ជម្លោះរវាងអ្នកកាន់និកាយខុសគ្នារបស់សាសនិកឥស្លាមនៅបាត់ដំបង

មានទំនាស់ក្នុងជំនឿដើរតាមសាសនាឥស្លាមចំនួនពីរក្រុម បានកើតមានឡើងនៅក្នុងវិហារចាមមួយ នៅក្នុងខេត្តបាត់ដំបង។

ដោយ សួន សុផលមុន្នី
2012-08-18

h081812mn.mp3

១៨-សីហា-២០១២៖ លោក សើ សាឌីន (ស្ដាំ) អាយុ៥៧ឆ្នាំ ជាសមាជិកគណៈកម្មការនៅវិហារនរុល ឥស្លាម និងលោក សើ ហ្វារ៉ាត់ (ឆ្វេង) ជាសាសនិកឥស្លាម កាន់និកាយឥស្លាមសើហ្វីអ៊ី នៅខេត្តបាត់ដំបង។

RFA/Soun Sophalmony

ក្រុមទី១ ជាក្រុមប្រតិបត្តិតាមនិកាយឥស្លាមសើហ្វីអ៊ី និងក្រុមទី២ ជាក្រុមប្រតិបត្តិតាមនិកាយវះប៊ី។ និកាយវះប៊ី ជាក្រុមនិកាយមួយដែលសាសនិកឥស្លាមជាច្រើនលាននាក់នៅក្នុងសកលលោក មិនទទួលស្គាល់ និងមិននាំគ្នាប្រតិបត្តិតាម។

សាសនិកឥស្លាមជិត២០០នាក់ ដែលនិយមនិកាយពីរក្រុមខុសគ្នា បានឈ្លោះប្រកែកគ្នាដោយពាក្យសម្ដី និងមានការរុញច្រានគ្នាទៅវិញទៅមកនៅក្នុងវិហារចាមមួយ ដែលមានឈ្មោះថា នរុលអ៊ី ឥស្លាម ស្ថិតនៅភូមិសុភី១ សង្កាត់រតនៈ ក្រុងបាត់ដំបង ខេត្តបាត់ដំបង។

ក្រុមនិកាយសើហ្វីអ៊ី បានចោទលោក អារ៉ាហ្វាត ជាសមាជិកក្រុមប្រឹក្សាខេត្តបាត់ដំបង ជាមេដឹកនាំក្រុមនិកាយសាឡាហ្វ ឬវ៉ាត់ទី ទៅអុកឡុកនៅក្នុងពិធីបុណ្យថ្វាយបង្គំព្រះ។ សមាជិកគណៈកម្មការនៅវិហារនរុល ឥស្លាម លោក សើ សាឌីន បានថ្លែងនៅថ្ងៃទី១៨ ខែសីហា ថា កាលពីថ្ងៃទី១៧ វេលាម៉ោង១២ និង២០នាទី មានខ្មែរឥស្លាមជិត២០០នាក់ ក្នុងនោះមានក្រុមនិកាយសើហ្វីអ៊ី និងក្រុមនិកាយសាឡាហ្វ បាននាំគ្នាទៅថ្វាយបង្គំព្រះ។

នៅគ្រានោះ មានឈ្មោះ រិទ្ត វ៉ាង ជាអ្នកកាន់និកាយសើហ្វីអ៊ី បានឡើងសូត្រគម្ពីរគូរអាន ស្រាប់តែលោក ស៊ូ អារ៉ាហ្វាត ជាសមាជិកក្រុមប្រឹក្សាខេត្តបាត់ដំបង ហាមមិនឲ្យសូត្រ និងបញ្ជាឲ្យប៉ូលិស៤នាក់ចូលទៅឃាត់ ហើយទុកឲ្យក្រុមនិកាយសាឡាហ្វ ដែលជានិកាយមួយហូរចូលពីក្រៅប្រទេស ជាអ្នកឡើងសូត្រវិញ បណ្ដាលឲ្យមានជម្លោះពេញព្រះវិហារ៖ «គោលបំណងរបស់គេនេះ ចង់បំបែកបំបាក់ផ្ទៃក្នុងរបស់និកាយចាស់ ដោយសារពួកគេចង់ដើម្បីគេដាក់កម្លាំងគេថ្មីចូលកាន់កាប់នៅកន្លែងហ្នឹង កាន់និកាយថ្មី គឺនិកាយវះប៊ី ពួកនេះចូលកន្លែងណា សាសនិកឥស្លាមចែកវិហារមានមេដឹកនាំពីរនាក់»។

