អ្នកវិភាគ៖ អ្នកនយោបាយគួរផ្សះផ្សាគ្នាក្រោយការសោយទិវង្គតព្រះមហាវីរក្សត្រ
h102212zr.mp3
មានមតិខ្លះបានលើកឡើងថា ការចង់ចូលមកគោរពព្រះបរមសពអតីតព្រះមហាក្សត្រនោះ គឺអ្នកដឹកនាំបក្សប្រឆាំង ចង់ចំណេញនយោបាយ។
ចំណែកមតិខ្លះបានលើកឡើងថា ការអនុញ្ញាតឲ្យលោក សម រង្ស៊ី ចូលមកគោរពព្រះបរមសព ជាការសម្ដែងឲ្យឃើញថា អ្នកនយោបាយខ្មែរ ចេះយោគយល់គ្នា ក្រោយពេលព្រះមហាក្សត្រចូលទិវង្គត។ ទាក់ទងទៅនឹងបញ្ហានេះ ក្រុមអ្នកវិភាគបានពន្យល់ថា គណបក្សប្រឆាំង និងរដ្ឋាភិបាល គួរតែរកមធ្យោបាយណាមួយផ្សេងទៀត ដើម្បីរកច្រកចរចា ដែលអាចទទួលយកបានទាំងពីរភាគី ពោលគឺភាគីរដ្ឋាភិបាល និងភាគីគណបក្សប្រឆាំង។
ក្រុមអ្នកវិភាគបានលើកឡើងថា អ្នកនយោបាយដែលមាននិន្នាការគណបក្សផ្សេងគ្នា ពិសេសគឺគណបក្សសង្គ្រោះជាតិ និងរដ្ឋាភិបាល គួរតែបន្ទន់ឥរិយាបថរៀងៗខ្លួន ដើម្បីឲ្យលោក សម រង្ស៊ី មានឱកាសវិលចូលស្រុក មកចូលរួមគោរពវិញ្ញាណក្ខន្ធ ព្រះមហាវីរក្សត្រ នៅខណៈដែលមន្ត្រីជាន់ខ្ពស់នៃប្រទេសជិតខាងកម្ពុជា បានអញ្ជើញមកគោរពវិញ្ញាណក្ខន្ធព្រះអង្គជាបន្តបន្ទាប់នោះ។
ការលើកឡើងដូច្នេះ នៅបន្ទាប់ពីប្រធាននាយកដ្ឋានរដ្ឋបាលនៃទីស្ដីការគណៈរដ្ឋមន្ត្រី បានបញ្ជូនលិខិតស្នើសុំរបស់លោក សម រង្ស៊ី ប្រធានគណបក្សសង្គ្រោះជាតិមកវិញ ដោយមិនបានបញ្ជាក់អំពីការអនុញ្ញាតឲ្យលោក សម រង្ស៊ី វិលមកគោរពវិញ្ញាណក្ខន្ធ ព្រះមហាវីរក្សត្រ ឬមិនអនុញ្ញាតនោះទេ ប៉ុន្តែក្នុងលិខិតនោះ គ្រាន់តែចារបញ្ជាក់ថា លិខិតរបស់លោក សម រង្ស៊ី មិនបានបញ្ជាក់ពីអាសយដ្ឋានរស់នៅច្បាស់លាស់របស់លោក សម រង្ស៊ី។
អ្នកនាំពាក្យគណបក្ស សម រង្ស៊ី លោក យឹម សុវណ្ណ មានប្រសាសន៍ថា ខុទ្ទកាល័យរបស់លោក សម រង្ស៊ី បានបញ្ជូនលិខិតរបស់លោក សម រង្ស៊ី ទៅទីស្ដីការគណៈរដ្ឋមន្ត្រីម្ដងទៀត នៅព្រឹកថ្ងៃទី២២ តុលា ដោយបានសរសេរអាសយដ្ឋានរបស់លោក សម រង្ស៊ី ច្បាស់លាស់ ទាំងអាសយដ្ឋាននៅស្រុកខ្មែរ និងអាសយដ្ឋាននៅប្រទេសបារាំង។
