សង្គម​ស៊ីវិល​ស្នើ​រដ្ឋាភិបាល​បង្កើត​ក្រុម​ស៊ើប​អង្កេត​ឃាតកម្ម​លើ​លោក ឈុត វុទ្ធី

មន្ត្រី​អង្គការ​សិទ្ធិ​មនុស្ស​ក្នុង​ស្រុក​មួយ​ចំនួន បាន​ស្នើ​ឲ្យ​រដ្ឋាភិបាល​បង្កើត​គណៈកម្មការ​ថ្នាក់​ជាតិ​ឯករាជ្យ​មួយ ធ្វើការ​ស៊ើប​អង្កេត​លើ​ករណី​បាញ់​សម្លាប់​សកម្មជន​ការពារ​ធនធាន​ធម្មជាតិ លោក ឈុត វុទ្ធី និង​កង​រាជ​អាវុធហត្ថ​ឈ្មោះ អ៊ិន រតនា។
ដោយ ទីន ហ្សាការីយ៉ា
2012-04-30
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ឈុត វុទ្ធី ៣០៥
មន្ត្រី​គណបក្ស សម រង្ស៊ី អុជ​ធូប​គោរព​វិញ្ញាណក្ខន្ធ​សព លោក ឈុត វុទ្ធី នៅ​ផ្ទះ​បុណ្យ នា​ឃុំ​វិហារសួគ៌ ស្រុក​ខ្សាច់កណ្ដាល ខេត្ត​កណ្ដាល កាល​ពី​ថ្ងៃ​ទី​២៨ ខែ​មេសា ឆ្នាំ​២០១២។
RFA/Khe Sonorng

ការ​ស្នើ​សុំ​ឲ្យ​រដ្ឋាភិបាល​បង្កើត​គណៈកម្មការ​ឯករាជ្យ ធ្វើការ​ស៊ើប​អង្កេត​លើ​ករណី​បាញ់​សម្លាប់​សកម្មជន​ការពារ​ព្រៃ​ឈើ​នេះ នៅ​បន្ទាប់​ពី​ពួក​គាត់​បាន​ចុះ​ទៅ​ធ្វើការ​អង្កេត​ផ្ទាល់​នៅ​កន្លែង​កើត​ហេតុ រក​ឃើញ​ភាព​មិន​ប្រក្រតី​ជា​ច្រើន​ចំពោះ​ឃាតកម្ម​នេះ។

មន្ត្រី​ស៊ើប​អង្កេត​ជាន់​ខ្ពស់​នៃ​សមាគម​សិទ្ធិ​មនុស្ស​អាដហុក លោក ចាន់ សុវ៉េត មាន​ប្រសាសន៍​ថា តាម​ការ​ចុះ​ស៊ើប​អង្កេត​នៅ​កន្លែង​កើត​ហេតុ លោក​បាន​ជួប​សម្ភាសន៍​ជាមួយ​ប្រជាពលរដ្ឋ​មួយ​ចំនួន​ដែល​ជា​កម្មករ​ក្រុមហ៊ុន​វារីអគ្គិសនី និង​កម្មករ​ស៊ី​ឈ្នួល​គេ​កាប់​ឈើ​នៅ​កន្លែង​កើត​ហេតុ​នៅ​ភូមិ​កោះប៉ោ ឃុំ​ប៉ាក់ខ្លង ស្រុក​មណ្ឌលសីមា ខែត្រ​កោះកុង បាន​ឲ្យ​ដឹង​ថា កម្លាំង​ប៉េអិម និង​មាន​ទាហាន​ជា​ច្រើន​នាក់​បាន​តាម​ឃាត់​រថយន្ត​លោក ឈុត វុទ្ធី និង​អ្នក​កាសែត ឌឹ ខេមបូឌា ដេលី (The Cambodia Daily) មិន​មាន​តែ​ពីរ​នាក់​ទេ។

