អាជ្ញាធរ​រក​ឃើញ​សារធាតុ​គីមី​និង​គ្រាប់​មិន​ទាន់​ផ្ទុះ​ពី​សម័យ​សង្គ្រាម

នៅ​ឯ​ខេត្ត​មណ្ឌលគិរី អាជ្ញាធរ​អាវុធ​គីមី បាន​រក​ឃើញ​សារធាតុ​គីមី និង​គ្រាប់​មិន​ទាន់​ផ្ទុះ​បន្សល់​ពី​ការ​ទម្លាក់​គ្រាប់​កាល​ពី​សម័យ​សង្គ្រាម​កប់​នៅ​ក្នុង​ដី​នៅ​តំបន់​ចំការ​ប្រជាពលរដ្ឋ​មួយ​កន្លែង នៅ​ចម្ងាយ​ប្រមាណ ៣​គីឡូម៉ែត្រ​ពី​ភូមិ​ពូស្យាម ឃុំ​សែនមនោរម្យ ស្រុក​អូររាំង។
ដោយ រដ្ឋា វីសាល
2012-04-06
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ការ​ជីក​កកាយ​រក​ឃើញ​គ្រាប់​មិន​ទាន់​ផ្ទុះ និង​សារធាតុគីមី​នេះ ធ្វើ​ឡើង​កាល​ពី​ខែ​មីនា ឆ្នាំ​២០១២ រហូត​បច្ចុប្បន្ន បន្ទាប់​ពី​ប្រជាពលរដ្ឋ​រស់​នៅ​តំបន់​នោះ បាន​ផ្ដល់​ព័ត៌មាន​ពី​កន្លែង​ដែល​អ្នក​ភូមិ​ប្រទះ​ឃើញ​មាន​ធុង​ដែក​ធំៗ​ប៉ុន​ធុង​សាំង​កប់​នៅ​ក្នុង​ដី។

អភិបាល​រង​ស្រុក​អូររាំង លោក នង ទន់ណារី បញ្ជាក់​ឲ្យ​ដឹង​ដែរ​ថា មាន​គ្រាប់​មិន​ទាន់​ផ្ទុះ​ប្រភេទ​គ្រាប់​បែក​ទម្លាក់​ពី​យន្តហោះ​ទំហំ​ប៉ុន​កំភួនជើង​ចំនួន​ពីរ​គ្រាប់ ត្រូវ​បាន​ជីក​យក និង​បាន​បំផ្លាញ​ចោល​ហើយ។

ក្រៅ​ពី​នោះ ក្រុម​ជំនាញ​រក​ឃើញ​ធុង​ដែក​ចំណុះ​ជាង ២០០​លីត្រ​ផ្ទុក​ដោយ​កញ្ចប់​ម្សៅ​គីមី ទម្ងន់​ប្រមាណ ១​គីឡូក្រាម​ក្នុង​មួយ​កញ្ចប់​ពេញៗ​ធុង​ចំនួន ១១​ធុង។

លោក​បន្ត​ថា សារធាតុ​គីមី​នោះ គឺ​ជា​សារធាតុ​ធ្វើ​ឲ្យ​ប៉ះពាល់​សុខភាព​មនុស្ស ក៏​ប៉ុន្តែ​ក្រុម​ជំនាញ​កំពុង​យក​ទៅ​វិភាគ​ដើម្បី​ឲ្យ​ដឹង​ប្រាកដ​ថា ជា​សារធាតុ​គីមី​អ្វី៖ «គាត់​យក Sample (គំរូ) ទៅ Analyze (វិភាគ) ហើយ ប៉ុន្តែ​យើង​អត់​ទាន់​ដឹង​ផល​វិជ្ជមាន​យ៉ាង​ម៉េច​ទេ យើង​គ្រាន់​តែ​ដឹង​ថា ជា​បឋម​ម្សៅ​គីមី​ហ្នឹង គឺ​ជា​ម្សៅ​មួយ​ប្រភេទ​ដែល​ធ្វើ​ឲ្យ​ជះ​ឥទ្ធិពល​ដល់​សុខភាព មនុស្ស និង​ធម្មជាតិ ដូច​ជា​ធ្វើ​ឲ្យ​ប៉ះពាល់​ដល់​ផ្លូវ​ដង្ហើម ស្បែក ភ្នែក​ប៉ះពាល់​ដល់​ធម្មជាតិ​ជុំវិញ​ហ្នឹង រុក្ខជាតិ​អី្វ​ជា​ដើម​ហ្នឹង»។

ចំណែក​អភិបាល​ស្រុក​អូររាំង លោក ស៊ិញ ស៊ុន បាន​ឲ្យ​ដឹង​ថា កាល​ពី​ចុង​ឆ្នាំ​២០១១ ក្រុម​ជំនាញ​នៃ​អាជ្ញាធរ​ជាតិ​គីមី​បាន​ជីក​រុក​រក​សារធាតុ​នេះ​ម្ដង​រួច​ទៅ​ហើយ ប៉ុន្តែ​មិន​បាន​រក​ឃើញ​អ្វី​ទេ បច្ចុប្បន្ន​ក្រុម​ជំនាញ​កំពុង​បន្ត​ស្វែង​រក​សារធាតុ​គីមី​នោះ​នៅ​ឡើយ៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល