«រឿងទឹកវាខ្វះខាត គម្រោងវាឆ្ងាយ ទឹកទៅដឹកដល់វត្តបួរឯណោះ ហើយអណ្ដូងស្តុកទឹកវាមានប្រហែលជា៣-៤អណ្ដូងដែរ វានៅតែអត់គ្រប់ព្រោះប្រជាជនយើងវាច្រើន។ ខែវស្សាអ៊ីចឹងវាមិនអីទេ ដល់ខែប្រាំងវាខ្វះ។ អណ្ដូងតូចៗគោកអស់ហើយ តែដាច់ទឹកភ្លៀងគោកអស់» ៖ នេះជាការបញ្ជាក់ប្រាប់របស់ប្រជាពលរដ្ឋនៅឃុំមួយចំនួនគឺឃុំរាមអណ្ដើក និងឃុំព្រៃរំដេង នៃស្រុកគិរីវង់ ខេត្តតាកែវ អំពីបញ្ហាខ្វះខាតទឹកស្អាតប្រើប្រាស់ប្រចាំថ្ងៃថ្វីបើក្នុងរដូវនេះជារដូវវស្សាមានភ្លៀងធ្លាក់ច្រើនហើយក៏ដោយក៏ការផ្គត់ផ្គង់ទឹកស្អាតក្នុងគ្រួសារគេនីមួយៗនៅតែជួបការលំបាកដែរ។
ប្រជាពលរដ្ឋទាំងនោះបានឲ្យដឹងទៀតថា តាមពិតទៅគេមានលទ្ធភាពក្នុងការទទួលបានទឹកស្អាតយកមកប្រើប្រាស់ខ្លះគឺត្រងទឹកភ្លៀង ប៉ុន្តែដោយសារមិនសូវមានថវិកាធ្វើអាងឬពាងអុងសម្រាប់ស្ដុកទឹកឲ្យបានច្រើននោះ គេប្រើបានតែប៉ុន្មានថ្ងៃទឹកភ្លៀងនោះក៏អស់ទៅ។
ក្នុងចំណោមប្រជាពលរដ្ឋដែលជួបបញ្ហានេះបុរសមួយរូបឈ្មោះ រុំ នៅភូមិត្រពាំងជៃ ឃុំព្រែរំដេង ស្រុកគិរីវង់ បានប្រាប់អ្នកយកព័ត៌មានវិទ្យុអាស៊ីសេរីដែលបានចុះផ្ទាល់ដល់មូលដ្ឋាននោះយ៉ាងដូច្នេះថា នៅក្នុងភូមិនេះគេឃើញមានអណ្តូងចំនួន៤ដែរ ប៉ុន្តែអណ្តូងនោះមានទឹកប្រើមិនគ្រប់គ្រាន់សម្រាប់មនុស្សដែលមានចំនួនច្រើនរយគ្រួសារ ហើយដែលខ្វះខាតខ្លាំងជាងគេគឺនៅក្នុងរដូវប្រាំង។
លោក រុំ បានឲ្យដឹងថា ៖ «ទៅតាមវត្តតាមអីអ៊ីចឹងបានមានទឹក ព្រោះស្រះលោកវាធំ វាអាចស្តុកទឹកបានច្រើន បើតាមផ្ទះ អាចតាមពាងតាមអីបន្តិចបន្តួច ដល់ពេលវាដាច់ទឹកភ្លៀងទៅ យើងអត់ដឹងយកមកពីណា។ តាមអណ្ដូងក៏វារីង ប្រើប្រាស់គ្នាច្រើន មនុស្សវាច្រើន តែអណ្ដូងវាមានតិច»។
ចំណែកឯប្រជាពលរដ្ឋនៅឯភូមិស្វាយស ឃុំរាមអណ្ដើក ក្នុងស្រុកគិរីវង់ដដែលនេះ ក៏បានបញ្ជាក់ប្រាប់ស្រដៀងគ្នានេះដែរអំពីបញ្ហាទឹកស្អាតសម្រាប់ប្រើប្រាស់នោះ។ អ្នកស្រុកបានបញ្ជាក់ថាបើនៅក្នុងរដូវវស្សាមិនជាចោទប៉ុន្មានដែរទេ គឺបានទឹកភ្លៀងត្រងទុក ហើយនិងអាចដងនៅតាមអណ្ដូងបានខ្លះ ក៏ប៉ុន្តែអណ្ដូងទាំងនោះក៏មិនគ្រប់គ្រាន់ដែរ។