លោក ចាន់ សុវ៉េត បាន​បញ្ជាក់​អំពី​ភាព​មិន​ប្រក្រតី​នៅ​ទី​កន្លែង​បាញ់​សម្លាប់​លោក ឈុត វុទ្ធី ដូច្នេះ៖ «សកម្មភាព​បទល្មើស​នៅ​កន្លែង​កើត​ហេតុ​នេះ ខាង​មន្រ្តី​កង​រាជ​អាវុធហត្ថ​ចុះ​ទៅ​ស៊ើប​អង្កេត​មើល​ទៅ​នៅ​ឆក​ល្វែង​ច្រើន​ណាស់។ នៅ​កន្លែង​ខ្លះ​ទៀត​មិន​បាន​រៀបចំ​គូរ​ប្លង់​ឲ្យ​បាន​ច្បាស់លាស់ មិន​កំណត់​ទីតាំង​ឲ្យ​បាន​ត្រឹមត្រូវ ហើយ​ភស្តុតាង​នៅ​កន្លែង​ទាំង​ប៉ុន្មាន​ត្រូវ​បាន​ផ្លាស់ប្ដូរ ដូចជា​សព​មន្ត្រី​ប៉េអិម អ៊ិន រតនា នោះ គេ​លើក​ទៅ​កន្លែង​ផ្សេង ក្រោយ​មក​គេ​លើក​មក​កន្លែង​ដើម​វិញ។ ការ​ពិនិត្យ​ទៅ​លើ​រថយន្ត​នៅ​កន្លែង​ខ្លះ​ទៀត យើង​មើល​ឃើញ​ថា នៅ​ឆក​ល្វែង​ច្រើន​ណាស់»

លោក ឈុត វុទ្ធី ដែល​ជា​សកម្មជន​ការពារ​ធនធាន​ធម្មជាតិ​យ៉ាង​ស្វិតស្វាញ​នៅ​ពេល​កន្លង​មក​នោះ ត្រូវ​ខ្មាន់​កាំភ្លើង​បាញ់​សម្លាប់​នៅ​វេលា​ម៉ោង​ប្រមាណ ១២ និង ២០​នាទី ថ្ងៃ​ទី​២៦ ខែ​មេសា ឆ្នាំ​២០១២។

កង​រាជ​អាវុធហត្ថ​ខេត្ត​កោះកុង កាល​ពី​ថ្ងៃ​ទី​២៧ ខែ​មេសា បាន​ចេញ​របាយការណ៍​ស៊ើប​អង្កេត​ស្តីពី​ករណី​​បាញ់​ប្រហារ​លោក ឈុត វុទ្ធី ផ្ញើ​ទៅ​អគ្គ​មេបញ្ជាការ​កង​យោធពល​ខេមរភូមិន្ទ និង​មេបញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស។

របាយការណ៍​នោះ​បាន​សរសេរ​ថា លោក ឈុត វុទ្ធី បាន​ធ្វើ​ដំណើរ​ជាមួយ​អ្នក​កាសែត ឌឹ ខេមបូឌា ដេលី ពីរ​រូប​ទៀត។ នៅ​ពេល​មក​ដល់​ចំណុច​វាល៣ ភូមិ​កោះប៉ោ ឃុំ​ប៉ាក់ខ្លង ស្រុក​មណ្ឌលសីមា ខែត្រ​កោះកុង កាល​ពី​ថ្ងៃ​ទី​២៦ ខែ​មេសា នោះ លោក ឈុត វុទ្ធី បាន​ជួប​ជាមួយ​កម្លាំង​អាវុធហត្ថ​ចំនួន​ពីរ​រូប មាន​ឈ្មោះ អ៊ិន រតនា និង​ឈ្មោះ សូ សុភាព ដែល​អ្នក​ទាំង​ពីរ​មាន​បេសកកម្ម​ជាមួយ​ខណ្ឌ​រដ្ឋបាល​ព្រៃឈើ ខែត្រ​កោះកុង ដើម្បី​បង្ក្រាប​បទល្មើស​ព្រៃ​ឈើ។

ប៉ុន្តែ​នៅ​ពេល​លោក ឈុត វុទ្ធី និង​កម្លាំង​អាវុធហត្ថ​បាន​ជួប​គ្នា។ លោក ឈុត វុទ្ធី បាន​ជេរ​ប្រមាថ​កង​កម្លាំង​អាវុធហត្ថ នៅ​ពេល​នោះ​លោក អ៊ិន រតនា បាញ់​សម្លាប់​លោក ឈុត វុទ្ធី បន្ទាប់​មក​បាញ់​សម្លាប់​ខ្លួន​ឯង​ចំនួន ២​គ្រាប់។