លោក ស៊ូ អារ៉ាហ្វាត ជាសមាជិកក្រុមប្រឹក្សាខេត្តបាត់ដំបង ច្រានចោល។ លោកថ្លែងថា រូបលោកពុំមែនជាអ្នកកាន់និកាយសាឡាហ្វ ហើយបានសម្របសម្រួលជម្លោះនោះ ដោយបានសហការជាមួយគណៈអេម៉ាំខេត្ត ឬហៅថាមេគណខេត្ត។ បញ្ហាពុំមានពាក់ព័ន្ធនិកាយផ្សេងគ្នាទេ តែជារឿងដណ្ដើមគ្នាឡើងសូត្រគម្ពីរគូរអាន៖ «ដល់ពេលអ៊ីចឹង គាត់ក៏ទាមទារឡើងដែរ ឡើងក៏មានព្រឹត្តិការណ៍កើតឡើង។ ខ្ញុំក៏បញ្ជាឲ្យថ្នាក់ដឹកនាំចេញពីទីនោះទាំងអស់ កម្លាំងប៉ូលិសចូលទៅក៏មានការរុញមកខ្លាំង ខ្ញុំក៏បញ្ជាប៉ូលិសឲ្យដកថយ មិនឲ្យប៉ះពាល់បងប្អូនទាំងអស់ ធ្វើម៉េចរំដោះថ្នាក់ដឹកនាំចេញមកទេ»។

លោកបានបដិសេធថា មិនមានការនាំចលនាឥស្លាមពីក្រៅប្រទេសចូលកម្ពុជាទេ។ ករណីនេះ លោកចាត់ទុកថា នេះជាទំនាស់ផ្ទៃសាសនិកឥស្លាម ដែលចង់ឡើងដណ្ដើមទេសនារៀងខ្លួន។ ជាគោលការណ៍ សាសនិកឥស្លាមភាគច្រើននៅកម្ពុជា និយមកាន់និកាយសើហ្វីអ៊ី។

អ្នកកាន់និកាយសើហ្វីអ៊ី បានថ្លែងថា នៅពេលថ្វាយបង្គំព្រះ គឺនិកាយសើហ្វីអ៊ី បានប្រតិបត្តិទៅតាម ក្រឹត្យក្រមតាមច្បាប់ ខុសពីក្រុមអ្នកកាន់និកាយវះប៊ី។ អ្នកប្រតិបត្តិតាមនិកាយសើហ្វីអ៊ី នៅពេលបញ្ចប់កិច្ចថ្វាយបង្គំព្រះនៅក្នុងព្រះវិហារ ពួកគេត្រូវបែរមកស្ដាំបែរទៅឆ្វេង និងយកដៃដងទឹកស្ដាំលុបមុខ។ នៅក្រោយការថ្វាយបង្គំព្រះនៅពេលទាបភ្លឺ អ្នកកាន់និកាយសើហ្វីអ៊ី បានក្រោកឈរជាលើកទី២ លើកដៃសុំពរជ័យពីព្រះ៖ «ទាស់ធំៗ គឺត្រង់ហ្នឹង។ និកាយវះប៊ី នេះ ខុសប្លែកពីពួកខ្ញុំ ដោយសារពួកគេនេះធ្វើបុណ្យសពអត់មានការសូត្រ។ គេធ្វើបាយម្ហូបអាហារអីធម្មតា។ ប៉ុន្តែសូត្រឧទ្ទិសកុសលដល់ព្រលឹងសព គេអត់ធ្វើអ៊ីចឹង ហើយមិនអាចចូលសម្រុងក្នុងនិកាយខ្ញុំបាន នេះជាចំណុចធំៗដែលខ្ញុំអធិប្បាយនៅក្នុងនេះ»។

