សមត្ថកិច្ច៖ អាកាសយានដ្ឋានសៀមរាបជាគោលដៅឧក្រិដ្ឋជនគ្រឿងញៀន
h100912hs.mp3
ការកត់សម្គាល់របស់សមត្ថកិច្ចនេះ បន្ទាប់ពីក្នុងរយៈពេលប្រមាណ ២ខែជាប់ៗគ្នានេះ គឺគេចាប់បានគ្រឿងញៀនចំនួនជាង ២០គីឡូក្រាម ដែលឆ្លងកាត់តាមច្រកប្រលានយន្តហោះអន្តរជាតិខេត្តសៀមរាប។
កម្លាំងកងរាជអាវុធហត្ថ និងប៉ូលិសនៃការិយាល័យប្រឆាំងគ្រឿងញៀន ខេត្តសៀមរាប បានចាប់ខ្លួនស្ត្រីជនជាតិថៃ ២នាក់ និងរឹបអូសយកបានគ្រឿងញៀនប្រភេទកូកាអ៊ីន (Cocaine) ចំនួនជាង ១១គីឡូក្រាមជាថ្មីទៀត កាលពីល្ងាចថ្ងៃទី៨ ខែតុលា កន្លងទៅ។ ការចាប់ និងរឹបអូសយកបានថ្នាំញៀននេះ នៅពេលដែលសមត្ថកិច្ចប្រចាំប្រលានយន្តហោះអន្តរជាតិខេត្តសៀមរាប មានការសង្ស័យ ហើយបានចាប់ផ្ដើមធ្វើការពិនិត្យយ៉ាងហ្មត់ចត់។
លោកវរសេនីយ៍ឯក ញឹម សិលា ជាមេបញ្ជាការរងនៃកងរាជអាវុធហត្ថ ខេត្តសៀមរាប លោកបានមានប្រសាសន៍ថា កងកម្លាំងរបស់លោកដែលសហការជាមួយប៉ូលិស នៃការិយាល័យប្រឆាំងគ្រឿងញៀន និងមន្ត្រីគយផង បានចាប់ខ្លួនស្ត្រីជនជាតិថៃចំនួន ២នាក់ និងរឹបអូសយកបានថ្នាំញៀនប្រភេទកូកាអ៊ីន ចំនួនជិត ១១គីឡូក្រាមកន្លះ៖ «ការចាប់ហ្នឹង គឺវាឆ្លងកាត់ប្រលានសៀមរាប មួយត្រែនស៊ីត (Transit=ដំណើរឆ្លងកាត់) ហើយគយ គាត់មានការឆែកទៅឃើញ ក៏គាត់ហៅទាំងប៉ូលិស ទាំងអាវុធហត្ថ។ អីចឹង យើងឆែកទៅ យើងឃើញមានម្សៅកូកាអ៊ីន ១១គីឡូ ៤០០ក្រាមជាង ថាជិត ១១គីឡូកន្លះចុះ។ ចាប់បានហ្នឹង ២នាក់។ ដំណើររបស់គាត់មកពីទីក្រុងសៅថ៍ប៉ូឡូ ប្រទេសប្រេស៊ីល មកសិង្ហបុរី ពីសិង្ហបុរី មកខេត្តសៀមរាប»។
ស្ត្រីថៃ ២នាក់ ដែលសមត្ថកិច្ចចម្រុះបានចាប់ខ្លួននោះ គឺម្នាក់ឈ្មោះ យ៉ាង ណូប៉ាវ៉ារ៉ាផន (Yang Nopa waraphorn) អាយុ ២០ឆ្នាំ និងម្នាក់ទៀតឈ្មោះ ចាយ ផន អូរ៉ាឈុន (Chay porn Orachun) អាយុ ២៦ឆ្នាំ។
