ពលរដ្ឋត្អូញត្អែរចំពោះសេវាបង់ពន្ធលើមធ្យោបាយដឹកជញ្ជូនរបស់មន្ត្រីពន្ធដារ

ពលរដ្ឋដែលបានប្រកាសបង់ពន្ធរួចឲ្យដឹងថា ពួកគាត់មានការលំបាកនៅពេលចង់ទៅបង់ពន្ធ ដោយសារតែកន្លែងលក់ពន្ធតិចពេក និងសេវានៃការប្រមូលពន្ធរបស់ក្រុមមន្ត្រីពន្ធដារមិនគួរជាទីពេញចិត្ត។

ដោយ វណ្ណ វិចារ
2012-08-04

h080312sv.mp3

ប្រជាពលរដ្ឋកម្ពុជាដែលត្រូវបង់ពន្ធលើមធ្យោបាយដឹកជញ្ជូនគ្រប់ប្រភេទ មិនអាចទៅបង់ពន្ធបានទេ ចាប់ពីថ្ងៃទី០១ ខែសីហា តទៅ ព្រោះផុតកំណត់ថ្ងៃប្រមូលពន្ធទៅហើយ។

ពលរដ្ឋដែលបានបង់ពន្ធរួច បានរិះគន់ថា មន្ត្រីពន្ធដារបំពេញការងារមិនបានល្អ ក្នុងការបង់ពន្ធឆ្នាំនេះ។

អ្នករត់ម៉ូតូឌុបមានទីលំនៅ នៅសង្កាត់ទំនប់ទឹក លោក ជា រស់ មានប្រសាសន៍ថា ពេលទៅបង់ពន្ធនៅសាខាពន្ធដារខណ្ឌចំការមន មានការលំបាកយ៉ាងខ្លាំង ដោយត្រូវប្រជ្រៀតគ្នារង់ចាំ។ លោកបន្តថា មន្ត្រីពន្ធដារចាប់បើកទ្វារធ្វើការនៅម៉ោងប្រាំបីកន្លះ ហើយធ្វើការប្រហែល២ម៉ោងបិទទ្វារវិញបាត់។ លោកបន្តថា លោកមិនពេញចិត្តនឹងអាកប្បកិរិយាធ្វើការរបស់មន្ត្រីនៅទីនោះឡើយ៖ «ខ្លះទៅពីរដងអត់បាន។ យ៉ាប់ រឿងធ្វើការរយៈពេលខ្លីពេក អ្នកលក់ធម្មតា តែគេនិយាយថា ប្រាក់ខែតិចអ៊ីចឹង ក៏ចេះតែធ្វើការយករួចខ្លួនទៅ»។

លោក ជា រស់ បន្តថា លោកមានសាច់ញាតិលោកមួយចំនួននៅទីជនបទ មិនទាន់បានបង់ពន្ធឡើយ។

អ្នករត់ម៉ូតូឌុប អ្នករត់កង់បី អ្នករត់តាក់ស៊ី មួយចំនួនទៀត និយាយស្រដៀងគ្នាថា ការប្រមូលពន្ធឆ្នាំនេះ បង់តាមតម្លៃកំណត់ តែពួកគាត់ត្រូវចំណាយថ្លៃបំពេញលិខិតស្នាម ដែលមន្ត្រីពន្ធដារជួយសរសេរជាមធ្យមពី ៥.០០០រៀល ទៅ១០.០០០រៀល។ ពួកគាត់អះអាងថា ចំពោះសេវារបស់មន្ត្រីពន្ធដារវិញ ក្រុមមន្ត្រីនៅតែប្រើអាកប្បកិរិយាមិនសមរម្យទៅកាន់អ្នកបង់ពន្ធនៅឡើយ។

វិទ្យុអាស៊ីសេរី មិនទាន់អាចទាក់ទងមន្ត្រីជាន់ខ្ពស់ នៃអគ្គនាយកដ្ឋានពន្ធដារបានទេ នៅថ្ងៃទី០៣ សីហា ឆ្នាំ២០១២។

ទោះជាយ៉ាងនេះក្តី បើតាមសេចក្តីជូនដំណឹងរបស់អគ្គនាយកដ្ឋានពន្ធដារ ចុះថ្ងៃទី២៦ កក្កដា បានជូនដំណឹងថា សូមឲ្យយានយន្តធ្វើការបង់ពន្ធតាមការកំណត់ ជៀសវាងការប្រជ្រៀតគ្នាធ្វើឲ្យអសកម្មដល់ការផ្តល់សេវារបស់មន្ត្រីពន្ធដារ បានន័យថា ភាពអសកម្មទាំងឡាយរបស់មន្ត្រីពន្ធដារ អាចមកពីអ្នកទៅបង់ពន្ធ ខ្វះរបៀបរៀបរយ។

យ៉ាងណាក៏ដោយ អ្នកសម្របសម្រួលបណ្ដាញរួបរួម ដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិក ប្រចាំកម្ពុជា លោក សន ជ័យ មានប្រសាសន៍ថា ការលក់ពន្ធនៅកម្ពុជា តម្រូវឲ្យប្រជាពលរដ្ឋរង់ចាំអស់ជាច្រើនថ្ងៃ ហើយកន្លែងបង់ពន្ធនៅឆ្ងាយ ពិបាកក្នុងការបង់ពន្ធ។

លោកបន្តថា រដ្ឋាភិបាលត្រូវតែធ្វើកំណែទម្រង់របៀបប្រមូលពន្ធ ដើម្បីបង្កើនចំណូលពន្ធឲ្យកាន់តែមានភាពប្រសើរឡើង។ លោក សន ជ័យ បញ្ជាក់ថា ប្រសិនបើចំណុចអសកម្មកើតឡើងដោយសារប្រាក់ខែមន្ត្រីទាប រដ្ឋាភិបាលគួរតែដំឡើងប្រាក់ខែឲ្យមន្ត្រីឲ្យបានសមរម្យ៖ «ក្នុងរដូវប្រមូលពន្ធហ្នឹង គួរណាស់តែប្រមូលពន្ធតាមឃុំ-សង្កាត់ ធ្វើម៉េចឲ្យសេវាបង់ពន្ធជាសេវាគំរូ ដែលធ្វើឲ្យងាយស្រួលទទួលយកពីអ្នកដែលបំពេញកាតព្វកិច្ច»។

លោក សន ជ័យ បន្តថា បើប្រមូលពន្ធមិនបានតាមការកំណត់ រដ្ឋាភិបាលក៏ជួបបញ្ហាខ្វះខាតចំណូលក្នុងការថែរក្សាហេដ្ឋារចនាសម្ព័ន្ធទៀតផង។

ការប្រមូលពន្ធឆ្នាំ២០១២ រយៈពេល ៥ខែ ចាប់ផ្ដើមពីថ្ងៃទី១៥ កុម្ភៈ ដល់ថ្ងៃទី១៥ កក្កដា និងពន្យាររយៈពេលរហូតដល់បំណាច់ខែកក្កដា ឆ្នាំ២០១២៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។