ទាក់ទង​ទៅ​នឹង​បញ្ហា​នេះ ក្រុម​មន្ត្រី​សិទ្ធិ​មនុស្ស​បាន​បដិសេធ​របាយការណ៍​អង្កេត​មួយ​នេះ ដែល​ពួកគេ​បាន​លើក​ឡើង​ថា របាយការណ៍​នេះ មិន​បាន​ឆ្លុះ​បញ្ចាំង​ការ​ពិត​ទាំង​ស្រុង​នោះ​ឡើយ ជា​ពិសេស​ចំណុច​ដែល​បាន​និយាយ​ថា មន្ត្រី​កង​រាជ​អាវុធហត្ថ​ឈ្មោះ អ៊ិន រតនា បាន​ធ្វើ​អត្តឃាត​ដោយ​បាញ់​ខ្លួន​ឯង​ចំនួន ២​គ្រាប់ ដោយ​កាំភ្លើង​វែង ប្រភេទ អាកា ៤៧។

ប្រធាន​ក្រុម​បច្ចេកទេស​នៃ​អង្គការ​សិទ្ធិ​មនុស្ស​លីកាដូ លោក អំ សំអាត ដែល​លោក​បាន​ចុះ​ទៅ​ស៊ើប​អង្កេត​នៅ​កន្លែង​កើត​ហេតុ​ដែរ​នោះ មាន​ប្រសាសន៍​ថា ការ​ស្លាប់​របស់​លោក ឈុត វុទ្ធី ស្ថិត​នៅ​ក្នុង​ភាព​អាថ៌កំបាំង​នៅ​ឡើយ។

លោក​បាន​ទាមទារ​ឲ្យ​រដ្ឋាភិបាល​បើក​ការ​ស៊ើប​អង្កេត​រឿង​នេះ​ឡើង​វិញ​ឲ្យ​មាន​តម្លាភាព និង​ទទួល​យក​បាន​ទាំង​អស់​គ្នា ពីព្រោះ​របាយការណ៍​ស៊ើប​អង្កេត​របស់​កង​រាជ​អាវុធហត្ថ​ខែត្រ​កោះកុង មិន​អាច​ទទួល​យក​បាន​ឡើយ៖ «សមត្ថកិច្ច​ប៉េអិម​ថា រតនា ហ្នឹង​បាញ់​សម្លាប់​ខ្លួន​ឯង នេះ​ជា​រឿង​ស្រពិចស្រពិល។ យើង​កំពុង​តែ​ធ្វើ​ការ​ស៊ើប​អង្កេត​បន្ត ព្រោះ​កន្លង​មក​អ្នក​ដែល​បាញ់​សម្លាប់​ខ្លួន​ឯង​មិន​ដែល​ពីរ​គ្រាប់​ទេ អ្នក​សម្លាប់​ខ្លួន​ឯង​ច្រើន​តែ​បាញ​នៅ​កន្លែង​សៀតផ្កា និង​នៅ​ក្រោម​ចង្កា តែ​ចំពោះ​លោក រតនា គឺ​ពីរ​គ្រាប់ គឺ​នៅ​ក្រោម​ដោះ​ស្ដាំ និង​លើ​ដោះ​ស្ដាំ។ បើ​សិន​ជា​លោក​រតនា សម្លាប់​ខ្លួន​ឯង ហេតុ​អី​បាន​ជា​មិត្តភ័ក្ដិ​របស់​គាត់​នៅ​កន្លែង​កើត​ហេតុ​មិន​ឃាត់? យើង​កំពុង​រក​ព័ត៌មាន​ថា លោក រតនា សម្លាប់​ខ្លួន​ឯង ឬ​គេ​បាញ់​ប្រហារ​គាត់?»