លោក យឹម សុវណ្ណ អះអាងថា ការបញ្ជូនលិខិតរបស់លោក សម រង្ស៊ី ដើម្បីសុំឲ្យលោកនាយករដ្ឋមន្ត្រី ហ៊ុន សែន ធ្វើអន្តរាគមន៍ឲ្យលោក សម រង្ស៊ី វិលមកគោរពវិញ្ញាណក្ខន្ធ ព្រះមហាវីរក្សត្រ ជាលើកចុងក្រោយនេះ នៅក្រោយពេលលោក ទូច សារិន ជាប្រធាននាយកដ្ឋានរដ្ឋបាលនៃទីស្ដីការគណៈរដ្ឋមន្ត្រី បានបញ្ជូនលិខិតមកឲ្យគណបក្សសង្គ្រោះជាតិ វិញ កាលពីថ្ងៃសៅរ៍ ទី២០ តុលា ឆ្នាំ២០១២៖ «ប៉ុន្តែឥឡូវនេះ យើងបានសរសេរលិខិតទៅនាយកដ្ឋានរដ្ឋបាលហើយ ដែលក្នុងលិខិតនោះ ហើយបានបញ្ជាក់អាសយដ្ឋានរបស់គាត់នៅស្រុកខ្មែរ និងនៅបារាំង»។
ឆ្លើយតបទៅនឹងបញ្ហានេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានឲ្យវិទ្យុអាស៊ីសេរី ដឹងកាលពីថ្ងៃទី១៩ តុលា ថា រដ្ឋាភិបាលនឹងមិនពិភាក្សាសម្របសម្រួលនយោបាយករណីលោក សម រង្ស៊ី នេះ ក្រៅពីប្រព័ន្ធតុលាការឡើយ។
ទោះបីជាយ៉ាងនេះក្ដី អ្នកស្រាវជ្រាវផ្នែកអភិវឌ្ឍន៍សង្គម លោក កែម ឡី បានសង្កត់ធ្ងន់ថា កន្លងមកគណបក្សប្រឆាំងធ្លាប់មានបទពិសោធន៍ខាងចរចា ដើម្បីរកដំណោះស្រាយផ្នែកនយោបាយ។ បញ្ហានេះ លោក កែម ឡី បានជំរុញឲ្យគណបក្សសង្គ្រោះជាតិ បន្ទន់ឥរិយាបថបន្ថែមទៀត ក្នុងការបើកច្រកចរចាជាមួយរដ្ឋាភិបាលសាជាថ្មី៖ «លោក សម រង្ស៊ី ត្រូវមានសិល្បៈ ឬទេពកោសល្យផ្សេង ពីព្រោះជនជាតិខ្មែរ យើងអាចទូរស័ព្ទផ្ទាល់ យើងអាចមានការយោគយល់ជាងការដាក់លិខិត»។
ម្យ៉ាងវិញទៀត នៅគ្រាដែលមេដឹកនាំប្រទេសជិតខាងកម្ពុជា បានអញ្ជើញមកគោរពវិញ្ញាណក្ខន្ធព្រះករុណា ព្រះបាទសម្ដេចព្រះ នរោត្ដម សីហនុ ជាបន្តបន្ទាប់ នៅក្នុងរយៈពេលប៉ុន្មានថ្ងៃចុងក្រោយនេះ។ បញ្ហានេះ ទាំងប្រជាពលរដ្ឋ ទាំងអ្នកវិភាគ បានលើកឡើងថា ក្នុងនាមលោក សម រង្ស៊ី ជាជនជាតិខ្មែរដូចគ្នា និងជាអ្នកនយោបាយមួយរួប រដ្ឋាភិបាលគួរតែពិចារណាលើការស្នើសុំរបស់លោក សម រង្ស៊ី និងបើកច្រកឲ្យលោក សម រង្ស៊ី វិលមកកម្ពុជា វិញ ដើម្បីបង្ហាញថា រដ្ឋាភិបាលចង់ឲ្យមានការបង្រួបបង្រួមជាតិ។
បន្ថែមពីលើនេះទៀត ប្រសិនបើរដ្ឋាភិបាលយល់ព្រមឲ្យលោក សម រង្ស៊ី វិលចូលស្រុកតាមសំណើរបស់លោក សម រង្ស៊ី នៅក្នុងស្ថានភាពបច្ចុប្បន្នដែលប្រជាពលរដ្ឋខ្មែរកំពុងតែកាន់ទុក្ខចំពោះការសោយទិវង្គតរបស់ព្រះមហាវីរក្សត្រនោះ តើនឹងធ្វើឲ្យគណបក្សប្រឆាំងកាន់តែមានប្រជាប្រិយភាព ឬយ៉ាងណា?
