ភ្លាមៗក្រោយពីកើតហេតុ អាជ្ញាធរសមត្ថកិច្ចក្នុងខេត្តនេះបានឃាត់ខ្លួនជនសង្ស័យ និងកសាងសំណុំរឿងបញ្ជូនទៅតុលាការខេត្ត។
ព្រះរាជអាជ្ញាអមតុលាការខេត្តកោះកុង បានចាប់ផ្ដើមសាកសួរសំណុំរឿងអំពើហិង្សាបង្កដោយជំនួយការផ្ទាល់លោកនាយករដ្ឋមន្ត្រី នៅថ្ងៃអង្គារ ទី២៤ ខែមេសា ឆ្នាំ២០១២។
ព្រះរាជអាជ្ញាខេត្តកោះកុង លោក តុប ឈុនហេង មានប្រសាសន៍ថា តុលាការកំពុងដំណើរការរឿងក្ដីនេះ៖ «ខ្ញុំកំពុងសាកសួរ បានហើយអ៊ីចឹង»។
ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន ឈ្មោះ ប៊ុន សុខា ជានាយរងសេនាធិការចម្រុះមានឋានន្តរស័ក្ដិផ្កាយពីរ និងអង្គរក្ស ៣នាក់ផ្សេងទៀត ត្រូវអាជ្ញាធរសមត្ថកិច្ចខេត្តកោះកុង កសាងសំណុំរឿងបញ្ជូនទៅតុលាការកាលពីថ្ងៃទី២៣ ខែមេសា ក្រោមបទចោទប្រកាន់បង្ករបួសស្នាម ដោយប្រើកាំភ្លើង ដំបងឆក់ និងខ្នោះដៃ វាយមនុស្ស ៤នាក់ ឲ្យរបួសកាលពីយប់ថ្ងៃអាទិត្យ។
ជនរងគ្រោះ ២នាក់ ក្នុងចំណោម ៤នាក់ បានដាក់ពាក្យបណ្ដឹង បន្ទាប់ពីបដិសេធការសម្របសម្រួលបញ្ចប់បញ្ហានេះជាថ្នូរនឹងការផ្ដល់ប្រាក់ចំនួន ១.៥០០ដុល្លារ។ ជនរងគ្រោះទាំង ២នាក់នោះមានឈ្មោះ សាំង ផៃរ៉ាត់ និង នង សូដែន។
លោក សាំង ផៃរ៉ាត់ មានប្រសាសន៍ថា លោកចង់បានយុត្តិធម៌ចំពោះការវាយដំ ដោយលោកពុំមានកំហុស និងពុំមានហេតុផលច្បាស់លាស់៖ «ឥឡូវហ្នឹងខ្ញុំអោយប៉ូលិសគេធ្វើតាមច្បាប់»។
កាលពីវេលាម៉ោងជិត ១១យប់ ថ្ងៃទី២២ ខែមេសា ឆ្នាំ២០១២ មានករណីវាយធ្វើទារុណកម្មមួយ បានកើតឡើងនៅសណ្ឋាគារកោះកុង ស៊ីធី ដែលស្ថិតនៅក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង បណ្ដាលអោយមនុស្សបួននាក់របួសធ្ងន់ និងស្រាល ក្នុងនោះក៏មានមន្ត្រីកងរាជអាវុធហត្ថក្រុងខេមរភូមិន្ទ មួយរូបផងដែរ។ ហេតុការណ៍នោះកើតឡើងនៅពេលដែលលោក សាំង ផៃរ៉ាត់ បានត្រឡប់ទៅរកខ្សែក ដែលអះអាងថា បានភ្លេចនៅក្នុងបន្ទប់សណ្ឋាគារដែលលោកបានស្នាក់នៅពីរថ្ងៃ គឺមុនពេលដែលលោក ប៊ុន សុខា បានទៅស្នាក់នៅបន្ត។
ទោះជាយ៉ាងណា ករណីបង្ករបួសស្នាមដោយជំនួយការផ្ទាល់លោកនាយករដ្ឋមន្ត្រីនេះ ត្រូវសមត្ថកិច្ច និងតុលាការខេត្តកោះកុង ចាត់វិធានការយ៉ាងឆាប់រហ័ស ដែលជាករណីដ៏កម្រមួយ។
មន្ត្រីសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តកោះកុង លោក នាង បូរ៉ាទីណូ។ លោកមានប្រសាសន៍ថា ប្រសិនបើតុលាការខេត្តកោះកុង អាចរកយុត្តិធម៌ផ្ដល់អោយជនរងគ្រោះបាន នោះតុលាការនេះនឹងក្លាយជាគំរូល្អមួយ៖ «នេះជាករណីលើកទី១ ដែលសមាគមអាដហុក ខេត្តកោះកុង បានទទួល និងធ្វើអន្តរាគមន៍ ហើយជាពិសេសខាងតុលាការខេត្តកោះកុង គឺទាំងខាងព្រះរាជអាជ្ញា ខាងតុលាការហ្នឹង គាត់ខិតខំប្រឹងប្រែងក្នុងការចាត់វិធានការផងដែរក្នុងការសាកសួរនាំទៅលើជនដែលប្រព្រឹត្តបទល្មើសផ្ទាល់»។
លោក នាង បូរ៉ាទីណូ បន្តថា បើទោះជាមានអន្តរាគមន៍ផ្ដល់សំណងដោះស្រាយជម្លោះក្រៅប្រព័ន្ធតុលាការក៏ដោយ ក៏ជនរងគ្រោះ ២នាក់ក្នុងចំណោម ៤នាក់បានប្រកាន់ជំហរដាក់ពាក្យបណ្ដឹងអោយតុលាការចាត់វិធានការតាមច្បាប់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។