នាយទាហានម្នាក់ ត្រូវគេចោទថា ប្រើកាំភ្លើងបាញ់គំរាមពលរដ្ឋក្នុងជម្លោះ
H081212PB
ទាក់ទិនបញ្ហានេះ នៅឯខេត្តពោធិ៍សាត់ នាយទាហានម្នាក់ ត្រូវបានគេចោទថា បានប្រើអំពើហិង្សា ដោយការបាញ់គំរាមប្រជាពលរដ្ឋអស់ជាច្រើនគ្រាប់ ក្នុងជម្លោះគ្នាមួយ។ ទោះជាយ៉ាងនេះក្ដី មេបញ្ជាការរបស់ទាហានរូបនោះ បានឲ្យដឹងថា អង្គភាពបានដាក់វិន័យផ្នែករដ្ឋបាល ចំពោះទាហាន ដែលបានប្រព្រឹត្តនោះរួចហើយ។
អនុសេនីយ៍ឯក នៃអង្គភាពស៊ើបការណ៍ ឬហៅថា ដឺបេ (2B) ខេត្តពោធិ៍សាត់ម្នាក់ រងការចោទប្រកាន់ពីប្រជាពលរដ្ឋមួយរូបថា ប្រើកាំភ្លើងអាកា (AK) បាញ់គំរាមមកលើរូបគាត់។
លោកស្រី អែម ហាប អាយុ ៤៣ឆ្នាំ ជាប្រជាពលរដ្ឋនៅភូមិទួលគ្រួស ឃុំប្រមោយ ស្រុកវាលវែង ខេត្តពោធិ៍សាត់។ អ្នកស្រីបានឲ្យដឹងនៅព្រឹកថ្ងៃទី ១២ សីហាថា កាលពីវេលាម៉ោង ៥ និង ១៥ នាទី ល្ងាច ថ្ងៃទី ៩ ឧសភា ឆ្នាំ ២០១២ លោកអនុសេនីយ៍ឯក ថា ណារ័ត្ន ហៅ ទូច ជាទាហាននៅអង្គភាពស៊ើបការណ៍ខេត្តពោធិ៍សាត់ បានប្រើកាំភ្លើងអាកា ៤៧ ស្វ័យបត់បាញ់គំរាមគាត់ចំនួន ៦ គ្រាប់ក្នុងជម្លោះគ្នាមួយ។
លោកស្រីបន្តថា ការបាញ់គំរាមនេះ កើតឡើងដោយសារលោក ថា ណារ័ត្ន ហៅ ទូច សង្ស័យគាត់ថា បានប្ដឹងទៅតុលាការ និងអង្គការសិទ្ធិមនុស្ស ចោទប្រកាន់ទាហានក្រោមឱវាទលោកថា បានធ្វើទារុណកម្មលើកូនប្រុសលោកស្រី ដែលរងការចោទប្រកាន់ថា ជាចោរលួចម៉ូតូ។
អ្នកស្រី អែម ហាប៖ «វាជេរខ្ញុំតាមទូរស័ព្ទប្រហែលជិតកន្លះម៉ោង។ ដល់ពេលទូរស័ព្ទអស់លុយ វាបើកឡានមកចូលដល់ផ្ទះខ្ញុំ វាហក់ពីលើឡានមកបាញ់តែម្ដង។វាអត់មានសួរហេតុផលអីទេ វាស្រែកថា ជីវិតង៉ែងមួយមិនអស់ឡានអញមួយផង! វាថាអញ្ចឹង។វាថា ង៉ែងទៅប្ដឹងទៅប្ដឹងឲ្យអស់ដីអស់ធ្លីទៅ។ វាថាឲ្យខ្ញុំអ៊ីចឹង»។
វិទ្យុអាស៊ីសេរីមិនអាចទាក់ទងសុំការបំភ្លឺពីលោកអនុសេនីយ៍ឯក ថា ណារ័ត្ន ហៅ ទូច បានទេ នៅល្ងាចថ្ងៃទី ១២ សីហា។ ទោះជាយ៉ាងនេះក្ដី មេបញ្ជាការអង្គភាពស៊ើបការណ៍យោធាខេត្តពោធិ៍សាត់ ពន្យល់ចំពោះបញ្ហានេះថា អង្គភាពបានដាក់ទណ្ឌកម្មតាមវិន័យកងទ័ព និងដាក់ពិន័យផ្នែករដ្ឋបាលចំពោះលោកអនុសេនីយ៍ឯក ថា ណារ័ត្ន រួចហើយ។
លោកមេបញ្ជាការអង្គភាពស៊ើបការណ៍បន្តថា អង្គភាពកំពុងព្យាយាមសុំជួបគ្រួសារលោកស្រី អែម ហាប ដើម្បីសុំទោស និងផ្ដល់សំណងជួសជុលផ្លូវចិត្ត តែគ្រួសារលោកស្រីនៅមិនទាន់ទទួលការសុំជួបនេះនៅឡើយទេ។
សំឡេង៖ «ខ្ញុំបានដកហូតតួនាទីអស់ហើយៗ ហៅមកអង្គភាពធ្វើវិន័យទណ្ឌកម្មតាមបែបកងទ័ពនៅនឹងកន្លែង មិនឲ្យទៅណាទេ។ ប៉ុន្តែក៏កំពុងជាប់ក្នុងផ្លូវច្បាប់ ព្រោះគេបានប្ដឹងទៅតុលាការ»។
ទាក់ទិនបញ្ហានេះ មន្ត្រីអង្កេតអង្គការ លីកាដូ ខេត្តពោធិ៍សាត់ កញ្ញា មិត សាមួន មានប្រសាសន៍ថា អង្គការ លីកាដូ ទើបតែទទួលពាក្យបណ្ដឹងពីភាគីជនរងគ្រោះ ហើយមិនទាន់បានធ្វើការស៊ើបអង្កេតនៅឡើយទេ។
កញ្ញាបន្តថា ការដាក់ទណ្ឌកម្មតាមវិន័យកងទ័ព និងដាក់ពិន័យផ្នែករដ្ឋបាលបានបង្ហាញពីការទទួលខុសត្រូវខ្ពស់ របស់អង្គភាពស៊ើបការណ៍នៃកងទ័ពខេត្តពោធិ៍សាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