ឆ្លើយតបទៅនឹងបញ្ហានេះ លោក កែម ឡី បានពន្យល់ថា ប្រសិនរដ្ឋាភិបាលអនុញ្ញាតឲ្យលោក សម រង្ស៊ី វិលចូលស្រុកនោះ គឺគណបក្សកាន់អំណាចទៅវិញទេ ដែលមានប្រជាប្រិយភាពកាន់តែខ្លាំងនោះ ពីព្រោះថា ប្រជាពលរដ្ឋនឹងមើលឃើញថា រដ្ឋាភិបាលប្រើយុទ្ធសាស្ត្រនយោបាយសន្ដោសប្រណី និងបង្រួបបង្រួមជាតិ៖ «ចំណែកឯលោក សម រង្ស៊ី ជាធម្មតាពេលចូលមក ត្រូវមានលក្ខខ័ណ្ឌ អាចត្រូវទទួលកំហុស អាចត្រូវសុំទោសអីចឹងជាដើម ដែលធ្វើឲ្យថយប្រជាប្រិយភាព»។
អតីតលេខាផ្ទាល់ព្រះមហាវីរក្សត្រ និងទីប្រឹក្សាអមខុទ្ទកាល័យព្រះមហាក្សត្រ ព្រះអង្គម្ចាស់ ស៊ីសុវត្ថិ ធម្មិកោ មានបន្ទូលនៅក្នុងនាទីវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី១៩ តុលា ថា ដើម្បីបំពេញព្រះទ័យរបស់ព្រះមហាវីរក្សត្រ ដែលព្រះអង្គចង់មានការបង្រួបបង្រួមជាតិនោះ រដ្ឋាភិបាលគួរតែលើកលែងទោសអ្នកនយោបាយទាំងអស់នៅពេលនេះ៖ «បើសិនជាយើងយល់ឃើញថា ព្រះមហាវីរក្សត្រ ជាបិតាឯករាជ្យជាតិ និងផ្សះផ្សាជាតិ គួរតែយើងសម្របសម្រួលនយោបាយក្នុងគោលបំណងបង្រួបបង្រួម»។
ក្រុមអ្នកវិភាគបានបញ្ចេញទស្សនៈថា នៅក្នុងស្ថានភាពបច្ចុប្បន្ននេះ ខុសពីពេលមុនៗ គឺអ្នកនយោបាយខ្មែរត្រូវងាកមករកតុចរចា ដើម្បីផ្សះផ្សាជាតិ និងបង្រួបបង្រួមជាតិ ពិសេសនៅពេលព្រះមហាវីរក្សត្រ បានសោយទិវង្គត ដែលព្រះបរមសពរបស់ព្រះអង្គកំពុងតម្កល់ទុកនៅក្នុងព្រះបរមរាជវាំង ហើយប្រជាពលរដ្ឋខ្មែរទូទៅកំពុងតែគោរពវិញ្ញាណក្ខន្ធរបស់ព្រះអង្គនោះ។
ភ្ជាប់នឹងបញ្ហានេះ អ្នកជំនាញផ្នែកវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច មានប្រសាសន៍នៅក្នុងនាទីវេទិកាអ្នកស្ដាប់វិទ្យុអាស៊ីសេរី កាលពីរាត្រីថ្ងៃសុក្រ ទី១៩ តុលា ថា ក្នុងនាមលោក សម រង្ស៊ី ជាប្រជាពលរដ្ឋខ្មែរមួយរូប រដ្ឋាភិបាលគួរតែអនុញ្ញាតឲ្យលោក សម រង្ស៊ី មកគោរពវិញ្ញាណក្ខន្ធ ព្រះមហាវីរក្សត្រ ព្រះករុណា ព្រះបាទសម្ដេចព្រះ នរោត្តម សីហនុ ដែរ៖ «ករណីទីពីរ ឈ្នះៗទាំងអស់គ្នា