ជម្លោះក្នុងសហគមន៍នេសាទនៅខេត្តបាត់ដំបង
h081312mn.mp3
សហគមន៍នេសាទចំនួនពីរ នៅស្រុកឯកភ្នំ ខេត្តបាត់ដំបង បានប្រឈមមុខដាក់គ្នានៅពេលដែលពួកគេបានចុះទៅបង្ក្រាបបទល្មើសនេសាទ ណ រ៉ាវ ឬហៅថាស្បៃមងក្រឡាល្អិត ដែលជនល្មើសបានចាប់ត្រីនៅចំណុចមួយក្នុងបឹងរហាលទោល ភូមិព្រៃចាស់ ឃុំព្រៃចាស់ ស្រុកឯកភ្នំ ខេត្តបាត់ដំបង។ ទំនាស់ពាក្យសម្ដីធំតូចដាក់គ្នានោះ ត្រូវបានគេមើលឃើញថា ដោយសារតែសហគមន៍នេសាទ នៅឃុំព្រៃចាស់ ជាអ្នកកាងបទល្មើសនេសាទ ចំណែកឯសហគមន៍នេសាទព្រែកហ្លួង ជាអ្នកចុះទៅបង្ក្រាបបទល្មើសនេសាទ។
លេខាសហគមន៍នេសាទព្រែកហ្លួង លោក រឹម រំដួល បានថ្លែងនៅថ្ងៃចន្ទ ទី១៣ ខែសីហា ថា កាលពីព្រឹកថ្ងៃទី១១ ខែសីហា ឆ្នាំ២០១២ រូបលោក និងកងកម្លាំងប៉ូលិសមានគ្នា៩នាក់ បានសុំគោលការណ៍ពីខណ្ឌរដ្ឋបាលជលផលបាត់ដំបង ដើម្បីចុះទៅបង្ក្រាបបទល្មើសនេសាទ ណ រ៉ាវ។
ក្រោយពីទទួលបានការអនុញ្ញាត សហគមន៍ក៏បានផ្ដល់ដំណឹងនេះទៅមន្ត្រីសង្កាត់ជលផល នៅភូមិបាក់ព្រា ប៉ុន្តែនៅពេលចុះទៅដល់ទីតាំងបទល្មើស ស្រាប់តែមានការគំរាមពីសហគមន៍នេសាទព្រៃចាស់៖ «ពេលចូលទៅដល់ឃើញជនល្មើសដឹកឧបករណ៍ល្មើសចេញ អ៊ីចឹងយើងឃើញ អ៊ីចឹងក៏ស្រូតមកដល់មុន រើបានបន្តិច គេមកដល់ភ្លាម។ សហគមន៍ព្រៃចាស់ គេថា យើងហ្នឹងមិនប្រាប់គេ ហើយបើសិនគេចូលមកកន្លែងយើង យល់ម៉េចដែរ ហើយគេស្រែកថា អ្ហែងរកកម្លាំងពីឡូត៍១០ថែម១០ស្មាច់ទៀតមក ឮកម្លាំងគេច្រើនអ៊ីចឹង ដកខ្លួនចេញមក ខ្លាចមានបញ្ហាជាមួយគ្នា ព្រោះអីនៅក្នុងព្រៃខ្លាចមានអំពើហិង្សាកើតឡើង ខ្ញុំគេចខ្លួន»។
លោកបន្តថា បានប្រហែលជាកន្លះម៉ោងក្រោយមក ក៏មានមន្ត្រីជលផលនៅសង្កាត់បាក់ព្រា ក្រុមប្រឹក្សាឃុំព្រៃចាស់ និងប៉ូលិសប៉ុស្តិ៍ បានចុះទៅដល់ប្រាប់ឲ្យម្ចាស់ ណ រ៉ាវ រុះរើចេញពីទឹក ដើម្បីកុំឲ្យមានការប៉ះពាល់គ្នា។ ប៉ុន្តែពួកគេពុំបានចាប់ខ្លួន ឃាត់ខ្លួនអ្នកប្រព្រឹត្តិបទល្មើសនេសាទនោះទេ។
