កម្ពុជា-វៀតណាម ឯកភាពគ្នាបង្កើនកិច្ចសហការប្រឆាំងការជួញដូរគ្រឿងញៀន
h081612ts1.mp3
ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានឯកភាពជាមួយឧបនាយករដ្ឋមន្ត្រីវៀតណាម លោក ង្វៀន ស្វីនភុក (Nguyen Xuan Phuc) ជាប្រធានគណៈកម្មាធិការជាតិប្រឆាំងគ្រឿងញៀន ជំងឺអេដស៍ និងពេស្យាចារ នៅវៀតណាម លើបញ្ហាជាច្រើនចំណុច ក្នុងនោះមានការបង្កើនសមត្ថភាពរបស់នគរបាលកម្ពុជា និងការការពារសន្តិសុខ និងសុវត្ថិភាពរបស់អ្នកវិនិយោគិនវៀតណាម នៅប្រទេសកម្ពុជា។
ប្រធាននាយកដ្ឋានទំនាក់ទំនងការបរទេស នៃក្រសួងមហាផ្ទៃ លោកឧត្តមសេនីយ៍ទោ ប៉ោ ភ័ក្រ បានមានប្រសាសន៍ប្រាប់អ្នកកាសែតថា ភាគីទាំងពីរបានឯកភាពបង្កើនកិច្ចសហការជាមួយគ្នា ប្រឆាំងការជួញដូរគ្រឿងញៀនឆ្លងកាត់ព្រំដែន និងរក្សាសន្តិសុខនៅតាមព្រំដែន៖ «មន្ត្រីក្រសួងមហាផ្ទៃ ទៅកាន់វៀតណាម នៅក្នុងអំឡុងខែ១២ នៅចុងឆ្នាំនេះ ដើម្បីពិនិត្យអំពីស្ថានភាព នៃការអនុវត្តផែនការសហប្រតិបត្តិការរវាងក្រសួងមហាផ្ទៃកម្ពុជា ជាមួយក្រសួងនគរបាលវៀតណាម សម្រាប់ផែនការអនុវត្តកិច្ចសហប្រតិបត្តិការឆ្នាំ២០១៣»។
នៅមុនការជួបពិភាក្សានេះ លោកនាយករដ្ឋមន្ត្រី ហ៊ុន សែន ក៏បានជួបជាមួយលោក ង្វៀន ស្វីន ភុក ដែរ នៅឯវិមានសន្តិភាព នៅថ្ងៃទី១៦ ខែសីហា ឆ្នាំ២០១២។
ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន លោក អៀង សុផល្លែត បានមានប្រសាសន៍ប្រាប់អ្នកកាសែតថា ភាគីទាំងវៀតណាម និងកម្ពុជា បានយល់ព្រមថានឹងបង្កើនទំនាក់ទំនងជាមួយគ្នា ឲ្យស៊ីជម្រៅថែមទៀត៖ «ជាពិសេសលើការវិនិយោគពាណិជ្ជកម្ម ទេសចរណ៍ និងវប្បធម៌ជាដើម។ សម្ដេចក៏បានលើកទឹកចិត្ត និងវាយតម្លៃខ្ពស់ចំពោះកិច្ចពិភាក្សា និងការផ្លាស់ប្ដូរព័ត៌មាន»។
លោក ង្វៀន ស្វីន ភុក ជាឧបនាយករដ្ឋមន្ត្រីវៀតណាម និងជាប្រធានគណៈកម្មាធិការជាតិប្រឆាំងគ្រឿងញៀន ជំងឺអេដស៍ និងពេស្យាចារ នៅវៀតណាម នោះ បានមកបំពេញទស្សនកិច្ចនៅកម្ពុជា នៅពេលនេះ និងបានឯកភាពបន្តប្រឆាំងគ្រឿងញៀន គឺនៅគ្រាដែលអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា បានចាប់ខ្លួនស្ត្រីថៃចំនួន៦នាក់ និងរឹបអូសបានគ្រឿងញៀនកូកាអ៊ីន (Cocain) ហេរ៉ូអ៊ីន (Heroin) និងមេតំហ្វេតាម៉ីន (Methamphetamin) សរុបចំនួនជាង៣០គីឡូក្រាម នៅខែសីហា ឆ្នាំ២០១២ នៅច្រកអាកាសយានដ្ឋានអន្តរជាតិភ្នំពេញ នាំចូលមកពីប្រទេសអេក្វាទ័រ (Ecuador)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