វិទ្យុ​អាស៊ីសេរី​មិន​អាច​ទាក់ទង​មន្ត្រី​នាំ​ពាក្យ​នៃ​ក្រសួង​មហាផ្ទៃ លោក ខៀវ សុភ័គ ដើម្បី​សួរ​អំពី​បញ្ហា​នេះ​បាន​នៅ​ឡើយ​ទេ នៅ​ថ្ងៃ​អាទិត្យ ទី​២៩ ខែ​មេសា។ 

មេបញ្ជាការ​កង​រាជ​អាវុធហត្ថ​ខែត្រ​កោះកុង លោក ថុង ណារ៉ុង មាន​ប្រសាសន៍​ថា អង្គភាព​របស់​លោក​កំពុង​បើក​ការ​ស៊ើប​អង្កេត​លើ​ករណី​នេះ​នៅ​ឡើយ ហើយ​របាយការណ៍​ចេញ​កាល​ពី​ថ្ងៃ​ទី​២៧ ខែ​មេសា នោះ គ្រាន់​តែ​ជា​របាយការណ៍​បឋម​ទេ។ ប៉ុន្តែ​លោក​មិន​បាន​បញ្ជាក់​លំអិត​ចំពោះ​ការ​បន្ត​ស៊ើប​អង្កេត​នេះ​ទេ។ លោក​បញ្ជាក់​ថា មន្ត្រី​កង​រាជ​អាវុធ​ឈ្មោះ សូ សុភាព នោះ នៅ​ក្នុង​អង្គភាព​កង​រាជ​អាវុធហត្ថ​ខែត្រ​នៅ​ឡើយ។

លោក ថុង ណារ៉ុង៖ «ខាង​អង្គការ​ពិនិត្យ​ឃើញ​យ៉ាង​ណា ជា​រឿង​របស់​គាត់ ហើយ​ខាង​ខ្ញុំ​កំពុង​តែ​ធ្វើ​ការ​ស៊ើប​អង្កេត ហើយ​ខ្ញុំ​សង្ឃឹម​ថា​នឹង​ដឹង​ការ​ពិត»

ទោះ​ជា​យ៉ាង​ណា​ក៏ដោយ ការ​បាញ់​សម្លាប់​លោក ឈុត វុទ្ធី នេះ លោក ចាន់ សុវ៉េត បាន​ពន្យល់​ថា ជា​ការ​បាញ់​សម្លាប់​ដើម្បី​បំបិទ​មាត់ និង​ជា​ការ​គំរាមកំហែង​ដល់​សកម្មជន​ការពារ​ព្រៃ​ឈើ​ដទៃ​ទៀត និង​សកម្មជន​ការពារ​សិទ្ធិ​មនុស្ស​ជា​ដើម។

លោក ចាន់ សុវ៉េត បាន​អះអាង​ថា មូលហេតុ​សំខាន់​ចំពោះ​ការ​បាញ់​សម្លាប់​លោក ឈុត វុទ្ធី នេះ ដោយសារ​តែ​គេ​ចង់​បិទ​បាំង​អំពី​សកម្មភាព​បទល្មើស​ព្រៃ​ឈើ​របស់​ក្រុមហ៊ុន​កាប់​ឈើ​នៅ​កន្លែង​កើត​ហេតុ៖ «ក្រុមហ៊ុន​ហ្នឹង​ដេញ​ថ្លៃ​បាន​ពី​ចិន​មក ហើយ​ក្រុមហ៊ុន​ហ្នឹង​ជិត​ផុត​កុងត្រា​ហើយ ហើយ​ក្រុមហ៊ុន​ហ្នឹង​ដូច​គេ​និយាយ​ពី​ខាង​ប្រជាពលរដ្ឋ ជា​ក្រុមហ៊ុន​របស់​អ្នក​មាន​អំណាច មាន​ស័ក្ដិ មាន​យស»

ទោះ​បី​ជា​យ៉ាង​ណា​ក៏ដោយ ការ​ស្លាប់​របស់​លោក ឈុត វុទ្ធី និង​មន្ត្រី​កង​រាជ​អាវុធហត្ថ​មួយ​រូប​ទៀត​នេះ នៅ​មាន​សាក្សី​រស់​ចំនួន​ពីរ​រូប​ទៀត​ដែល​ដឹង​អំពី​ស្ថានភាព​មុន​ពេល​កើតហេតុ​ពិត​ប្រាកដ គឺ​អ្នក​កាសែត ឌឹ ខេមបូឌា ដេលី កញ្ញា ផន បុប្ឆា និង​កញ្ញា អូលេស្យា ផ្លូឃី (Olesia Plokhii) ជន​ជាតិ​កាណាដា។ ប៉ុន្តែ​តាំង​ពី​ថ្ងៃ​កើត​ហេតុ​មក អ្នក​កាសែត​ទាំង​ពីរ​នាក់ មិន​ធ្វើ​អត្ថាធិប្បាយ​អ្វី​ទាំង​អស់​ជុំវិញ និង​ឃាតកម្ម​នេះ។

