ខ្មែរអ៊ិស្លាមរងគ្រោះក្នុងរបបខ្មែរក្រហមសុំឲ្យក្រុមអ្នកច្បាប់ជួយរកយុត្តិធម៌

ដោយ អ៊ុក សាវបូរី

2009-10-08

ខ្មែរអ៊ិស្លាមជាជនរងគ្រោះក្នុងរបបខ្មែរក្រហម ប្រជុំគ្នាពីរថ្ងៃ គឺទី៧និង៨ តុលា នៅខេត្តកំពត សុំឲ្យក្រុមអ្នកច្បាប់ជាតិនិងអន្តរជាតិ ជួយស្វែងរកយុត្តិធម៌ជូនពួកគាត់ដែលនៅរស់ និងអ្នកស្លាប់ដោយអំពើឧក្រិដ្ឋកម្ម ប្រកាន់ពូជសាសន៍ និងបំបាត់សាសនា។

RFA/Ouk Savborey

០៧-តុលា-០៩: ខ្មែរអ៊ិស្លាមរងគ្រោះក្នុងរបបខ្មែរក្រហមជួបប្រជុំគ្នានៅខេត្តកំពត សុំឲ្យក្រុមអ្នកច្បាប់ជួយរកយុត្តិធម៌។

ក្រុមខ្មែរអ៊ិស្លាមជាង១០០នាក់ មកពីខេត្តព្រះសីហនុ កោះកុង និងខេត្តកំពត ដែលតាំងខ្លួនជាដើមបណ្តឹងរដ្ឋប្បវេណី នៅក្នុងសំណុំរឿងក្តីឧក្រិដ្ឋកម្មខ្មែរក្រហម សុំឲ្យមេធាវីជាតិនិងអន្តរជាតិ ជួយចោទសួរឲ្យអស់សេចក្តីទៅតុលាការខ្មែរក្រហម ដើម្បីរកយុត្តិធម៌ដល់ខ្មែរអ៊ិស្លាមដែលបានរងគ្រោះពីឧក្រិដ្ឋកម្មបំផ្លាញជាតិសាសន៍ និងបំផ្លាញសាសនា ក្នុងរបបកម្ពុជាប្រជាធិបតេយ្យ។

សំណួរជាច្រើនពីក្រុមខ្មែរអ៊ិស្លាម បានសាកសួរទៅកាន់លោក ឡោ ជុនធី មេធាវីជាតិនិងលោក អូលីវីយ័រ បាហ៊ូញន៍ (Olivier Bahougne) មេធាវីអន្តរជាតិ បន្ទាប់ពីក្រុមមេធាវីនោះ បានបង្ហាញពីដំណើរការប្រព្រឹត្តទៅរបស់អង្គជំនុំជម្រះវិសាមញ្ញ នីតិវិធី តួនាទីរបស់អង្គភាពផ្សេងៗ នៃអង្គជំនុំជម្រះវិសាមញ្ញ និងការកំណត់អំពីបទឧក្រិដ្ឋតាមផ្លូវច្បាប់រួចមក។

ខ្មែរអ៊ិស្លាមមកពីខេត្តព្រះស៊ីហនុ ឈ្មោះ បួង រីម សួរថា ៖ «បំផ្លាញវិហារខ្ញុំ វិហារខ្ញុំសង់ជិតហើយៗ វាវ៉ៃបំផ្លាញយកដែកធ្វើទ្វារទឹកអស់រលីង អត់នៅសល់ទេ»។

ស្ត្រីខ្មែរអ៊ិស្លាមមកពីខេត្តកំពត ឈ្មោះ អែល យ៉ាំ បន្តថា ៖ «ឧទាហរណ៍ថា មេខ្មែរក្រហមមានចាប់បួនប្រាំរូប ប៉ុន្តែខ្លាចមានសេសសល់កន្លែងណាទៀត តើមានទៀតឬក៏អត់? ខ្ញុំសូមឆ្ងល់ប៉ុណ្ណឹង»។

