គ្រួសារអ្នកស្លាប់ត្រូវគេទារប្រាក់១ពាន់ដុល្លារសម្រាប់ទិញក្របីសែនកុំឲ្យចង្រៃ

បុរសជនជាតិខ្មែរម្នាក់បានស្លាប់បន្ទាប់ពីគ្រូបូរាណជនជាតិដើមភាគតិច នៅភូមិកាជនលើ ស្រុកវ៉ឺនសៃ ខេត្តរតនគិរី បានព្យាបាលជំងឺរយៈពេលមួយសប្ដាហ៍។

ដោយ រដ្ឋា វីសាល
2012-10-07

ក្រុមសហគមន៍ជនជាតិដើមភាគតិច នៅក្នុងភូមិនោះ មិនអនុញ្ញាតឲ្យក្រុមគ្រួសារអ្នកស្លាប់យកសពចេញពីភូមិទេ ប្រសិនបើគ្រួសារសពមិនព្រមផ្ដល់ប្រាក់ ១០០០ ដុល្លារសម្រាប់ទិញក្របីមួយនឹមសែនកុំឲ្យកើតមានគ្រោះចង្រៃដល់អ្នកភូមិ តាមជំនឿរបស់ក្រុមជនជាតិដើមភាគតិចទាំងនោះ។

អ្នកយកព័ត៌មានវិទ្យុអាស៊ីសេរី រាយការណ៍ថា ភរិយារបស់អ្នកស្លាប់ បានព្យាយាមអង្វរករសុំប្រគល់ប្រាក់មួយលានរៀល កាលពីរសៀលថ្ងៃទី៦ ខែតុលា ឆ្នាំ ២០១២ ដើម្បីនាំសពប្ដីចេញពីភូមិទៅធ្វើបុណ្យ ក៏ប៉ុន្តែ ក្រុមសហគមន៍ជនជាតិដើមមិនយល់ព្រម។

ភរិយាអ្នកដែលស្លាប់ គឺអ្នកស្រី លូ ហាវ អាយុ ៤៧ មានប្រសាសន៍បញ្ជាក់ថា គាត់បានបង់ប្រាក់រហូតដល់ ២ លាន ៥ សែនរៀល ទៅឲ្យអ្នកភូមិទើបអាចនាំសពមកកាន់លំនៅឋានបាន។

អ្នកស្រី លូ ហាវ៖ «សុំគេអង្វរគេៗ អត់ព្រម។ គេដាច់ ១.០០០ ហើយគេថា គេយល់យោគយើងផង។ អាក្រក់ដែរ ធ្វើម៉េចគេជំរិតយើងហើយ យើងឲ្យគេទៅកុំឲ្យពិបាករញ៉េរញ៉ៃ។បើយើងមិនឲ្យគេ ក៏គេមិនឲ្យប្ដី យើងមកយកសពមកដែរគេឲ្យកប់នៅដីគេ។ខ្ញុំថាពីរលានកន្លះ ក៏ឲ្យគេទៅឲ្យតែបានប្ដីមកផ្ទះធ្វើបុណ្យធ្វើទានឲ្យគាត់ទៅ កុំឲ្យពាក់ព័ន្ធស្អីទៀត»។

ប្រជាពលរដ្ឋដែលស្លាប់មានឈ្មោះ យឹម បូរា អាយុ ៤៧ ឆ្នាំ រស់នៅឃុំកោះសំពាយ ស្រុកសៀមបូក ខេត្តស្ទឹងត្រែង មានជំងឺថ្លើមប្រភេទ សេ (C) ហើមពោះធ្ងន់ធ្ងរ។ ក៏ប៉ុន្តែ ក្រុមគ្រួសារមានជំនឿថា អ្នកជំងឺ ត្រូវអំពើធ្មប់ ទើបនាំទៅព្យាបាលដោយគ្រូបូរាណឈ្មោះ លន់។

អ្នកតំណាងរាស្ត្រខេត្តរតនគិរី លោក ប៊ូ ឡាំ ចាត់ទុកការព្យាបាលរបស់គ្រូបូរាណ ធ្វើឲ្យមនុស្សស្លាប់ និងការទារប្រាក់ច្រើនលើសលប់ពីប្រជាពលរដ្ឋជនជាតិដើម ដើម្បីសែនព្រេន គឺជាប្រការខុសច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។