កាលពីថ្ងៃទី២៧ ខែកញ្ញា កន្លងទៅ ប៉ូលិសនៃការិយាល័យប្រឆាំងគ្រឿងញៀន ខេត្តសៀមរាប បានចាប់ខ្លួនស្ត្រីជនជាតិថៃម្នាក់ឈ្មោះ ឥន្ធនូ ស៊ូធី (Inthanu Suthee) អាយុ ៤៩ឆ្នាំ នៅពេលដែលស្ត្រីរូបនោះធ្វើដំណើរមកដល់ប្រលានយន្តហោះអន្តរជាតិខេត្តសៀមរាប ហើយសមត្ថកិច្ចបានឆែកឆេររកឃើញគ្រឿងញៀនមេតំហ្វេតាមីន (Methamphetamin) ទម្ងន់ ៥គីឡូ និង ៦៤០ក្រាមម្តងមកហើយនោះ។
លោកវរសេនីយ៍ទោ នន់ សុផាន្នី ជាប្រធានការិយាល័យនគរបាលប្រឆាំងគ្រឿងញៀន នៃស្នងការនគរបាល ខេត្តសៀមរាប លោកបានមានប្រសាសន៍ថា ចាប់តាំងពីពាក់កណ្ដាលខែសីហា រហូតមកដល់ដើមខែតុលា សមត្ថកិច្ចបានបង្ក្រាបបទល្មើសគ្រឿងញៀនជាទ្រង់ទ្រាយធំ ដែលឆ្លងកាត់តាមប្រលានយន្តហោះអន្តរជាតិខេត្តសៀមរាប ចំនួន ៣លើកហើយ។ ការបង្ក្រាបចំនួន ៣លើកនេះ គឺសមត្ថកិច្ចបានចាប់ខ្លួនស្ត្រីជនជាតិថៃ ចំនួន ៤នាក់ និងបុរសហ្វីលីពីន ចំនួន ១នាក់ ព្រមទាំងរឹបអូសយកបានគ្រឿងញៀនប្រភេទមេតំហ្វេតាមីន និងកូកាអ៊ីន ចំនួនជាង ២០គីឡូក្រាមកន្លះ។
មន្ត្រីដដែលបានកត់សម្គាល់ឃើញថា ក្រុមឧក្រិដ្ឋកម្មគ្រឿងញៀន បានចាប់ផ្ដើមជ្រើសយកប្រលានយន្តហោះអន្តរជាតិខេត្តសៀមរាប ធ្វើជាគោលដៅនៃការនាំគ្រឿងញៀនឆ្លងកាត់៖ «នៅខេត្តសៀមរាប គឺជាសញ្ញាណថ្មី ដែលឧក្រិដ្ឋជនវាប្រើប្រាស់ដីប្រលានយន្តហោះខេត្តសៀមរាប ហ្នឹង ជាចំណុចឆ្លងកាត់ វាអត់ចូលទេ វាឆ្លងកាត់ទៅប្រទេសទី៣ ហើយគោលដៅចុងបំផុត គឺទីក្រុងបាងកក ឯណោះ។ មានន័យថា អារូបភាពធំៗនេះ គឺជាសញ្ញាមួយដែលឱ្យសមត្ថកិច្ចយើងកាន់តែពង្រឹងនូវសមត្ថភាពប្រុងប្រយ័ត្នថែមទៀត»។
មន្ត្រីការិយាល័យប្រឆាំងគ្រឿងញៀន ខេត្តសៀមរាប ឱ្យដឹងថា ក្រៅពីការបង្ក្រាបបទល្មើសគ្រឿងញៀនធំៗ គឺក្នុងរយៈពេល ៩ខែឆ្នាំ២០១២ គេបានបង្ក្រាបការចែកចាយ និងប្រើប្រាស់គ្រឿងញៀនតូចតាចចំនួន ២៩ករណីផ្សេងទៀត។
អាជ្ញាធរជាតិប្រឆាំងគ្រឿងញៀន ប្រទេសកម្ពុជា បានចាត់ទុកថា បច្ចុប្បន្នក្រុមឧក្រិដ្ឋជនចែកចាយគ្រឿងញៀនថា បានប្រើរូបភាពតូចៗប្រៀបដូចជាហ្វូងស្រមោចដែលពាំអង្ករ។
