប្រឹក្សាសន្តិសុខអង្គការសហប្រជាជាតិ
h101912ts.mp3
ជាមួយគ្នានេះដែរ មន្ត្រីរដ្ឋាភិបាល និងមន្ត្រីគណបក្សប្រឆាំង បានទទួលស្គាល់ថា កម្ពុជា នៅមានបញ្ហាខ្វះចន្លោះមួយចំនួន ដែលត្រូវបំពេញបន្ថែម ឬកែលំអនៅថ្ងៃអនាគត មុននឹងស្នើសុំជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិជាថ្មីទៀតនោះ។
មន្ត្រីជាន់ខ្ពស់រដ្ឋាភិបាលកម្ពុជា នៅថ្ងៃទី១៩ ខែតុលា បានចាត់ទុកថា ការចាញ់ឆ្នោតនៅឯក្រុមប្រឹក្សាសន្តិសុខអង្គការសហប្រជាជាតិនោះ គឺជាមេរៀនសំខាន់មួយ ដើម្បីឲ្យកម្ពុជាកែលំអ និងបង្កើនសមត្ថភាពនៅថ្ងៃអនាគត ហើយរដ្ឋាភិបាលថ្មីនឹងព្យាយាមសម្រាប់អាណត្តិក្រោយៗទៀត ដើម្បីឲ្យកម្ពុជា ក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។
សេចក្តីរាយការណ៍នានា បានឲ្យដឹងថា ប្រទេសកម្ពុជា ប៊ូតង់ (Bhutan) និងប្រទេសហ្វាំងឡង់ (Finland) បានបរាជ័យក្នុងការបោះឆ្នោតសម្ងាត់នោះ ប៉ុន្តែប្រទេសអូស្ត្រាលី (Australia) លុចហ្សំបួរ (Luxembourg) កូរ៉េខាងត្បូង (South Korea) រវ៉ាន់ដា (Rwanda) និងប្រទេសអាហ្សង់ទីន (Argentina) បានឈ្នះឆ្នោតក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិឆ្នាំ២០១៣ ដល់ឆ្នាំ២០១៤។
ការបោះឆ្នោតនោះ គឺធ្វើឡើងចំនួន ២ជុំ កាលពីថ្ងៃទី១៨ ខែតុលា ឆ្នាំ២០១២ កន្លងទៅនេះ។ ប្រទេសដែលបានឈ្នះឆ្នោតនោះ គឺទទួលបានសំឡេងគាំទ្រចំនួន ២ភាគ៣ ពីសមាជិកអង្គការសហប្រជាជាតិ ចំនួន ១៩៣ប្រទេស។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ និងអ្នកនាំពាក្យរដ្ឋាភិបាល បានមានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា កម្ពុជា សូមអរគុណប្រទេសមួយចំនួនដែលបានបោះឆ្នោតគាំទ្រកន្លងមកនេះ។ លោកបន្តថា កម្ពុជា បានឈ្នះនៅក្នុងការបោះឆ្នោតនៅជុំទី១ ប៉ុន្តែបានចាញ់នៅជុំទី២ ដូច្នេះកម្ពុជា មិនបោះបង់ចោលការព្យាយាម ឬអស់សង្ឃឹមទេ៖ «យើងក៏ដឹងដែរថា ប្រកួតជាមួយកូរ៉េខាងត្បូង គឺជាប្រទេសយក្សសាច់ដុំធំ ប្រទេសគេសម្បូរណ៍លុយកាក់ ហើយក៏គេមានមិត្តភ័ក្ដិច្រើននៅក្នុងពិភពលោក។ យើងដឹងហើយថា ការបោះឆ្នោតនីមួយៗហ្នឹង មិនសំខាន់តែលើតួនាទីសកម្មរបស់យើង ឬអត់សកម្មទេ ពីព្រោះកម្ពុជា សកម្មនៅក្នុងការងាររបស់អង្គការសហប្រជាជាតិយ៉ាងច្រើន ប៉ុន្តែនៅក្នុងការបោះឆ្នោត គឺមិនត្រឹមតែសកម្មតែប៉ុណ្ណឹងទេ សំខាន់គឺកម្លាំងសេដ្ឋកិច្ចមួយទៀត។ កម្ពុជា មិនមែនជាប្រទេសកូននាគក្តី ប៉ុន្តែយើងឃើញហើយថា ទាល់តែបោះឆ្នោតពីរដង ទើបកូរ៉េខាងត្បូង គាត់អាចយកឈ្នះលើកម្ពុជាបាន។ ទន្ទឹមនេះដែរ ក៏សូមថ្លែងអបអរសាទរដល់កូរ៉េខាងត្បូង។ ពិតមែនយើងមិនបានឈ្នះក្តី ប៉ុន្តែកូរ៉េខាងត្បូង គឺជានិមិត្តរូបមួយនៃការរីកឡើងនៅទ្វីបអាស៊ីរបស់យើងដែរ»។
