ពលរដ្ឋនាំគ្នាលើកទឹកចិត្តអ្នកភូមិដែលតុលាការកោះហៅនៅខេត្តកំពង់ឆ្នាំង

ប្រជាពលរដ្ឋប្រមាណ៥០នាក់ មកពីភូមិកោះក្អែក ឃុំកំពង់ហៅ ស្រុកកំពង់លែង ខេត្តកំពង់ឆ្នាំង បាននាំគ្នាធ្វើដំណើរមកកាន់សាលាដំបូងខេត្តកំពង់ឆ្នាំង ក្នុងបំណងលើកទឹកចិត្តអ្នកភូមិ៥នាក់ ដែលត្រូវបានតុលាការកោះហៅមកសាកសួរពីបទគំរាមកំហែងយកប្រាក់ និងបំផ្លិចបំផ្លាញទ្រព្យសម្បត្តិអ្នកដទៃ។

ដោយ មណ្ឌល កែវ
2012-08-24

h082412pb.mp3

២៤-សីហា-២០១២៖ អ្នកភូមិមកជួបជុំគ្នានៅការិយាល័យអ្នកតំណាងរាស្ត្រ សុំការជួយអន្តរាគមន៍មុននឹងចូលទៅតុលាការដើម្បីលើកទឹកចិត្តអ្នកភូមិដែលសាលាដំបូងខេត្តកំពង់ឆ្នាំង កោះហៅពីបទគំរាមកំហែងយកប្រាក់ និងបំផ្លិចបំផ្លាញទ្រព្យសម្បត្តិអ្នកដទៃ។

RFA/Mondul Keo

បុរសអ្នកភូមិកោះក្អែក ឈ្មោះ ឃឹម ម៉ៅ អាយុ៥០ឆ្នាំ គាត់បានឲ្យដឹងនៅព្រឹកថ្ងៃទី២៤ សីហា ថា ព្រះរាជអាជ្ញាអមសាលាដំបូងខេត្តកំពង់ឆ្នាំង បានកោះហៅអ្នកភូមិ៥នាក់ មកសាកសួរពីករណីដែលអ្នកភូមិបានដុតបំផ្លាញអួនរបស់អ្នកនេសាទជនជាតិវៀតណាម កាលពីថ្ងៃទី១០ ខែឧសភា កន្លងទៅ។ អ្នកភូមិរូបនេះបន្តថា ដោយបារម្ភខ្លាចមានការឃុំខ្លួនអ្នកភូមិទាំង៥នាក់នោះ ទើបប្រជាពលរដ្ឋក្នុងភូមិបាននាំគ្នាមកគាំទ្រអ្នកភូមិទាំង៥នាក់នោះ។

គាត់ថា ការដុតបំផ្លាញអួនខុសច្បាប់របស់អ្នកនេសាទវៀតណាម នេះ គឺអ្នកភូមិទាំងអស់ជាង២០០នាក់ រួមគ្នាធ្វើ មិនមែនមនុស្ស៥នាក់ ដែលតុលាការបានកោះហៅនេះ ធ្វើនោះទេ៖ «ប្រជាពលរដ្ឋខ្ញុំខឹងខ្លាំងណាស់ ព្រោះពួកវាអូសអួនដាច់បាត់មងប្រជាពលរដ្ឋខ្ញុំស្ទើររាល់យប់។ ពួកខ្ញុំមិនទៅចាប់បានហៅមេភូមិ និងសហគមន៍ឲ្យជួយ តែពួកគេអត់មកជួយទេ។ ដល់អ៊ីចឹង ពួកខ្ញុំក៏ចុះទៅចាប់អួនហ្នឹងមក»។

បុរសអ្នកភូមិកោះក្អែក ឈ្មោះ រៀ ជួន បានចោទប្រកាន់ថា អាជ្ញាធរបានឃុបឃិតជាមួយអ្នកនេសាទជនជាតិវៀតណាម ហើយបានអនុញ្ញាតឲ្យពួកនេះធ្វើការនេសាទ ដោយប្រើឧបករណ៍នេសាទខុសច្បាប់៖ «រាយការណ៍ឲ្យមេភូមិគេធ្វើមិនដឹងមិនឮ ព្រោះគេស៊ីលុយពួកអ្នកអូសអួន។ បានកម្លាំងពួកខ្ញុំចាប់យកឡើងមកលើគោក ហើយនាំគ្នាយាមមួយយប់ទល់ភ្លឺ អត់ឃើញរដ្ឋអំណាចណាមកទទួលយកទេ ដល់ម៉ោង៨ព្រឹក អ្នកភូមិក៏នាំគ្នាសម្រេចចិត្តដុតអួនហ្នឹងចោលតែម្ដងទៅ»។