អត្ថ​បទ​របស់កាសែត ឌឹ ខេមបូឌា ដេលី ចេញ​ផ្សាយ​ថ្ងៃ​សៅរ៍ ទី​២៨ ខែ​មេសា បាន​សរសេរ​ថា អ្នក​កាសែត​ទាំង​ពីរ​នាក់​មិន​ដឹង​ថា អ្នក​ណា​ជា​បាញ់​សម្លាប់​លោក ឈុត វុទ្ធី និង​លោក អ៊ិន រតនា ជា​មន្ត្រី​កងរាជអាវុធហត្ថ​នោះ​ទេ។ ប៉ុន្តែ​ពួក​គេ​បញ្ជាក់​ថា លោក ឈុត វុទ្ធី និង​កងរាជអាវុធហត្ថ​ឈ្មោះ អ៊ិន រតនា នោះ​​មិន​ទាន់​ស្លាប់​ភ្លាមៗ​ទេ។ ក៏​ប៉ុន្តែ​ក្រុម​ទាហាន និង​ប៉េអឹម មិន​បាន​ជួយ​សង្គ្រោះ​ទេ ដោយ​ទុកឲ្យ​លោក ឈុត វុទ្ធី និង​ប៉េអឹម អ៊ិត រតនា នៅ​កន្លែង​កើត​ហេតុ​រហូត​ដល់​ស្លាប់ ទោះ​បី​ជា​ស្ត្រី​អ្នក​កាសែត​បាន​ស្នើ​សុំ​យក​ពួកគាត់​ទៅ​ពេទ្យ​ក៏ដោយ។ ក្រុម​ទាហាន​ទាំង​នោះ​បាន​ឃាត់​មិន​ឲ្យ​ស្ត្រី​អ្នក​កាសែត​ទាំង​ពីរ​ចាក​ចេញ​ពី​កន្លែង​កើត​ហេតុ​ឡើយ។ ក្នុង​ពេល​នោះ ស្ត្រី​អ្នក​កាសែត​ក៏​បាន​ស្តាប់​ឮ​ក្រុម​ទាហាន​និយាយ​គ្នា​ថា "មិន​បាច់​និយាយ​ច្រើន​ទេ សម្លាប់​អ្នក​ទាំង​ពីរ​ចោល​ទៅ"

អត្ថបទ​កាសែត​ដដែល​បាន​រៀបរាប់​អំពី​រឿង​រ៉ាវ​កើត​ឡើង​ជា​ច្រើន​ទៀត​នៅ​មុន​ពេល​កើត​ហេតុ។

ទាក់​ទង​ទៅ​នឹង​បញ្ហា​នេះ ក្រុម​អង្គការ​សង្គម​ស៊ីវិល​មួយ​ចំនួន​នៅ​ថ្ងៃ​ទី​២៩ ខែ​មេសា បាន​ផ្ញើ​សារ​រំលែក​ទុក្ខ​ដល់​ក្រុម​គ្រួសារ​លោក ឈុត វុទ្ធី។ នៅ​ក្នុង​សារ​រំលែក​ទុក្ខ​នោះ បាន​សរសេរ​ថា លោក ឈុត វុទ្ធី ជា​ស្ថាបនិក និង​ជា​នាយក​នៃ​ក្រុម​ការពារ​ធនធាន​ធម្មជាតិ (NRPG) និង​ជា​សកម្មជន​ដែល​បាន​ចូល​រួម​យ៉ាង​សកម្ម​ក្នុង​កិច្ច​ការពារ​ព្រៃ​ឈើ​កម្ពុជា និង​ប្រឆាំង​នឹង​ការ​កាប់​ឈើ​ខុស​ច្បាប់។ លោក​គឺ​ជា​អ្នក​គាំទ្រ​ដ៏​សកម្ម​មួយ​រូប​នៃ​បណ្ដាញ​សហគមន៍​ផ្សេងៗ អង្គការ​មិន​មែន​រដ្ឋាភិបាល សមាគម និង​សហគមន៍​មូលដ្ឋាន​នានា ដែល​តស៊ូ​ដើម្បី​ការពារ​ធនធាន​ធម្មជាតិ​នៅ​ទូទាំង​ប្រទេស។

