មន្ត្រីរាជការនៅមណ្ឌលគិរីមិនបានបើកប្រាក់បៀវត្ស៣ខែហើយ
មន្ត្រីរាជការ និងមន្ត្រីសមាជិកក្រុមប្រឹក្សាស្រុកកែវសីមា ខ្លះបានត្អូញត្អែរពីផលលំបាក និងអំពាវនាវឲ្យអាជ្ញាធរខេត្ត យកចិត្តទុកដាក់ពិនិត្យ និងដោះស្រាយបើកប្រាក់ខែមន្ត្រីរាជការបានទាន់ពេលវេលា ដើម្បីពួកគាត់មានលទ្ធភាពប្រើប្រាស់ប្រាក់ខែទិញស្បៀងអាហារចិញ្ចឹមក្រុមគ្រួសារ និងរៀបចំធ្វើបុណ្យទាននៅរដូវចូលឆ្នាំថ្មីខាងមុខនេះ។
អភិបាលស្រុកកែវសីមា លោក ស៊ិន វ៉ាន់វុធ បានបញ្ជាក់ថា ការយឺតយ៉ាវនេះកើតឡើងដោយសារតែអាជ្ញាធរខេត្តបានធ្វើប្រតិភូកម្មថវិកា ឬផ្ទេរអំណាចបើកប្រាក់ទៅអាជ្ញាធរស្រុក ដើម្បីជួយសម្រួលដល់ការងារបើកប្រាក់ខែដល់មន្ត្រីរាជការ។ ករណីនេះមន្ត្រីស្រុកមិនមានបទពិសោធន៍រៀបចំឯកសារ បើកប្រាក់ខែជូនមន្ត្រីរាជការបានត្រឹមត្រូវតាមគោលការណ៍របស់ស្ថាប័នជំនាញទើបមិនអាចដកប្រាក់មកបើកជូនមន្ត្រីរាជការបានទាន់ពេលវេលា។ ករណីនេះមន្ត្រីអាជ្ញាធរពាក់ព័ន្ធបានខិតខំដោះស្រាយបញ្ហានេះហើយ។ លោករំពឹងមន្ត្រីរាជការក្នុងស្រុកនឹងអាចបើកប្រាក់ខែបានមុនថ្ងៃចូលឆ្នាំខ្មែរខាងមុខនេះ។
លោក ស៊ិន វ៉ាន់វុធ៖ «កាលមុនយើងដឹងតែដល់ខែបើកពីខេត្ត ដល់ពេលឥឡូវយើងត្រូវរត់ឯកសារធ្វើឯកសារអ្វីដោយខ្លួនឯង ទៅបើកពីធនាគារ ហើយដើម្បីបានសែក (មូលប្បទានប័ត្រ) បានអី យើងត្រូវតែងតាំងភ្នាក់ងារបើកផ្ទាល់ ដូច្នេះវាមានការលំបាក ហើយយើងមិនដែលធ្លាប់ឆ្លងកាត់។ប្រហែលជាថ្ងៃហ្នឹង ឬស្អែកតែប៉ុណ្ណឹង»។
ចំណែកនៅខេត្តរតនគិរី វិញ កាលពីខែមីនា កន្លងទៅនេះ ការធ្វើប្រតិភូកម្មថវិកា ឬផ្ទេរអំណាចបើកប្រាក់ពីអាជ្ញាធរខេត្តទៅអាជ្ញាធរស្រុក បានធ្វើឲ្យករណីបើកប្រាក់ខែមន្ត្រីរាជការយឺតយ៉ាវបីខែ ហើយបញ្ហានេះ ធ្វើឲ្យមានការថ្នាំងថ្នាក់ពីមន្ត្រីមានជីវភាពទាបមួយចំនួន ដូចគ្នានឹងខេត្តមណ្ឌលគិរីនេះដែរ។ ក៏ប៉ុន្តែបញ្ហានេះអាជ្ញាធរខេត្តបានជំរុញឲ្យមន្ត្រីជំនាញតាមបណ្ដាស្រុក រៀបចំឯកសារបើកប្រាក់ជូនមន្ត្រីរាជការរួចរាល់ហើយ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
