កម្មករជីកដីកប់ ឬខួងរណ្ដៅដីសំរាប់កប់បណ្ដាញខ្សែភ្លើងក្រោមដីឲ្យក្រុមហ៊ុន វឌ្ឍនៈ ខេបភីថល របស់លោកឧកញ៉ា សំ អាង ជាង ១០០នាក់ បានអះអាងថា ក្រុមហ៊ុន វឌ្ឍនៈ មិនបើកប្រាក់ខែជូនកម្មករជាង ៤ខែ នាំឲ្យពួកគេគ្មានប្រាក់ទៅចូលរួមបុណ្យភ្ជុំបិណ្ឌនៅស្រុកកំណើតទេឆ្នាំនេះ។
កម្មករបានស្នើឲ្យក្រសួង ឬស្ថាប័នជំនាញពាក់ព័ន្ធនៃរាជរដ្ឋាភិបាល ជួយរកយុត្តិធម៌ និងអន្តរាគមន៍ទៅក្រុមហ៊ុន វឌ្ឍនៈ ឲ្យបើកប្រាក់ខែជាញើសឈាមរបស់ពួកគេឲ្យបានឆាប់ បើមិនដូច្នេះទេ ក្រុមកម្មករនឹងប្រមូលផ្តុំគ្នាធ្វើបាតុកម្មពីមុខក្រុមហ៊ុន វឌ្ឍនៈ ក្នុងប៉ុន្មានថ្ងៃទៀតនេះ។
ក្រុមហ៊ុន វឌ្ឍនៈ ខេបភីថល ជាក្រុមហ៊ុនដែលកំពុងសាងសង់សំណង់មានកម្ពស់ ៣៨ជាន់ មានទីតាំងទល់មុខស្ថានីយរថភ្លើងក្នុងសង្កាត់ស្រះចក រាជធានីភ្នំពេញ។
លោក ស្រៀង ទ្រី ជាតំណាងឲ្យកម្មករជីកដីកប់ខ្សែភ្លើងក្រោមដីឲ្យក្រុមហ៊ុន វឌ្ឍនៈ បានឲ្យដឹងថា ក្រុមហ៊ុន វឌ្ឍនៈ នៅជំពាក់ប្រាក់ខែកម្មកររបស់ខ្លួនរាប់ម៉ឺនដុល្លារមិនទាន់សង។
លោកស្នើឲ្យលោកឧកញ៉ា សំ អាង អគ្គនាយកក្រុមហ៊ុន វឌ្ឍនៈ ខេបភីថល បើកប្រាក់ខែជូនកម្មករឲ្យបានគ្រប់ចំនួន ដើម្បីបញ្ចៀសបាតុកម្មកើតឡើងនៅថ្ងៃអនាគត។
លោក ស្រៀង ទ្រី៖ «ភ្ជុំហើយខ្ញុំប្រុងដាក់កម្លាំងជីករើខ្សែ។ ការងារខ្ញុំហើយតាំងពីថ្ងៃទី៣០ ខែឧសភា មកម្ល៉េះ។ ខ្ញុំធ្វើហើយអត់បើកលុយឲ្យខ្ញុំ។ ក្រុមហ៊ុន វឌ្ឍនៈ មុនដំបូងគាត់ថា ឲ្យតែដាក់ភ្លើងហើយគាត់បើកលុយឲ្យហើយ។ ប៉ុន្តែដល់ពេលខ្ញុំដាក់ភ្លើងហើយមកដល់ឥឡូវហ្នឹង ជិត ១សប្តាហ៍ហើយ គាត់អត់ព្រមបើកលុយឲ្យ»។
លោកថាសព្វថ្ងៃនេះកម្មករមានពេលខ្លះដាច់បាយក្រហាយទឹក ដោយសារការទន្ទឹងរង់ចាំប្រាក់ខែ។
ដូចគ្នាដែរ លោក ចន្ទ គឹមលន ប្រធានកម្មករជាង ១០០នាក់ បានឲ្យដឹងដែរថា ការដែលក្រុមហ៊ុន វឌ្ឍនៈ មិនបើកប្រាក់ខែជាង ៤ខែមកនេះ នាំឲ្យក្រុមកម្មករខឹងសម្បា៖ «មកទល់ពេលហ្នឹងជិត ៥ខែហើយ គ្រាន់តែការងារធ្វើហើយ។ ចាំតែលុយ។ ខ្ញុំធ្វើចេញពីអនុស្ថានីយអគ្គិសនីទី២ ក្បាលថ្នល់ មកអាគារ ៣៨ជាន់ ហើយចេញពីអាគារ ៣៨ជាន់ទៅអនុស្ថានីយទី២ អគ្គិសនី ផ្សារតូច»។