បុរសមួយរូបឈ្មោះ ឃុត អឿន ក្នុងចំណោមអ្នកភូមិស្វាយសបានប្រាប់ឲ្យដឹងយ៉ាងដូច្នេះ ៖ «បញ្ហាទឹកនិយាយរួមរដូវវស្សាអ៊ីចឹងមិនខ្វះទេ ក៏ប៉ុន្តែដោយឡែកនៅរដូវប្រាំងវិញ ខ្វះ ដូចថាទៅដឹកឆ្ងាយៗ។ ឆាប់ភ្លៀងទៅវាអត់អីប៉ុន្មានទេ ដល់ពេលក្រភ្លៀងគឺត្រូវតែដឹកវេទនាអ៊ីចឹងរហូតតែម្ដង»។
អនុប្រធានភូមិស្វាយស លោក ង៉ែត បុស បានប្រាប់ឲ្យដឹងដែរថា នៅក្នុងភូមិនេះពិតជាមានការខ្វះខាតទឹកស្អាតប្រើប្រាស់មែនហើយ ពីព្រោះនៅក្នុងភូមិដែលមានប្រជាពលរដ្ឋជាង១០០គ្រួសារនោះគឺមានអណ្ដូងស្នប់មួយនិងត្រពាំងមួយ។ លោកបានបន្ថែមទៀតថា បើតាមការសង្កេតរបស់អ្នកដែលមានលទ្ធភាពរកទឹកស្អាតប្រើប្រាស់បាននោះ គឺមានប្រមាណតែ៣០%ប៉ុណ្ណោះនៅក្នុងភូមិស្វាយសនេះ។
លោក ង៉ែត បុស បានមានប្រសាសន៍ថា ៖ «ក្រៅពីហ្នឹងខ្វះខាតទឹកអណ្ដូងស្នប់ហ្នឹង ទឹកស្អាតខ្វះហើយ។ ហើយខ្ញុំសំណូមពរទៅថ្នាក់លើដែរ ប៉ុន្តែគម្រោងធ្វើទៅបាត់ សុំអត់បាន»។
ចំពោះការបញ្ជាក់ប្រាប់របស់ប្រជាពលរដ្ឋ ក៏ដូចជាអាជ្ញាធរភូមិថាមានការខ្វះខាតទឹកស្អាតប្រើប្រាស់នេះ ប៉ុន្តែបើតាមការអះអាងរបស់មេឃុំរាមអណ្ដើក លោក ឈឹម ម៉ូត ដោយបានបញ្ជាក់យ៉ាងខ្លីថានៅក្នុងភូមិមួយៗគឺសុទ្ធតែមានអណ្ដូងទឹកប្រើប្រាស់គ្រប់គ្រាន់ ៖ «អណ្ដូងធ្វើហើយតើភូមិស្វាយស អណ្ដូងប្រោះ អណ្ដូងថ្មហ្នឹង ៥-៦ឯណោះ។ ...ទឹកមានខួបប្រាំង ខួបវស្សា»។
ទាក់ទងទៅនឹងការខ្វះខាតទឹកស្អាតសម្រាប់អ្នកជនបទប្រើប្រាស់នេះ បើតាមការបញ្ជាក់ប្រាប់របស់មន្ត្រីក្រសួងអភិវឌ្ឍន៍ជនបទផ្នែកផ្គត់ផ្គង់ទឹកបានឲ្យដឹងថា អ្នកភូមិតាមជនបទប្រមាណ៦០%នៅមិនទាន់មានលទ្ធភាពទទួលបានទឹកស្អាតប្រើប្រាស់នៅឡើយទេ។
ប្រធាននាយកដ្ឋានផ្គត់ផ្គង់ទឹកជនបទនៃក្រសួងអភិវឌ្ឍន៍ជនបទ លោកវេជ្ជបណ្ឌិត ម៉ៅ សារ៉ាយ បានមានប្រសាសន៍ថា រាជរដ្ឋាភិបាលក៏ដូចជាក្រសួងអភិវឌ្ឍន៍ជនបទបានប្រឹងប្រែងធ្វើការដោះស្រាយបញ្ហានេះនៅតាមជនបទនៃខេត្តមួយចំនួនដែរកន្លងមក ហើយនិងក៏កំពុងតែបន្តការអនុវត្ដកម្មវិធីនេះ ក៏ប៉ុន្តែប្រការដែលនៅមានការខ្វះខាតមិនទាន់អាចបំពេញសេចក្តីត្រូវការបាននោះពីព្រោះផ្អែកទៅតាមថវិកាជាតិដែលមាននិងតាមរយៈម្ចាស់ជំនួយ។