គេហៅថា វីនៗប៉ូលិស៊ី (Win Win Policy=នយោបាយឈ្នះៗ) ដោយសារតែព្រះមហាវីរក្សត្រសោយទិវង្គត ដូច្នេះ ព្រះមហាក្សត្រ ព្រះអង្គមានសិទ្ធិព្រះរាជទានទោសដល់អ្នកនយោបាយ ដរាបណាមានការស្នើសុំពីសម្ដេច ហ៊ុន សែន ដើម្បីឆ្លើយតបទៅនឹងតម្រូវការ ដែលយើងទាំងអស់គ្នាស្រឡាញ់ស្នាព្រះហស្តរបស់ព្រះអង្គ និងសម្ដេច ហ៊ុន សែន នៃកិច្ចព្រមព្រៀងទីក្រុងប៉ារីស ២៣ តុលា»។
ទោះបីជាយ៉ាងណាក៏ដោយ លោក សម រង្ស៊ី បានឲ្យដឹងកាលពីថ្ងៃទី១៨ តុលា នៅក្រោយពេលមួយថ្ងៃដែលលោកបានលិខិតថ្វាយព្រះមហាក្សត្រ នរោត្តម សីហមុនី និងលោកនាយករដ្ឋមន្ត្រី ហ៊ុន សែន ដើម្បីសុំព្រះរាជអន្តរាគមន៍ និងសុំអន្តរាគមន៍ពីលោក ហ៊ុន សែន ចូលស្រុក ក្នុងគោលបំណងសំខាន់តែមួយគត់ គឺលោកចង់មកចូលរួមគោរពវិញ្ញាណក្ខន្ធ ព្រះមហាវីរក្សត្រ ជាលើកចុងក្រោយ៖ «ខ្ញុំប្ដេជ្ញាចិត្តដាច់ខាត ខ្ញុំត្រូវតែមានឱកាសចុងក្រោយ ដើម្បីមកគោរពព្រះវិញ្ញាណក្ខន្ធ ពីព្រោះខ្ញុំក៏ជាកូនចៅរបស់ព្រះអង្គមួយរូបដែរ ដោយសារតែព្រះអង្គបានសោយទិវង្គត ហើយខ្ញុំមានការរន្ធត់ចិត្តក្រៃលែង»។
នៅក្នុងឱកាសព្រះរាជពិធីចម្រើនព្រះជន្មសម្ដេច ព្រះវររាជបិតាជាតិ នរោត្តម សីហនុ កាលពីថ្ងៃទី៣១ តុលា ឆ្នាំ២០១១ កន្លងទៅ ព្រះអង្គមានព្រះរាជឱង្ការផ្ដែផ្ដាំជាលើកចុងក្រោយថា ធ្វើយ៉ាងណាឲ្យមានការបង្រួបបង្រួមជាតិ និងផ្សះផ្សាជាតិតែមួយ៖ «ការរួបរួមគ្នាតែធ្លុងមួយ ដើរតែដើរមួយ មានហ្លួង មានឯកឧត្តម ហ៊ុន សែន ជាព្រះប្រមុខ សភា ប្រជារាស្ត្រ ប្រជាជាតិទាំងអស់ត្រូវរួបរួមគ្នា»។
ប្រធានលេខាធិការដ្ឋានគណៈកម្មាធិការប្រព្រឹត្តិកម្មការពារសិទ្ធិមនុស្សកម្ពុជា លោក សួន ប៊ុនស័ក្តិ បានឲ្យដឹងថា អង្គការសង្គមស៊ីវិលមួយក្រុម មានគម្រោងជួបប្រជុំគ្នា ដើម្បីដាក់ញត្តិទៅរដ្ឋាភិបាលសុំឲ្យលោក សម រង្ស៊ី មកចូលរួមបោះឆ្នោតនៅឆ្នាំ២០១៣ ខាងមុខ ស្របទៅតាមក្របខ័ណ្ឌប្រជាធិបតេយ្យ និងបង្រួបបង្រួមជាតិ។
