បក្សកាន់អំណាចកំពុងអូសទាញយុវជនឲ្យគាំទ្របក្សខ្លួន
ko.mp3
ទោះបីជាយ៉ាងនេះក្ដី អ្នកវិភាគអះអាងថា គណបក្សនយោបាយទាំងនោះ គួរតែអភិវឌ្ឍធនធានយុវជន និងបង្កើតការងារដល់យុវជនឲ្យបានច្រើនដើម្បីរួមចំណែកក្នុងការអភិវឌ្ឍប្រទេសជាតិវិញ ជាជាងការផ្ដល់ផលប្រយោជន៍រយៈពេលខ្លីដល់ពួកគេ។
យុវជនកម្ពុជាមួយចំនួនកំពុងត្រូវបានគណបក្សនយោបាយ យកចិត្តទុកដាក់រកការងារឲ្យធ្វើ។ ក៏ប៉ុន្តែបញ្ហាទាំងនេះ អ្នកវិភាគថា មិនបានផ្ដល់ប្រយោជន៍ពិតប្រាកដនោះទេ ផ្ទុយទៅវិញក្រុមយុវជន កំពុងត្រូវបានគេប្រើប្រាស់យកជាឈ្នាន់ សម្រាប់ចំណេញរឿងនយោបាយរបស់គេប៉ុណ្ណោះ។
អ្នកស្រាវជ្រាវការអភិវឌ្ឍសង្គម លោក កែម ឡី បានចាត់ទុកថា យុវជនគឺជាធនធានមនុស្សដ៏សំខាន់មួយដែលគ្រប់គណបក្សនយោបាយគេត្រូវតែយកចិត្តទុកដាក់។ លោកថា ការផ្ដល់ផលប្រយោជន៍រយៈពេលខ្លី មិនអាចមានឥទ្ធិពលទៅដល់សេចក្ដីសម្រេចចិត្តរបស់យុវជនជាទូទៅនោះទេ ដោយសារយុវជនបច្ចុប្បន្នយ៉ាងហោចណាស់ ៦ភាគរយ នៃប្រជាជនទូទៅ បានរៀនដល់ថ្នាក់មហាវិទ្យាល័យ ហើយយុវជនជាង ២០ភាគរយ អាចរៀនដល់ថ្នាក់ទី១២ដែរ។
លោក កែម ឡី បន្ត៖ «ហើយយុវជនកាលណាគាត់រៀនបានខ្ពស់ គាត់មានការពិចារណាច្រើនអ៊ីចឹងទាល់តែយើងរៀបចំទិដ្ឋភាពសង្គមហ្នឹងឲ្យបានល្អជាងនេះ។ ឧទាហរណ៍ថា ស្ថានភាពពុករលួយ ស្ថានភាពអប្បកិរិយាអ្នកផ្ដល់សេវារដ្ឋហ្នឹង ឬមួយក៏ស្ថានភាពការគ្រប់គ្រងព្រៃឈើ គ្រប់គ្រងបរិស្ថាន បើសិនជាយើងធ្វើរូបភាពហ្នឹងឲ្យបានល្អ។ ខ្ញុំគិតថានឹងទាក់ទាញយុវជនហើយមិនបាច់ខំប្រឹងប្រែងឃោសនាឲ្យយុវជនឲ្យយុវជនគាំទ្រ ពីព្រោះយុវជនទាំងអស់នេះ ដែលខ្ញុំជួបច្រើនលើកច្រើនសារ ១០០ ទៅ ២០០នាក់ជារៀងរាល់សប្ដាហ៍ហ្នឹង គាត់មានការពិចារណាខ្ពស់ណាស់ កាលណាយើងធ្វើបានល្អគឺហ្នឹងទទួលផលហើយ។ ហើយកាលណាយើងធ្វើមិនបានល្អទេ របៀបជាការស្វែងរកការគាំទ្ររបៀបជាបរិយាកាសនយោបាយអ៊ីចឹង គឺខ្ញុំគិតថាមិនទទួលបានផលល្អទេ»។