លោកបានបន្តថា ដូច្នេះកម្មវិធីផ្គត់ផ្គង់ទឹកស្អាតត្រូវបានគេជ្រើសរើសតំបន់គោលដៅកន្លែងដែលមានការខ្វះខាតទឹកច្រើនជាងគេ។
លោកវេជ្ជបណ្ឌិត ម៉ៅ សារ៉ាយ បានបញ្ជាក់ថា ៖ «ហើយដល់តំបន់ទិសដៅ យើងមិនអាចថាមួយឆ្នាំ យើងធ្វើគ្រប់ទាំងកន្លែងណាដែលខ្វះខាតទេ គឺយើងធ្វើទៅតាមអាទិភាពកន្លែងមួយៗ។ មិនមែនក្នុងន័យថា យើងមិនធ្វើការផ្ដល់ជូនទេ ប៉ុន្តែដូចខ្ញុំជម្រាបជូនវាមានដំណាក់កាល។ ឧបមាថា ២០០៨ ទៅតំបន់ប៉ុន្មានភូមិហ្នឹងទៅនៅក្នុងស្រុកហ្នឹង ២០០៩-២០១០អីអ៊ីចឹង វាមានជំហានៗរបស់វា»។
មន្ត្រីក្រសួងអភិវឌ្ឍន៍ជនបទបានប្រាប់ឲ្យដឹងដែរថា ទោះជាមិនទាន់បានគ្រប់តម្រូវការក្តីក៏គេបានផ្តល់ទឹកស្អាតឲ្យដល់ប្រជាពលរដ្ឋនៅតាមជនបទបានចំនួន៤០%ដែរកន្លងមកនោះដោយមានការជួយឧបត្ថម្ភពីអង្គការមួយចំនួនដូចជា អង្គការ UNICEF ធនាគារអភិវឌ្ឍន៍អាស៊ី និងធនាគារពិភពលោកជាដើម។ ចំពោះការផ្ដល់គឺគេបានបែងចែកតាមបច្ចេកវិជ្ជានូវប្រភពទឹកចំនួន៧ ដែលរួមមានការជីកអណ្ដូងស្នប់ អណ្ដូងដាក់លូ អណ្ដូងខួង ផ្ដល់ផើងចម្រោះទឹកស្អាតតាមគ្រួសារ ជីកស្រះសម្រាប់សហគមន៍ដោយមានបន្ដភ្ជាប់នូវបណ្ដាញចម្រោះទឹកព្រមទាំងផ្តល់អាងសម្រាប់សន្សំទឹកភ្លៀង។
គួរជម្រាបជូនដែរថា ការខ្វះខាតទឹកស្អាតសម្រាប់អ្នកជនបទប្រើប្រាស់នៅក្នុងប្រទេសកម្ពុជាសព្វថ្ងៃនេះគេឃើញអ្នកជំនាញផ្នែកសុខភាពបានសម្ដែងការព្រួយបារម្ភផងដែរថា កម្ពុជាមានកម្រិតនៃការរក្សាអនាម័យទាបបំផុតក្នុងតំបន់អាស៊ីអាគ្នេយ៍។
ក្នុងរបាយការណ៍របស់អង្គការសុខភាពពិភពលោកបានបញ្ជាក់ថា ការខ្វះខាតអនាម័យនិងការខ្វះខាតការផ្គត់ផ្គង់ទឹកស្អាតនៅកម្ពុជាបានបណ្ដាលឲ្យមានជម្ងឺរាករូស ហើយមានអ្នកស្លាប់ចំនួនជាងមួយម៉ឺននាក់ក្នុងមួយឆ្នាំ។
ប្រជាពលរដ្ឋនៅឃុំព្រៃរំដេងនិងរាមអណ្ដើកនៃស្រុកគិរីវង់ ខេត្តតាកែវ បានប្រាប់ឲ្យដឹងថា ជារឿយៗគេតែងជួបប្រទះនឹងជំងឺរាករូសនេះផងដែរ ដោយសារតែខ្វះខាតទឹកហើយទទួលទានទឹកមិនស្អាតនោះ ដូច្នេះគេចង់ឲ្យរាជរដ្ឋាភិបាលជួយធ្វើយ៉ាងណាឲ្យគេមានទឹកស្អាតប្រើប្រាស់ឲ្យបានគ្រប់គ្រាន់៕