លោក ទារ៉ ហ្វីអ៊ី ជាអ្នកទទួលខុសត្រូវនៅវិហារនរុល ឥស្លាម ថ្លែងថា ជម្លោះនិកាយសាសនាឥស្លាមចំនួនពីរនេះបានបញ្ចប់។ អ្នកកាន់និកាយសាឡាហ្វ អាចចូលទៅថ្វាយបង្គំព្រះនៅក្នុងវិហាររួមគ្នាបាន តែពុំអនុញ្ញាតឲ្យធ្វើជាអ្នកដឹកនាំ ឬឡើងសូត្រគម្ពីរគូរអានទេ ដោយសារមានច្បាប់សាសនាខុសគ្នា៖ «ពិធីថ្វាយបង្គំថ្ងៃសីល ត្រូវខូចអន្តរាយ។ វាអត់បានផលអី បើសិនជាឲ្យខាងវះប៊ី ឡើងទេសអ៊ីចឹងទៅ បើមកចូលរួមថ្វាយបង្គំបាន តែមិនឲ្យចូលទេសអីអ៊ីចឹង»។

ទាក់ទិនជម្លោះកាលពីថ្ងៃទី១៧ ខែសីហា នោះ ថ្នាក់ដឹកនាំនៃមន្ទីរធម្មការខេត្ត និងថ្នាក់ដឹកនាំឥស្លាមជាច្រើននាក់ បានបើកកិច្ចប្រជុំមួយនៅរសៀលថ្ងៃទី១៨ ខែសីហា ដោយបានសម្រេចថា ទៅថ្ងៃមុខមិនអនុញ្ញាតឲ្យសាសនិកឥស្លាម ដែលកាន់និកាយខុសពីនិកាយសើហ្វីអ៊ី ឡើងសូត្រគម្ពីរគូរអាន ទៀតទេ។

ថ្នាក់ដឹកនាំសាសនាឥស្លាម បានឲ្យដឹងថា នៅក្នុងពិភពលោក មានសាសនិកឥស្លាមកាន់និកាយចំនួន៧៣។ ប៉ុន្តែ និកាយចំនួន ៧៣ នេះ មានការទទួលស្គាល់មេដឹកនាំនិកាយតែ ៤ ប៉ុណ្ណោះ គឺនិកាយហាន់ ណាហ្វី និកាយហាំប៊ើលី និកាយម៉ាលិគី និងនិកាយសើហ្វីអ៊ី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

NICO

ពី KHMER PARIS FRANCE

KHMER GOVERMENT BE CAREFULL ABOUY MUSLIMS BROUGHT FROM OUTSIDE, THEY ARE OFTEN EXTREME.THE OLD KHMER MUSLIMS (kHMER ISLAM)ARE GOOD ENOUGH , NO NEED INFLUENCE FROM ANYWHERE.

Aug 20, 2012 09:33 AM

you

ពី you

សាសនឥសា្លមជាសាសនាដ៏ល្អបំផុត តែអ្នកកាន់សាសនា ឥស្លាមភាគច្រើន ចូលចិត្តឈ្លោះគ្នាឯង ស្ទើរតែគ្រប់ខេត្ត
អ្នកខ្លះទុកពុកមាត់ គ្មានប្រយោជន៏ សុត្រធម័ឥតប្រយោជន៏ ឈ្លោះតែគ្នា អើយ ពិបាកពេក នំាគ្នាផឹកស្រាទំាងអស់គ្នាទៅ
ព្រោះ គ្មានអាមួយណា ល្អជាងមួយណាទេ សុត្រធម័តែចូលចិត្ត ឈ្លោះតែគ្នា មើលងាយគ្នា !

Aug 20, 2012 09:24 AM

អ្នកអានអនាមិក

Sure muslim people don't work together. with small of amount muslim in cambodia, they still fighting among themselves. now they are just pushing in the future who knows what will they be using

Aug 19, 2012 08:45 PM

អ្នកអានអនាមិក

We are Cambodians should be careful about the Muslims who bring the conflict idea of Muslims from outside. We hear and see every day the conflict and violence among the Muslims countries.

Aug 18, 2012 07:55 PM