បុរសខ្មែរអ៊ិសស្លាមមកពីខេត្តកោះកុង ថ្លែងថា ៖ «ឆ្ងល់ហេតុអីមិនកាត់មេដឹកនាំមុន មកកាត់ ឌុច ក្រោមបញ្ជាអ្នកទាំងប៉ុន្មាននាក់នោះវិញ?»។

ចំពោះសំណួរទាំងនេះ លោកមេធាវី ឡោ ជុងធី និងលោកមេធាវីអន្តរជាតិ អូលីវីយ័រ បាហ៊ូញន៍ បានឆ្លើយតបយ៉ាងដូច្នេះ ៖ «បន្ថែមរឿងកូនរបស់ ឌុច តាមច្បាប់ ផ្អែកទៅលើច្បាប់ព្រហ្មទណ្ឌ គឺកាត់ទោសតែអ្នកដែលបានប្រព្រឹត្តទេ អ៊ីចឹងកូនចៅមិនអាចបន្ទោសគាត់បានទេ។ រឿងគាត់ចូលធ្វើការ គាត់មានសិទ្ធិសេរីភាពពេញលេញដូចជាយើងដែរ។ វាជាការពិបាកណាស់នៅក្នុងការរកឃើញមូលហេតុប្រព្រឹត្តអំពើឃោរឃៅសម្រាប់មនុស្សប៉ុន្មាននាក់នេះ ព្រោះថា វាអាចចេញឡើងពីមនុស្សតែម្នាក់ក៏អាចថាបានដែរ ប៉ុន្តែមកដល់ពេលនេះ ពួកគាត់ប្រើសិទ្ធិរបស់គាត់មួយ គឺថាមានសិទ្ធិមិននិយាយ»។

មន្ត្រីសមាគមការពារសិទ្ធិមនុស្សអាដហុក លោក ឡាត់ គី បានអះអាងថា នេះជាលើកទី១ហើយ ដែលសមាគមបានរៀបចំឲ្យមានជំនួបរវាងក្រុមជនរងគ្រោះខ្មែរអ៊ិស្លាមក្រោមរបបខ្មែរក្រហម ជាមួយមេធាវីជាតិនិងអន្តរជាតិ។

ក្រុមមេធាវីជាតិនិងអន្តរជាតិ បានជំរុញឲ្យជនរងគ្រោះ និងកូនចៅជនរងគ្រោះគ្រប់ជនជាតិដែលនៅរស់ ហើយមានបងប្អូនរងនូវអំពើឧក្រិដ្ឋលើទឹកដីកម្ពុជា ក្នុងរបបខ្មែរក្រហម នាំគ្នាផុលផុសដាក់ពាក្បបណ្តឹងឲ្យបានច្រើន នៅក្នុងសំណុំរឿងលេខ០០២ ព្រោះការកាត់ក្តីអតីតមេដឹកនាំខ្មែរក្រហមនេះ ជាប្រវត្តិសាស្ត្រសម្រាប់ប្រទេសកម្ពុជា។

សូមជម្រាបថា ក្នុងសំណុំរឿងលេខ០០២នេះ មានជនជាប់ចោទ៤រូប គឺលោក នួន ជា, ខៀវ សំផន, អៀង សារី និងលោកស្រី អៀង ធីរិទ្ធ ជាអតីតមេដឹកនាំខ្មែរក្រហមជាន់ខ្ពស់ក្នុងរបបកម្ពុជាប្រជាធិបតេយ្យ ចន្លោះពីថ្ងៃ១៧ មេសា ឆ្នាំ១៩៧៥ ដល់ថ្ងៃ៦ មករា ឆ្នាំ១៩៧៩៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ចម្លងរឿងនេះទុក
	ព្រឹត្តិបត្រព័ត៌មាន
	បោះពុម្ព
	ចែករំលែករឿងនេះ