ទាក់ទងនឹងការបរាជ័យនេះដែរ អ្នកនាំពាក្យគណបក្ស សម រង្ស៊ី លោក យឹម សុវណ្ណ និងជាតំណាងរាស្ត្រ បានមានប្រសាសន៍អត្ថាធិប្បាយថា នេះជាមេរៀនសំខាន់មួយឲ្យកម្ពុជា កែសម្រួលបញ្ហាដែលនៅខ្វះខាត៖ «នេះបង្ហាញឲ្យឃើញថា យើងនៅមានចំណុចខ្វះខាតជាច្រើន ជាពិសេស គឺការគោរពសិទ្ធិមនុស្ស ការគោរពគោលការណ៍លទ្ធិប្រជាធិបតេយ្យ ការបោះឆ្នោតឲ្យបានត្រឹមត្រូវ សេរី និងយុត្តិធម៌ ការលុបបំបាត់នូវអំពើអយុត្តិធម៌ ការកែទម្រង់ប្រព័ន្ធតុលាការ។ ចំណុចខ្វះខាតទាំងអស់នេះហើយ ដែលធ្វើឲ្យកម្ពុជា មិនទទួលបានការគាំទ្រគ្រប់គ្រាន់ ក្លាយជាសមាជិកមិនអចិន្ត្រៃយ៍នេះ។ យើងត្រូវតែមានការកែទម្រង់ ដើម្បីឲ្យមានការទទួលស្គាល់ពេញទំហឹងពីអង្គការសហប្រជាជាតិ ក៏ដូចជា សហគមន៍អន្តរជាតិដែរ»។
ចំណែកឯអ្នកវិភាគឯករាជ្យ លោកបណ្ឌិត សុខ ទូច បានមានប្រសាសន៍ថា លោកសោកស្ដាយដោយសារមានបញ្ហាខ្វះខាតកន្លងមក៖ «កម្ពុជា ត្រូវតែព្យាយាម ពីព្រោះកម្ពុជា ចំណុចល្អៗច្រើនណាស់ ដូចជាបញ្ហាបេសកកម្មអន្តរជាតិដើម្បីដោះមីននៅបណ្ដាប្រទេសអាហ្វ្រិក និងនៅមជ្ឈិមបូព៌ា ហើយទី២ កម្ពុជា បានបញ្ចប់សង្គ្រាមដោយខ្មែរខ្លួនឯង»។
នៅមុនការបោះឆ្នោតនោះមួយថ្ងៃ អង្គការឃ្លាំមើលបរិស្ថានពិភពលោក (Global Witness) បានចេញសេចក្តីថ្លែងការណ៍ កាលពីថ្ងៃទី១៦ ខែតុលា ថា កម្ពុជា មិនគប្បីក្លាយជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិនោះទេ នៅគ្រាដែលមានការរីករាលដាលនៃការរំលោភសិទ្ធិមនុស្ស ការរឹបអូសយកដីធ្លី និងការកាប់បំផ្លាញព្រៃឈើខុសច្បាប់ជាដើម។
ប្រទេសកម្ពុជា គឺជាសមាជិករបស់អង្គការសហប្រជាជាតិ តាំងពីឆ្នាំ១៩៥៥ ប៉ុន្តែកម្ពុជា មិនទាន់បានក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ដោយសារកម្ពុជា បានជួបប្រទះសង្គ្រាមស៊ីវិលជាងបីទសវត្សកន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Person
កូនKhmer មិនជួយឈឺចាប់ដែលelection ចាញ់គេ តែបែរជាសើចចំអក អោយKhmer ដូចគាទៅវិញ នេះមិនមែនឈាមKhmer េទ។ ឈាមKhmer ពិតមិនថោកដូចនេះទេ
Oct 21, 2012 10:34 AM
អ្នកអានអនាមិក
ពី KandalGood to hear that Cambodia will learn from this round of contesting on the global level. 1) should make Cambodia look too much aligned with any one of super power (the 5 super power on the permanent Security council) 2) stop belittle the Rep. of the UN Security General. Learn to accept other people criticism and look for positive feedback from those comment. Get rid of your advisers who told you to curse the Un reprep. They gave you a wrong advise. 3) work on the short coming on the respect of human rights and democracy. These are only for our own good. Think of what the legacy you will leave behind you after you time.
Oct 20, 2012 03:28 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