កម្មករបានឲ្យដឹងថា ដើមហេតុនាំឲ្យក្រុមហ៊ុន វឌ្ឍនៈ មិនបើកប្រាក់ខែជូនពួកគេ ដោយសារក្រុមហ៊ុននេះមានទំនាស់ផលប្រយោជន៍ជាមួយក្រុមហ៊ុនកាណាឌីយ៉ា (Canadia) ដែលប្រើរណ្ដៅតភ្ជាប់ខ្សែភ្លើងក្រោមដីរួមគ្នាជាមួយក្រុមហ៊ុន វឌ្ឍនៈ តាមការចង្អុលបង្ហាញរបស់អាជ្ញាធរសាលារាជធានីភ្នំពេញ។
សំណើខួងកាត់ផ្លូវមួយចំនួនតាមផ្លូវព្រះមុនីវង្ស ពីអនុស្ថានីយទី១ ផ្សារតូច និងអនុស្ថានីយទី២ ក្បាលថ្នល់ មកទីតាំងមជ្ឈមណ្ឌលពាណិជ្ជកម្ម វឌ្ឍនៈ ខេបភីថល ធ្វើឡើងតាមសំណើរបស់ លោក កែវ រតនៈ ប្រតិភូរាជរដ្ឋាភិបាលទទួលបន្ទុកអគ្គនាយកអគ្គិសនីកម្ពុជា។
តំណាងកម្មករឲ្យដឹងថា លោក កែវ រតនៈ គឺជាអាជ្ញាកណ្ដាលជុំវិញទំនាស់ជីកខួងចិញ្ចើមផ្លូវព្រះមុនីវង្ស រវាងក្រុមហ៊ុន វឌ្ឍនៈ និងក្រុមហ៊ុន កាណាឌីយ៉ា ហើយជាមនុស្សអាចសម្របសម្រួលឲ្យក្រុមហ៊ុន វឌ្ឍនៈ បើកប្រាក់ខែជំពាក់ជូនពួកគេ។
វិទ្យុអាស៊ីសេរី មិនអាចទាក់ទងលោកឧកញ៉ា សំ អាង អគ្គនាយកក្រុមហ៊ុន វឌ្ឍនៈ និងលោក កែវ រតនៈ អគ្គនាយកអគ្គិសនីកម្ពុជា ដើម្បីបំភ្លឺជុំវិញករណីក្រុមហ៊ុន វឌ្ឍនៈ មិនបើកប្រាក់បៀវត្សជូនកម្មករបានទេតាមទូរស័ព្ទ នៅថ្ងៃទី១៦ ខែតុលា។ ប៉ុន្តែលោក ប្រាក់ ស៊ីដេត ប្រធានរដ្ឋបាលក្រុមហ៊ុន វឌ្ឍនៈ បានថ្លែងថា ក្រុមហ៊ុនខ្លួនបានបើកប្រាក់គ្រប់ចំនួនជូនកម្មករតាមរយៈក្រុមហ៊ុនម៉ៅការរួចហើយ។
លោក ប្រាក់ ស៊ីដេត៖ «ខ្ញុំអត់មានជំពាក់លុយអ្នកម៉ៅការទេ គឺបើកលុយឲ្យទៅអ្នកម៉ៅការអស់ហើយ ខ្ញុំមានឯកសារទទួលលុយពីអ្នកទទួលការងារពីខាងខ្ញុំទៅ។ អ៊ីចឹងខ្ញុំត្រូវការរកមុខអាណាគេដែលប្រាប់ថា ក្រុមហ៊ុនជំពាក់លុយ»។
យ៉ាងនេះក្តី អ្នកម៉ៅការជីកខួងរណ្ដៅដីភ្ជាប់បណ្ដាញខ្សែភ្លើង និងកម្មករ បានអះអាងថា ក្រុមហ៊ុន វឌ្ឍនៈ ទើបបើកថ្លៃឈ្នួលជូនពួកគេបានតែ ៧០ភាគរយទេ គឺនៅខ្វះ ៣០ភាគរយទៀតមិនទាន់ផ្ដល់ជូន។
ទាក់ទិនបញ្ហានេះ កំណត់ហេតុប្រជុំរបស់សាលារាជធានីភ្នំពេញ ចុះថ្ងៃទី៦ ខែកញ្ញា ឆ្នាំ២០១១ ស្តីពីសំណើខួងកាត់ផ្លូវ បានសង្កត់ធ្ងន់ឲ្យអគ្គិសនីកម្ពុជា ទទួលខុសត្រូវរាល់ការខូចខាតជាមួយក្រុមហ៊ុន ឬអង្គភាពផ្សេងៗ នៅពេលដំណើរការខួងចិញ្ចើមផ្លូវ ព្រោះអគ្គិសនីកម្ពុជា ជាអ្នកចេញមុខស្នើសុំបើសិនមានក្រុមហ៊ុនផ្សេងចង់ដាក់ខ្សែបណ្ដាញរបស់ខ្លួនចូលក្រោមដីដែរនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។