មេឃុំព្រៃចាស់ លោក ឈន លាង បានមានប្រសាសន៍ថា ឧបករណ៍ល្មើសនេសាទទាំងនោះ បានរុះរើចេញពីទឹកអស់ហើយក្រោយពីមានជម្លោះ។ លោកបញ្ជាក់ថា ករណីទំនាស់នេះកើតមានឡើងដោយសារតែសហគមន៍នេសាទព្រែកហ្លួង រំលោភលើដែនសមត្ថកិច្ចរបស់សហគមន៍នេសាទព្រៃចាស់៖ «អានេះ បើនិយាយទៅការរំលោភដែនសមត្ថកិច្ច។ គេមកហ្នឹង មុនដំបូងប្រាប់ថា ចាំឲ្យជួបជាមួយជលផល ជាមួយក្រុមប្រឹក្សាឃុំ រួចបានទៅទាំងអស់គ្នា។ គេទៅមុន ហើយពួកខាងខ្ញុំទាំងអស់គ្នា ខាងខ្ញុំជលផលទៅអត់ទាន់ដល់ គេទៅដល់មុនអ៊ីចឹង អ៊ីចឹងវាទាស់សម្ដីគ្នាបន្តិច ដល់ពួកខ្ញុំចូលទៅដល់ក៏វាអត់អីទេ និយាយទៅត្រូវគ្នានាំគ្នាសារទាំងអស់»។
វិទ្យុអាស៊ីសេរី បានព្យាយាមសុំការបំភ្លឺពីលោក លី វែង នាយខណ្ឌរដ្ឋបាលជលផលបាត់ដំបង ជាច្រើនដង ប៉ុន្តែលោកបានបដិសេធមិនផ្ដល់អត្ថាធិប្បាយទេ។
ប្រធានសម្របសម្រួលអង្គការសិទ្ធិមនុស្សលីកាដូ បានមានប្រសាសន៍ថា សហគមន៍នេសាទមិនត្រូវប្រកាន់លើដែនសមត្ថកិច្ចភូមិសាស្ត្រដូច្នេះទេ ពួកគេគួរធ្វើកិច្ចសហការគ្នាដើម្បីទប់ស្កាត់បទល្មើសនេសាទ៖ «ហើយជលផលគួរសហការជាមួយសហគមន៍ ហើយផ្ដល់ព័ត៌មានទៅឲ្យសហគមន៍ក្នុងការគ្រប់គ្រងរបស់ខ្លួនហ្នឹង ដូចជារដ្ឋបាលជលផលគួរផ្ដល់ព័ត៌មានទៅដល់សហគមន៍ ដើម្បីធ្វើរួមគ្នា បើយើងធ្វើដាច់ដោយឡែក មិនអាចជោគជ័យបានទេ»។
ទោះជាយ៉ាងនេះក្តី ក្រុមអ្នកភូមិបានរិះគន់ថា ករណីខាងលើនេះពុំមែនជាទំនាស់លើការរំលោភដែនសមត្ថកិច្ចទេ គឺទំនាស់កើតចេញមកពីសហគមន៍នេសាទព្រៃចាស់ ជាអ្នកត្រូវគ្នាជាមួយជនប្រើឧបករណ៍ល្មើសនេសាទ។ ព្រោះបទល្មើសនេសាទ មាននៅក្នុងភូមិសាស្ត្ររបស់ខ្លួនគ្រប់គ្រង មានរឿងអីដែលពួកគេមិនអាចដឹងនោះ។ ចំណែកឯសហគមន៍នេសាទព្រែកហ្លួង ជាអ្នកចុះទៅចាប់បទល្មើសនេសាទ ធ្វើឲ្យប៉ះពាល់ផលប្រយោជន៍សហគមន៍ព្រៃចាស់ ទើបកើតមានទំនាស់នេះឡើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
These fishermen who used illegal or banned fishing equipments must have already bribed the officials in that commune to receive this well support and backup from these officials. These officials must be investigated for corruption and if it were found to be true, then they should be prosecuted by the court of laws.
Aug 15, 2012 07:20 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