ការលើកឡើងបែបនេះ នៅបន្ទាប់ពីមេដឹកនាំជាន់ខ្ពស់គណបក្សប្រជាជនកម្ពុជា កាលពីថ្ងៃទី២៦ ខែមិថុនា បានប្រមូលយុវជនស្ម័គ្រចិត្តឲ្យចុះវាស់វែងដីធ្លីផ្ដល់កម្មសិទ្ធិជូនប្រជាពលរដ្ឋនៅតាមបណ្ដាខេត្ត ដែលដឹកនាំដោយលោក ហ៊ុន ម៉ានិត ជាកូនប្រុសបង្កើតលោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា បានថ្លែងកាលពីថ្ងៃទី២៦ មិថុនា ក្នុងពិធីជួបសំណេះសំណាលជាមួយយុវជនស្ម័គ្រចិត្តនៅមជ្ឈមណ្ឌលកោះពេជ្រថា យុទ្ធនាការពេលនេះ គឺជាការអនុវត្តនយោបាយចាស់សកម្មភាពថ្មីលើវិស័យដីធ្លី។ លោកបានថ្លែងអំណរគុណចំពោះក្រុមគ្រួសារ និងយុវជនស្ម័គ្រចិត្តក្នុងការងារចុះវាស់វែងដីធ្លីនេះ ដោយផ្ដល់ថវិកាលើទឹកចិត្ត និងសម្ភារៈប្រើប្រាស់ជាច្រើនសម្រាប់យុទ្ធនាការនេះ។
លោក ហ៊ុន សែន៖ «បើទោះខ្ញុំត្រូវលក់ផ្ទះនៅវិមានឯករាជ្យ ក៏ខ្ញុំត្រូវតែលក់ដែរដើម្បីឲ្យក្មួយៗ ខ្ញុំអត់ប្រើប្រាស់ថវិកាជាតិដើម្បីចិញ្ចឹមក្មួយៗក្នុងបេសកកម្មនេះទេ ខ្ញុំទទួលខុសត្រូវហើយខ្ញុំបានប្ដូរផ្ដាច់ហើយផ្ទះវិមានឯករាជ្យប្រហែលជាបានថ្លៃគួរសម ខ្ញុំសុខចិត្តខាននៅហ្នឹងក៏បានដែរ។ ខ្ញុំធ្វើទាល់តែបាននៅលើរឿងនេះឲ្យដឹងថា នាយករដ្ឋមន្ត្រីលក់ផ្ទះដើម្បីហ្នឹងទៅធ្វើកម្មសិទ្ធិបញ្ជូននិស្សិត ចិញ្ចឹមនិស្សិតឲ្យទៅធ្វើបេសកកម្មហើយថ្ងៃនេះក្មួយៗ ពូជូនម្នាក់ ១០០ដុល្លារសម្រាប់ ១០០ដុល្លារវាអត់ច្រើនទេក្មួយអើយ ប៉ុន្តែពូត្រូវចំណាយ ១១ម៉ឺនដុល្លារថ្ងៃហ្នឹងនេះ»។
ប៉ុន្តែអ្នកវិភាគសង្គមបានចាត់ទុកថា សកម្មភាពរបស់រដ្ឋាភិបាលនេះ គឺកំពុងប្រើប្រាស់យុវជនដើម្បីទាក់ទាញផ្នែកនយោបាយសុទ្ធសាធ ពុំមែនក្នុងន័យបុព្វហេតុជាតិនោះទេ។
លោក កែម ឡី បានបញ្ជាក់ទៀតថា ការជ្រើសរើសយុវជនស្ម័គ្រចិត្តនេះ គឺការទាក់ទាញយុវជនផ្នែកនយោបាយ ច្រើនជាងសកម្មភាពពិតប្រាកដសម្រាប់ការងារប្រទេសជាតិ ដែលគេឃើញថា មានផលប្រយោជន៍ដល់ពួកគេតែមួយភ្លែតប៉ុណ្ណោះ។