ក្នុង​នាម​ជា​សមាជិក​អង្គការ​សង្គម​ស៊ីវិល​នៅ​កម្ពុជា សូម​ថ្កោល​ទោស​យ៉ាង​ខ្លាំង​បំផុត​ចំពោះ​ការ​បាញ់​សម្លាប់​សកម្មជន​រូប​នេះ។ នៅ​ក្នុង​ហេតុការណ៍​សោកនាដកម្ម​នេះ មន្ត្រី​កង​រាជ​អាវុធហត្ថ​មួយ​រូប​ក៏​ត្រូវ​គេ​បាញ់​សម្លាប់​ដែរ។ អង្គការ​សង្គម​ស៊ីវិល​អំពាវនាវ​ឲ្យ​រដ្ឋាភិបាល​ជា​អ្នក​ទទួល​ខុស​ត្រូវ​លើ​ករណី​នេះ និង​អំពាវនាវ​ឲ្យ​អាជ្ញាធរ​ពាក់ព័ន្ធ​ទាំង​អស់ សូម​ធ្វើ​ការ​ស៊ើប​អង្កេត​ជា​បន្ទាន់​ចំពោះ​ករណី​នេះ និង​ចាប់​ឃាតក​ពិត​ប្រាកដ​យក​មក​ផ្ដន្ទាទោស​តាម​ច្បាប់៕ 

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (5)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ឞិនចាំបាច់សើបទេចាប់តាចាន់សារូនឞកសួរទៅដឹងហើយ។

May 01, 2012 09:35 AM

អ្នក​អាន​អនាមិក

As the picture shows in KI Media, Mr. In Rattana's body 2 bullets hit to left chest and 2nd bullet hit right stomach. It shows that Mr. Mr. In Rattana was not committed suicide. so, the third person who prepared for the murder.The first report of provincial authority is a "Coup Monte".
Therefore Mr. Chhut Wuthy and Mr. In Rattana were killed by the third person.

Apr 30, 2012 12:51 PM

អ្នក​អាន​អនាមិក

ខ្ញុំបាទយល់ស្របជាមួយសង្គមស៊ីវិលដែលស្នើឱ្យរដ្ឋាភិបាល
បង្កើតក្រុមស៊ើបអង្កេតឯករាជ្យមួយដើម្បីភាពយុត្តិធម៌ជូន
សព្វលោកឈុត វុទ្ធីនិងសព្វឃាតករប៉េអិមអ៊ិន រតនា។ក្ដី
សង្ឃឺមភាពយុត្តិធម៌ចេញពីរដ្ឋាភិបាលហ៊ុន សែនចំពោះខ្ញុំ
និងប្រជាជនខ្មែរ៩៩.៩៩%ទៀតគឺសូនដូចជារាវរកកូនម្ជុល
មួយនៅកណ្ដាលមហាសាគរអញ្ចឹង។ដើម្បីរកឱ្យឃើញភាព
យុត្តិធម៌ពិតប្រាកដនោះមានតែច្រកមួយទេគឺដាច់ខាតត្រូវ
តែយកសាក្សីទាំងអស់ឱ្យចេញពីស្រុកខ្មែរមានសុវត្តិភាព
ជាមុនសិន។

Apr 30, 2012 10:49 AM

អ្នក​អាន​អនាមិក

Hun Sen does not care any more about news reports and internet community that condemns him for protecting criminals in Cambodia. He is sure he will live up to 100 years. Hun Sen should open his eye and learn from Moammar Gadhafi that nobody in the world would predict his quick end.

Apr 30, 2012 02:17 AM

អ្នក​អាន​អនាមិក

អាស៊ីសេរី អ្នកមិនខ្លាចគេចាប់ដាក់ទ្រុងដូច Camnews ទេរឺ?

Apr 30, 2012 01:17 AM

មើល​មតិ​ទាំង​អស់.