ប្រជាពលរដ្ឋមួយរូបនៅភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ លោក ឆេង ម៉េត បានមានប្រសាសន៍ថា លោកបានទិញដីមួយចំនួននៅភូមិស្រែតាកោរ ដែលស្ថិតក្នុងឃុំប្រាសាទដែរ អស់រយៈពេលជាច្រើនឆ្នាំកន្លងទៅហើយ ស្រាប់តែពេលថ្មីៗនេះ ក៏មានការកំណត់ឲ្យបង់ប្រាក់ពីសំណាក់ក្រុមមន្ត្រីដែលចុះវាស់វែងដីធ្លីនៅទីនោះ ហើយហេតុការណ៍នេះ បានធ្វើឲ្យលោកមានមន្ទិល។
លោក ឆេង ម៉េត មានប្រសាសន៍ដូច្នេះ ៖ «នៅតាមការិយាល័យដែលធ្វើប័ណ្ណនីមួយៗសុទ្ធតែដាក់អក្សរមិនឲ្យយកលុយ ប៉ុន្តែដល់ទៅក្រោយមកទៀតយើងឮៗទៅ ចេះតែគាបលុយច្រើនឡើងៗ។ ៣៥ដុល្លារវាច្រើនពេក បើបន្ធូរបន្ថយពីហ្នឹងមក ត្រឹម១ម៉ឺនក្ដី ក៏ចេះតែបង់ទៅ ដល់ច្រើនហួសពេកគ្នាប្រជាជនរកលុយឯណាបង់បាន»។
ប្រជាពលរដ្ឋដែលរស់នៅក្នុងភូមិឃុំប្រាសាទមួយរូបទៀត គឺលោក សុខា បានត្អូញត្អែរថា ៣៥ដុល្លារជាចំនួនដ៏ច្រើនសម្រាប់ប្រជាពលរដ្ឋដូចជារូបលោក ហើយលោកក៏មានចម្ងល់ខាងផ្លូវច្បាប់ទាក់ទិននឹងបញ្ហានេះដែរ។
លោក សុខា បានត្អូញដូច្នេះថា ៖ «គេនិយាយថា ដីប៉ុណ្ណាក៏ដោយត្រូវតែ៣៥ដុល្លារ ហើយក្រោយមកប្រជាពលរដ្ឋគាត់បានសុំថា ដីមួយប្លង់អាចត្រឹម៥-៦ម៉ឺនរៀលបានទេ? គេថាអត់បានទេ។ បើមិនធ្វើទេ គេគំរាមកំហែងថា បើសិនជាឡើងទៅខេត្តប្រហែលជាអាចអស់ច្រើនជាងហ្នឹង»។
ចំណែកឯអ្នកស្រី អ៊ុំ ថា រស់នៅភូមិស៊ីវត្ថា ឃុំប្រាសាទ បានអះអាងថា អ្នកស្រីមានបីបួនប្លង់តូចៗ នៅឃុំស្រែតាកោរ ដែលអ្នកស្រីទិញតាំងពីសម័យរដ្ឋកម្ពុជា ក្នុងនោះអ្នកស្រីបានបង់ប្រាក់ឲ្យមន្រ្តីចំនួន១៥ម៉ឺនរៀលសម្រាប់ដី២ប្លង់កាលពីពេលកន្លងទៅ តែអ្នកស្រីមិនមានលទ្ធភាពបង់ប្រាក់ឲ្យមន្រ្តីសម្រាប់ដីពីរប្លង់ទៀតនោះទេ។
អ្នកស្រី អ៊ុំ ថា បានអះអាងដូច្នេះ ៖ «បើខ្ញុំមិនបង់គេបញ្ជូនទៅលើទៀត ហើយខ្ញុំអត់លុយ លក់អីៗអស់ហើយ ចងការគេ លក់អង្ករលក់អី»។
មេឃុំប្រាសាទ លោក ឡាក់ ឈិន បានថ្លែងថា លោកគ្រាន់តែបានដឹងតាមរយប្រជាពលរដ្ឋអំពីការដែលក្រុមមន្ត្រីតម្រូវឲ្យប្រជាពលរដ្ឋបង់ប្រាក់ដើម្បីទទួលបានប័ណ្ណកម្មសិទ្ធិនោះ ហើយលោកបានបន្ថែមថា ការទិញលក់ដីមានបានកើនឡើងនៅភូមិស្រែតាកោរ ដោយហេតុថា នៅទីនោះជាតំបន់ប្រព័ន្ធធារាសាស្ត្រនៃគម្រោងស្ទឹងជីនិត ៖ «ចាំមើលជាក់ស្ដែងនឹងចុះទៅនៅថ្ងៃចប់អកអំបុកនេះ»។
អភិបាលខេត្តកំពង់ធំ លោក ឈន់ ឈាន់ បានមានប្រសាសន៍ថា លោកមិនទាន់បានជ្រាបអំពីបញ្ហាដែលថា មន្ត្រីសុរិយោដីខេត្តកំណត់ឲ្យប្រជាពលរដ្ឋបង់ប្រាក់ចំនួន៣៥ដុល្លារសម្រាប់ដីមួយប្លង់ៗជាថ្នូរនឹងការទទួលបាននូវប័ណ្ណកម្មសិទ្ធនេះនៅឡើយទេ ហើយលោកថា នឹងធ្វើការស្រាវជ្រាវចំពោះរឿងនេះ។
លោកអភិបាលខេត្តបានបន្តថា វាជាការធ្ងន់ធ្ងរពេកហើយប្រសិនបើមន្ត្រីសុរិយោដីបានកំណត់់ទារប្រាក់ពីប្រជាពលរដ្ឋចំនួន៣៥ដុល្លារ ដូចការដែលប្រជាពលរដ្ឋអះអាងមែននោះ៕