លោក កែម ឡី៖ «បើសិនជាគាត់ចង់ធ្វើរបៀបនេះគឺយើងមានសាកលវិទ្យាល័យច្រើនអ្នកណាដែលរៀនខាងសុរិយោដី អ្នកណាដែលរៀនខាងភូមិវិទ្យា អ្នកណាដែលរៀនខាងមាត្រដ្ឋានភូមិវិទ្យា។ ដូច្នេះគាត់អាចបញ្ចូលសិស្សនិស្សិតដែលរៀននៅមហាវិទ្យាល័យ ហើយចំជំនាញរបស់គាត់ឲ្យគាត់មកធ្វើកម្មសិក្សាហ្នឹងទៅហើយត្រឡប់មកវិញគាត់អាចបំពេញតួនាទីធ្វើលំហាត់នៅតាមសាលាហ្នឹងគាត់ចំណេញជាង។ ឥឡូវបើសិនជាគ្រាន់តែផ្ដល់ថវិកា ឬក៏មួយលើកទឹកចិត្តគាត់របៀបហ្នឹង បើសិនជាគាត់រៀនខាងគណនេយ្យវិញ ហើយរៀនខាងនយោបាយការបរទេសវិញ រៀនខាងច្បាប់ទៅវិញ តើបទពិសោធន៍អីដែលគ្រាន់តែចុះវាស់ដីបានមកចំណេញដល់ការរៀនសូត្រ? ហើយនៅពេលគាត់ចេញទៅធ្វើការវិញនោះ តើបទពិសោធន៍សម្រាប់ទាក់ទាញសម្រាប់ជួយពង្រឹងការងារអត់? កម្មសិក្សាគឺល្អហើយការធ្វើសេចក្ដីសម្រេចចិត្តនេះល្អហើយ ក៏ប៉ុន្តែធ្វើយ៉ាងម៉េចឲ្យយុវជនភ្ជាប់ការរៀនសូត្ររបស់គាត់ជំនាញរបស់គាត់ទៅក្នុងកម្មសិក្សានេះ។ ប្រសិនបើមិនអ៊ីចឹងទេគ្រាន់តែជាទាក់ទាញផ្នែកនយោបាយច្រើនជាង»។
ក្រុមយុវជនស្ម័គ្រចិត្តមានគ្នា ១.១០០នាក់ ដែលកំពុងធ្វើសកម្មភាពចុះវាស់វែងដីជូនពលរដ្ឋ គឺមកពីសមាគមសិស្សនិស្សិតបញ្ញវន្តក្មេងវត្ត សហព័ន្ធនិស្សិតបញ្ញវន្តប្រជាធិបតេយ្យ សាកលវិទ្យាល័យភូមិន្ទចម្ការដូង វិទ្យាស្ថានបច្ចេកវិទ្យា សាកលវិទ្យាល័យភូមិន្ទនីតិសាស្ត្រ សាកលវិទ្យាល័យភូមិន្ទភ្នំពេញ យុវជនស្ម័គ្រចិត្តពីក្រសួងរៀបចំដែនដីនគររូបនីយកម្ម និងសំណង់។
ពាក់ព័ន្ធបញ្ហានេះ ប្រធានផ្នែកសិទ្ធិមនុស្ស និងលទ្ធិប្រជាធិបតេយ្យនៃសមាគមយុវជនខ្មែរហៅកាត់ថា (KYA) លោក សេង ឫទ្ធី ថ្លែងថា ពិតប្រាកដណាស់ យុវជនទាំងនោះនឹងទទួលបានចំណេះដឹងនិងបទពិសោធន៍ដ៏តិចតួចពីការងាររយៈពេលខ្លីនេះ។ លោកបន្តថា យុវជនដែលមានអាយុពី ១៨ ទៅដល់ ៣០ឆ្នាំ ប្រមាណជាង ៣លាននាក់ គឺ ៣៧% នៃអ្នកបោះឆ្នោតជាង ៩លាននាក់ មានឈ្មោះនៅក្នុងបញ្ជីបោះឆ្នោតក្នុងឆ្នាំ២០១២។ ដូច្នេះចំនួនយុវជនគ្រប់អាយុបោះឆ្នោតដ៏ច្រើននេះ គឺជាកត្តាជំរុញឲ្យបក្សនយោបាយងាកមកចាប់អារម្មណ៍លើយុវជន។