កាលពីថ្ងៃទី១០ ឧសភា កន្លងទៅ ប្រជាពលរដ្ឋភូមិកោះក្អែក ឃុំកំពង់ហៅ ជិត១០០នាក់បាននាំគ្នាចាប់ទូកអូសអួនក្រឡាញឹក និងមានបណ្ដោយប្រវែង៨០០ម៉ែត្រ ដែលជាឧបករណ៍នេសាទខុសច្បាប់ពីអ្នកនេសាទជនជាតិវៀតណាម។ តែអ្នកភូមិមិនបានយកឧបករណ៍ដែលចាប់បាននេះ ទៅប្រគល់ឲ្យអាជ្ញាធរមានសមត្ថកិច្ចទេ ហើយបែរជានាំគ្នាដុតបំផ្លាញចោលទៅវិញ។

ព្រះរាជអាជ្ញាអមសាលាដំបូងខេត្តកំពង់ឆ្នាំង លោក ពេញ វិបុល មានប្រសាសន៍ថា ការកោះហៅអ្នកភូមិ៥នាក់មកសាកសួរនេះ គឺដើម្បីបញ្ជាក់ពីមូលហេតុដែលអ្នកភូមិសម្រេចចិត្តមិនប្រគល់វត្ថុតាងឲ្យអាជ្ញាធរ។ លោកថា តាមការស្រាវជ្រាវរបស់អាជ្ញាធរជំនាញរកឃើញថា អ្នកភូមិកោះក្អែក បានជំរិតទារប្រាក់ពីអ្នកនេសាទវៀតណាម ពុំបាន ក៏មានកំហឹងទើបដុតឧបករណ៍នេសាទគេចោល។ លោកថា ទង្វើរបស់អ្នកភូមិ គឺជាទង្វើខុសច្បាប់៖ «ពួកគាត់ចាប់អួនរបស់គេហើយ ទាមទារលុយពីពួកគេ ហើយដល់ទារមិនបានគាត់ក៏យកទូក និងអួនរបស់គេ២វង់ទៅដុតចោល។ គាត់ធ្វើបែបនេះ គឺខុសច្បាប់ហើយ ព្រោះបើគាត់ចាប់បានហើយគាត់យកទៅប្រគល់ឲ្យអាជ្ញាធរជំនាញ ឬមន្ត្រីយុត្តិធម៌ដែលនៅជិតគាត់បំផុតនោះ ទើបត្រូវ។ ហេតុនេះហើយ ទើបយើងហៅគាត់មកសួរនាំ»។

មន្ត្រីសម្របសម្រួលសមាគមអាដហុក ការពារសិទ្ធិមនុស្សប្រចាំខេត្តកំពង់ឆ្នាំង លោក សំ ច័ន្ទគា មានប្រសាសន៍ថា លោកពុំគាំទ្រចំពោះអំពើហិង្សាដែលប្រជាពលរដ្ឋភូមិកោះក្អែក បានធ្វើនោះទេ។ យ៉ាងណាក៏ដោយ លោកសំណូមពរឲ្យតុលាការបន្ធូរបន្ថយចំពោះកំហុសឆ្គងរបស់ប្រជាពលរដ្ឋ។ លោកថា ប្រជាពលរដ្ឋមានឆន្ទៈការពារធនធានធម្មជាតិ តែដោយខ្វះការយល់ដឹងផ្លូវច្បាប់ ទើបកើតមានជាកំហុសឆ្គងនេះឡើង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (4)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

ដុតអួនខុសច្បាប់របស់យួនចោលហ្នឹង ទើសក្បាលតុលាការអី បានជាដល់ថ្នាក់ចេញដីការ ឲ្យចូលខ្លួនបំភ្លឺ? ឬមួយអួននោះជាអួនរបស់បុគ្គល ពេញវិកល(ចរិក)?

Aug 26, 2012 02:50 AM

KHMER

ពី BOTHELL,WASHINGTON USA

Judge in Kampongchnang is working no good.The people do like that very best of their ideas.

Aug 25, 2012 12:31 AM

Vuth Lee

ពី Lowell, Massachusetts,U.S.A

Eventhough these five people bringing the illegal fishing equipments that they had siezed from those illegal Youn fishermen, this Hun Sen's judge is going to find another reason to charge these five Cambodians anyway. Why? Because as all Cambodians had known, the Cambodia's courts are the effective conduits for Youn or Hun Sen using to oppress the Cambodian dissidents, Human rights activists, and fish conservationist etc. I think this judge must arrest these Youn, and should not have these five Cambodians summoned to his court in the first place. Why? These people tried to contact the local authority, but failed, so probably they are so frustrated with the way the local authority handling the case during that night, unfortunately, they decided to take the laws in their own hands. This mean, these five people were losing their trust with the local authority and the Puppet Cambodian courts.

Aug 24, 2012 06:09 PM

for khmer, no Hun Sen

ពេញ វិបុល he is Vietnam's brain, he lives in Cambodia, and he is a very bad man, and he is always kind of veitnamin half.
Giving thanks very much, you are helping Hun Sen kill their own citizens, thanks again, point is no longer Khmer.
thanks to the Cambodian authorities. you're perfect for pirates.

Aug 24, 2012 10:49 AM