ប្រធានធម្មការនិងសាសនារងការចោទថាប្រព្រឹត្តអំពើពុករលួយនៅតាកែវ

មន្ត្រីសង្ឃស្រុកសំរោង ខេត្តតាកែវ ចោទប្រធានធម្មការស្រុកថា ប្រព្រឹត្តអំពើពុករលួយ ដោយឲ្យព្រះសង្ឃសូកប៉ាន់ ដើម្បីបានតំណែងជាអនុគណស្រុក និងបានរៃអង្គាសលុយពីព្រះសង្ឃតាមវត្ត សម្រាប់ជាប្រយោជន៍ផ្ទាល់ខ្លួន។

ដោយ វិជ័យ អានន្ទ
2012-08-02

h080212cp.mp3

មន្ត្រីសង្ឃស្រុកទាំងនោះ អះអាងថា ព្រះអង្គនឹងលាលែងឈប់ធ្វើជាមន្ត្រីសង្ឃបន្តទៀត បើសិនប្រធានធម្មការស្រុករូបនោះ នៅតែបន្តកាន់តំណែងទៅថ្ងៃមុខទៀត។

មន្ត្រីសង្ឃស្រុកសំរោង មួយចំនួន មានថេរដីការិះគន់ថា ការកាន់តំណែងរបស់លោក ជាម វ៉ា ជាប្រធានធម្មការ និងសាសនាស្រុក មិនបានធ្វើឲ្យព្រះពុទ្ធសាសនារីកចម្រើននោះឡើយ ផ្ទុយទៅវិញ លោកបានយកព្រះពុទ្ធសាសនាធ្វើជាឈ្នាន់ ដើម្បីរកស៊ី និងប្រព្រឹត្តអំពើពុករលួយវិស័យព្រះពុទ្ធសាសនាថែមទៀត។

ព្រះតេជព្រះគុណ ឈុន គឹមហោ មានថេរដីកា នៅថ្ងៃទី២ សីហា ថា ព្រះពុទ្ធសាសនាអាចនឹងត្រូវឱនថយ បើសិនមន្ត្រីធម្មការ និងសាសនា ដែលពុំសូវមានចំណេះដឹងផ្នែកសាសនា មកដឹកនាំព្រះពុទ្ធសាសនា និងប្រព្រឹត្តផ្ដេសផ្ដាសផ្ទុយនឹងច្បាប់រដ្ឋ និងច្បាប់សាសនានោះ។

ព្រះតេជព្រះគុណមានថេរដីកាបន្តថា ថ្មីៗនេះលោក ជាម វ៉ា បានយកត្រារបស់អនុគណទើបសឹក ទៅប្រគេនព្រះសង្ឃផ្សេងទៀត ហើយសុំឲ្យព្រះសង្ឃអង្គនោះ ឲ្យបង់លុយមួយចំនួនទៅខ្លួន ដើម្បីដូរយកត្រា និងតែងតាំងធ្វើជាអនុគណថ្មី ជំនួសអនុគណចាស់ដែលទើបសឹក តែត្រូវព្រះសង្ឃអង្គនោះបដិសេធ៖ «តែដោយឡែកស្រុកសំរោង ប្លែកខុសគេ ត្រាហ្នឹងគឺឲ្យធម្មការកាន់ដើរលក់ឲ្យព្រះសង្ឃ។ ព្រះសង្ឃអង្គណាចង់ឡើងអនុគណ ត្រូវឲ្យលុយគេអ៊ីចឹង។ ក្នុងស្រុកសំរោង ធ្វើការជាមួយគ្នា ឥឡូវហ្នឹង ព្រះសង្ឃនៅស្រុកសំរោង អត់ពេញចិត្តទេ»។

ដូចគ្នានេះ មន្ត្រីសង្ឃមួយអង្គទៀតសុំមិនឲ្យបញ្ចេញព្រះនាម មានថេរដីកាថា លោក ជាម វ៉ា តែងរៃអង្គាសលុយតាមវត្តនីមួយៗ យកដាក់ហោប៉ៅខ្លួនឯង ដោយប្រើរូបភាពថា ថ្នាក់លើឲ្យរៃអង្គាស ដើម្បីយកទៅឲ្យកាកបាទក្រហម និងកងទ័ព។

ឆ្លើយតបនឹងការលើកឡើងរបស់ព្រះសង្ឃនេះ លោក ជាម វ៉ា បដិសេធថា លោក មិនបានប្រព្រឹត្តដូចការចោទនោះឡើយ ព្រោះត្រានោះ លោកបានយកទៅប្រគេនព្រះមេគណខេត្តតាកែវ រួចហើយ៖ «អត់មាន អត់មានករណីនេះ មានត្រាឯណាយកទៅលក់ ហើយក៏អត់មានត្រាឯណាយកទៅលក់»។

ទាក់ទងនឹងករណីនេះដែរ មេគណខេត្តតាកែវ ព្រះតេជព្រះគុណ កែវ សាវ៉ន មានថេរដីកាថា ព្រះអង្គបានទទួលត្រានោះពីលោកប្រធានធម្មការស្រុកនោះរួចហើយ។ ចំណែករឿងរ៉ាវដែលថាលោកប្រធានការិយាល័យធម្មការស្រុក សុំឲ្យព្រះសង្ឃសូកប៉ាន់ដូរយកតំណែងនោះ ជារឿងពិតប្រាកដ ព្រោះព្រះអង្គបានទទួលរបាយការណ៍នោះពីមន្ត្រីសង្ឃស្រុក៖ «អារឿងហ្នឹង អ៊ីចឹង ព្រោះបើតាមរបាយការណ៍សាកសួរព្រះសង្ឃទៅ ឃើញអ៊ីចឹងមែន»។

ព្រះតេជព្រះគុណ ឈុន គឹមហោ មានថេរដីកាថា ការចោទប្រកាន់របស់មន្ត្រីសង្ឃស្រុកសំរោង មកលើប្រធានការិយាល័យធម្មការស្រុកនេះ កើតឡើងបន្ទាប់ពីអនុគណស្រុក លោក អ៊ុន សាវឿន បានលាចាកសិក្ខាបទ ហើយត្រាអនុគណនោះត្រូវប្រធានការិយាល័យធម្មការស្រុក យកទៅកាន់កាប់ និងយកត្រានោះប្រគេនព្រះសង្ឃមួយអង្គព្រះនាម អ៊ី សុខគា និងសុំឲ្យព្រះអង្គផ្ដល់លុយចំនួន ១.០០០ដុល្លារ ជាថ្នូរនឹងការដូរយកត្រា និងតំណែងអនុគណស្រុកសំរោង។ ប៉ុន្តែរឿងនេះ ត្រូវព្រះតេជព្រះគុណ អ៊ី សុខគា បដិសេធ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។