លោក សេង ឫទ្ធី៖ «សំខាន់ការងារនេះមិនមែនជាការងាររបស់បុគ្គលទេ ជាការងារជាតិដែលត្រូវធ្វើកិច្ចការជូនប្រជាពលរដ្ឋ គឺជាកិច្ចការងារជាតិ ហើយលោកនាយករដ្ឋមន្ត្រីគាត់មានប្រសាសន៍អ៊ីចឹង។ ខ្ញុំថា រឿងហ្នឹងដូចជាយកយុវជនជាខែលយកប្រជាប្រិយភាពនៅក្នុងគណបក្សនយោបាយ ពីព្រោះការងារនេះខ្ញុំគិតថា មិនជារឿងរបស់បុគ្គលទេ ជាការងាររបស់ជាតិតែម្ដង។ ហើយដល់គាត់ធ្វើអ៊ីចឹងខ្ញុំមិនគាំទ្រទេចំពោះទស្សនៈរបស់ខ្ញុំ ព្រោះត្រូវឲ្យស្ថាប័នជាតិជាអ្នករៀបចំជាការប្រសើរ»។
ចំណែកអ្នកនាំពាក្យគណបក្ស សម រង្ស៊ី លោក យឹម សុវណ្ណ មានទស្សនៈថា គណបក្សកាន់អំណាចអាចធ្វើបំភាន់ភ្នែកប្រជាពលរដ្ឋតាមរយៈការងារដែលរដ្ឋាភិបាលត្រូវធ្វើ ដើម្បីជាសមិទ្ធផលរបស់បក្សទៅវិញ៖ «ជាការពិតពីការបោះឆ្នោតមួយទៅការបោះឆ្នោតមួយ បើសិនជាគណបក្សណាដែលមានកម្លាំងគាំទ្រពីយុវជនច្រើន គឺគណបក្សហ្នឹងនឹងទទួលការឈ្នះឆ្នោត ពីព្រោះកម្លាំងយុវជនអាចបោះឆ្នោតបានច្រើនដងខុសពីកម្លាំងយុវចាស់។ អ៊ីចឹងហើយមនុស្សម្នាក់ៗនាំគ្នាទាញយុវជន ទាញក្នុងផ្លូវល្អ ទាញតាមរយៈទិញទឹកចិត្ត តាមរយៈការផ្ដល់ការងារឲ្យគាត់ផ្ដល់អនាគតភ្លឺស្វាងឲ្យគាត់នោះ គឺជាការល្អ ក៏ប៉ុន្តែអ្នកខ្លះទៀតធ្វើប្រជាភិថុតិ បង្វក់យុវជនឲ្យសប្បាយភ្លើតភ្លើនតែរយៈពេលខ្លី ហើយធ្វើឲ្យឈ្លក់វង្វេងនឹងផលប្រយោជន៍បន្តិចបន្តួច។ ការទិញទឹកចិត្តបន្តិចបន្តួចមួយរយៈពេលខ្លីនៅរយៈពេលវែងគាត់នឹងជួបការលំបាកនេះជាបញ្ហាដែលយុវជនត្រូវគិត»។
អ្នកវិភាគបញ្ហាសង្គមបានបញ្ជាក់ថា ជាដំណោះស្រាយដើម្បីអូសទាញយុវជននោះ គឺមានតែផែនការអភិវឌ្ឍជាតិ ដូចជានឹងដោះស្រាយបញ្ហាជាតិ កំណែទម្រង់រដ្ឋបាលសាធារណៈ បញ្ហាអំពើពុករលួយ និងបង្ហាញពីយុទ្ធសាស្ត្រជាក់លាក់ក្នុងការជួយយុវជន តាំងពីថ្នាក់មូលដ្ឋានដល់ថ្នាក់កំពូល នោះទើបអាចទាក់ទាញយុវជនឲ្យងាកមកគាំទ្របក្សរបស់ខ្លួនបាន។
គោលការណ៍របស់បក្សកុម្មុយនិស្តត្រូវបានគេដឹងជាទូទៅថា យុវជនគឺជាធនធានដ៏សំខាន់របស់បក្ស មានន័យថា យុវជនជាសសរទ្រូងរបស់បក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ឆៃយ៉ា
