របាយការណ៍ដ៏លម្អិតនេះបានទទួលស្គាល់ថា បើប្រៀបធៀបទៅនឹងការបោះឆ្នោតជាតិឆ្នាំ២០០៣ ការបោះឆ្នោតជាតិឆ្នាំ២០០៨កន្លងមកនេះ មានចំណុចមួយចំនួនល្អប្រសើរជាងមុន។ ចំណុចល្អប្រសើរទាំងនោះរួមមានលទ្ធភាពផ្សព្វផ្សាយទូលំទូលាយនៃសារព័ត៌មាន ការឃោសនានយោបាយរបស់គណបក្ស មានសកម្មភាពកើនឡើង មានការថយចុះនូវពាក្យបណ្ដឹងស្ដីពីភាពមិនប្រក្រតីនៅក្នុងបញ្ហាបច្ចេកទេសរដ្ឋបាល នៅក្នុងការិយាល័យបោះឆ្នោត និងនៅក្នុងការិយាល័យរាប់សន្លឹកឆ្នោត។ ការថយចុះនូវការបដិសេធមិនទទួលពាក្យបណ្ដឹងក្នុងដំណើរការបោះឆ្នោត ជាពិសេសក្នុងយុទ្ធនាការឃោសនា។ ការប្រសើរឡើងនូវបច្ចេកទេសនិងការងាររដ្ឋបាល និងកំណើនយល់ដឹងអំពីសិទ្ធិអ្នកបោះឆ្នោតនិងលទ្ធិប្រជាធិបតេយ្យ។
ទន្ទឹមគ្នានោះដែររបាយការណ៍ក៏បានលាតត្រដាងអំពីបញ្ហាជាច្រើនដែលអង្គការនេះបានរកឃើញនៅក្នុងអំឡុងពេលបោះឆ្នោតកន្លងមកនេះ។ បញ្ហាទាំងនោះរួមមានអំពើហិង្សាមួយចំនួនកើតមាននៅប៉ុន្មានថ្ងៃមុនពេលបោះឆ្នោត ដូចជាការបាញ់សម្លាប់លោក ឃឹម សម្បូរណ៍ និពន្ធនាយកកាសែតមនសិការខ្មែរ និងកូនប្រុសរបស់លោក។ ការគំរាមកំហែងប៉ះពាល់ដល់សិទ្ធិអ្នកនយោបាយនិងសេរីភាពក្នុងការសម្ដែងមតិ។ អ្នកបោះឆ្នោតទទួលការគាបសង្កត់ដែលនាំឲ្យបាត់បង់ការជ្រើសរើសដោយឆន្ទៈ។ ប្រជាពលរដ្ឋនៅគ្រប់ស្រទាប់វណ្ណៈដែលមានសិទ្ធិបោះឆ្នោតភ័យខ្លាចនូវការសងសឹកពីថ្នាក់ដឹកនាំទាំងឡាយដែលមានលទ្ធភាពប្រើអំណាចរបស់ខ្លួនគាបសង្កត់ធ្វើឲ្យខូចខាតផលប្រយោជន៍ផ្ទាល់ខ្លួននិងជីវភាពគ្រួសាររបស់ពួកគេ។
របាយការណ៍នេះក៏បានបញ្ជាក់ដែរថា ទាក់ទងទៅនឹងបញ្ហាមួយចំនួនការបោះឆ្នោតឆ្នាំ២០០៨កន្លងទៅថ្មីៗនេះមានលក្ខណៈអាក្រក់ជាងការបោះឆ្នោតឆ្នាំ២០០៣ ក្នុងនោះរួមមាន មន្រ្តីរាជការស៊ីវិល មន្រ្តីអាជ្ញាធររបស់រដ្ឋ កងកម្លាំងប្រដាប់អាវុធ បានចូលរួមយ៉ាងសកម្មក្នុងការឃោសនារកសំឡេងឆ្នោតដើម្បីគៀរគររកការគាំទ្រដល់គណបក្សប្រជាជន។ អ្នកបោះឆ្នោតជួបប្រទះឧបសគ្គជាច្រើនជាងមុនក្នុងដំណើរការចុះឈ្មោះបោះឆ្នោត ក្នុងការលាងសម្អាតបញ្ជីឈ្មោះ និងនៅក្នុងថ្ងៃបោះឆ្នោតដែលមនុស្សជាច្រើនរកឈ្មោះរបស់ខ្លួនមិនឃើញ។ ភាពមិនប្រក្រតីក្នុងការចេញប័ណ្ណទម្រង់១០១៨ និងបញ្ហាជុំវិញការចុះបញ្ជីឈ្មោះបេក្ខជនឈរឈ្មោះបោះឆ្នោតផងដែរ។
ផ្អែកតាមលទ្ធផលរកឃើញនេះអង្គការសង្កេតការណ៍បោះឆ្នោតខុមហ្រ្វែលបានបញ្ជាក់ថា ដំណើរវិវឌ្ឍន៍ឆ្ពោះទៅរកលទ្ធិប្រជាធិបតេយ្យនៅកម្ពុជាគឺស្ថិតនៅក្នុងគ្រោះថ្នាក់នៅឡើយ៕