ក្រុមអ្នកវិភាគបានសង្កត់ធ្ងន់ថា ប្រសិនបើរដ្ឋាភិបាលមិនមានការសម្របសម្រួលលើករណីលោក សម រង្ស៊ី នេះទេ គឺអ្នកនយោបាយខ្មែរមិនទាន់មានសិល្បៈនយោបាយទន់ភ្លន់ ដូចព្រះករុណា ព្រះបាទសម្ដេចព្រះ នរោត្តម សីហនុ នៅឡើយទេ។ ហើយបញ្ហានេះ ក៏ជាទឡ្ហីករណ៍មួយ ដែលឆ្លុះបញ្ចាំងថា សង្គមកម្ពុជា មិនទាន់មានការផ្សះផ្សាជាតិ និងបង្រួបបង្រួមជាតិនៅឡើយ។
ទោះបីជាយ៉ាងនេះក្ដី គេមិនទាន់ដឹងនៅឡើយទេថា តើរដ្ឋាភិបាលនឹងសម្រេចយ៉ាងណា ចំពោះលិខិតស្នើសុំរបស់លោក សម រង្ស៊ី ដែលបញ្ជូនទៅរដ្ឋាភិបាលជាលើកទីពីរ នៅថ្ងៃទី២២ តុលា ឆ្នាំ២០១២ នេះនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
ប្រសិនបើរាជរដ្ឋាភិបាលបច្ចុប្បន្នលោកពិតជាមានភក្តីភាពចំពោះព្រះមហាវីរៈក្សត្រថាជាព្រះបីតាបង្រួបបង្រួមជាតិពិតប្រាកដមែន! ក្នុងនាមជាអ្នកនយោបាយដែលមានឈាមជ័រជាខ្មែរដូចគ្នា៖ គឺគួណាស់តែមានការយោគយល់ និង ពិចារណាឡើងវិញដើម្បីរួបរួមគ្នាស្វែងរកប្រយោជន៍ជូនជាតិ ! បើធ្វើបានពិតជាទទួលបានផលចំណេញទាំងអស់គ្នា! ចំពោះអ្នកដែលទទួលបានកំរៃដ៍ខ្ពស់ជាងគេនោះ៖ គឺជាតិមាតុភូមិដ៍បវរបស់យើងនេះតែម្តង ។
Oct 24, 2012 03:00 AM
VIthean
ពី SHVប្រជារាស្ត្រខ្មែរនៅទូទាំងប្រទេសគឺពិតជាមានមហិច្ឆតា ចង់ឲ្យប្រទេសខ្មែរមាននយោបាយជាតិរឹងម៉ាំ ប្រយោជន៍ ដើម្បីការពារ និង អភិវឌ្ឍប្រទេសខ្មែរយើងឲ្យសម្បូរសប្បាយដូចសម័យអង្គសម្តេចឪ លោក ផៃ ស៊ីផាន គួរតែជ្រោមជ្រែងរឿងនេះ។
Oct 24, 2012 01:42 AM
Chipmunk
ពី New YorkDo you know, sometime the reconciliation is the best choice but sometime the person has to know himself, who is he? Law is law, flame is flame if you touch it you will get burn.
Oct 24, 2012 12:52 AM
ហុងណាំហោ
ពី ភ្នំពេញខ្ញុំជឿជាក់ថាលោករង្សីបើកក្បាលម៉ាស៊ិនខុសបានជាមិន
ចេញទឹក។ក្បាលម៉ាស៊ិនដែលអាចមានទឹកគឺអ្នកម្នាងម៉ូនិក
ទៅវិញទេ។
Oct 23, 2012 05:11 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