ពី សៀមរាបបើជាមនុស្សរស់ក្នុងសង្គមនេះ គឺមិនខ្មាស់គេទេ។ សង្គមសព្វថ្ងៃសរបញ្ជាក់អោយឃើញពីអ្វីៗគ្រប់យ៉ាងហើយ។ ការហូរចូលនៃជនជាតិយួន បាត់បង់ដីធ្លី ភាពអយុត្តិធម៌ ទោះជាមិនទាន់ធ្លាក់លើខ្ញុំ តែខ្ញុំពិតជាមានការឈឺចាប់ណាស់ដែលបានឃើញ។ គ្រប់ជាតិសាសគឺចង់រស់ក្នុងសង្គមសម្បូរសប្បាយ យុត្តិធម៌ មានសុភមង្គល រឺអ្វីៗទាំងនេះបងចង់បានតែម្នាក់ឯងទេរឺ។
ខ្ញុំដឹងថាខ្ញុំនៅក្មេងខ្ចី(២២ឆ្នាំ)មិនដឹងពីនយោបាយអ្វីទេ តែខ្ញុំសុំនិយាយពីអ្វីៗដែរខ្ញុំបានឃើញប៉ុនោះ។
Jul 26, 2012 12:39 AM
Dara-
ពី Kampotអស់លោកអើយ តើនៅខ្មែរមានមនុស្សរបៀបអស់លោកដែលចាំតែជំទាស់នេះប៉ុន្មាននាក់ទៀត៕ អស់លោកចេះស្អីខ្លះ ? ប្រហែលអស់លោកមើលទៅមិនអាចប្រើយុវជនទាំងអស់នោះបានផង! អស់លោកចាំតែថាគេខុស នេះ ខុសនោះ។។ បើជាខ្ញុំវិញខ្មះគេស្លាប់ហើយ៕៕៕
Jul 14, 2012 05:21 AM
Quang Tran
ពី SaigonMy beloved Cambocian youth, please consider this " For the love money is at the root of all evil. And some people, craving money have wandered from the faith and pierced themselves with many sorrow." so please, think about a long term effect/result than what it is now and bear a cronic consequences. Also be awared of a temping outside;toxic inside bait from political deceptions or you will be absolutely painfully suffering with unpredictable regret. Your bright future is awaiting for you if you wisely make the choice a cursed or blessing.God's thruth is the best protection against Evil's lies.
Jul 14, 2012 04:21 AM
និម្មិត
ពី អ្នកស្រែឱ្យតែមានអ្នកបង្កើតការងារសម្រាប់ក្រុមយុវជន វាជាការល្អហើយកុំឱ្យតែបាតដៃទទេ ឬបានតែសម្តី បងប្អូន មិត្តភ័ក្រខាងណាក៏បានដែរឱ្យតែចេះបង្កើតការងារសម្រាប់ប្រជាជន/យុវជនខ្មែរ ខ្ញុំគាំទ្រទាំងអស់ យើងគួរនាំគ្នាផ្តល់ឱកាស ឬជួយបង្កើតការងារឱ្យបានច្រើន ជាជាងនាំគ្នាស្វែងរកការងារធ្វើ ឬធ្វើការទិះទាន
Jul 13, 2012 06:38 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