ក្នុងផែនការជាតិ នៃទិសដៅត្រួតពិនិត្យគ្រឿងញៀនរយៈពេល ៥ឆ្នាំ ចាប់ពីឆ្នាំ២០០៥ រហូតដល់ឆ្នាំ២០១០ របស់ក្រសួងមហាផ្ទៃ បានឱ្យដឹងថា ប្រភេទគ្រឿងញៀនសំយោគខ្លះនៅតែបន្តឆ្លងកាត់ពីតំបន់ត្រីកោណមាស តាមព្រំដែននៃស្រុកឆែប របស់ខេត្តព្រះវិហារ ស្រុកថាឡាបរិវ៉ាត់ និងស្រុកសៀមប៉ាង ខេត្តស្ទឹងត្រែង ឆ្លងកាត់ទៅខេត្តកំពង់ធំ ដើម្បីយកមកចែកចាយនៅតាមបណ្ដាខេត្តភាគពាយ័ព្យមួយចំនួន ដូចជាខេត្តសៀមរាប បាត់ដំបង បន្ទាយមានជ័យ និងក្រុងប៉ោយប៉ែត ជាដើម។ ចំណែកឯប្រភេទគ្រឿងញៀនខ្លះទៀត ត្រូវបានក្រុមឧក្រិដ្ឋជននាំចូលមកតាមរយៈជើងហោះហើរ។
លោកឧត្តមសេនីយ៍ មាស វីរិទ្ធ ជាអគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រឆាំងគ្រឿងញៀន បានមានប្រសាសន៍ថា ក្រុមឧក្រិដ្ឋជនជួញដូរគ្រឿងញៀនអន្តរជាតិ តែងតែរិះរកគ្រប់មធ្យោបាយ ដើម្បីធ្វើចរាចរគ្រឿងញៀន នៅតាមប្រទេសជាច្រើន។ មន្ត្រីដដែលបានមានប្រសាសន៍ថា កម្ពុជា បានចាប់អារម្មណ៍ទៅលើប្រលានយន្តហោះអន្តរជាតិខេត្តសៀមរាប និងប្រលានយន្តហោះដទៃទៀតជាយូរមកហើយថា ក្រុមឧក្រិដ្ឋជនជួញដូរគ្រឿងញៀន អាចនឹងយកគោលដៅទាំងនោះ ដើម្បីឆ្លងកាត់គ្រឿងញៀន។
ដូច្នេះ អាជ្ញាធរក៏បានបណ្ដុះបណ្ដាលជំនាញដល់សមត្ថកិច្ចជាច្រើនផ្នែក នៅតាមកន្លែងទាំងនោះឱ្យចេះឆែកឆេរ និងទប់ស្កាត់គ្រឿងញៀនរួចហើយដែរ៖ «ដោយសារយើងដឹងថា កម្ពុជាត្រូវក្រុមឧក្រិដ្ឋជនជួញដូរគ្រឿងញៀន ប្រើប្រាស់ជាកន្លែងដើម្បីឆ្លងកាត់ការចរាចរណ៍គ្រឿងញៀនរបស់គេ។ យើងបានបណ្ដុះបណ្ដាលមន្ត្រីដែលបម្រើការនៅឯប្រលានយន្តហោះ ទាំងសមត្ថកិច្ចគយ សមត្ថកិច្ចប៉ូលិសអន្តោប្រវេសន៍ ទាំងសមត្ថកិច្ចសន្តិសុខ និងសមត្ថកិច្ចដែលគ្រប់គ្រងយានដ្ឋាន ឱ្យគាត់យល់ដឹងពីបច្ចេកទេសនៃការដឹកជញ្ជូនគ្រឿងញៀន ដោយការលួចលាក់ ឬក៏មានតាមវ៉ាលី ឬក៏មានតាមបញ្ញើ ដែលអាចធ្វើដំណើរតាមយន្តហោះបាន»។
អគ្គលេខាធិការដ្ឋាននៃអាជ្ញាធរជាតិប្រឆាំងគ្រឿងញៀនកម្ពុជា បានឱ្យដឹងថា ក្នុងរយៈពេល ៩ខែឆ្នាំ២០១២ គេបានបង្ក្រាប និងរឹបអូសសារធាតុគីមីបានជាច្រើនតោន ព្រមទាំងឧបករណ៍សម្រាប់ផលិតជាគ្រឿងញៀន រួមនិងគ្រឿងញៀនប្រភេទកូកាអ៊ីន ចំនួនជាង ៤០គីឡូក្រាមផង សរុបជាទឹកប្រាក់នៃគ្រឿងញៀនដែលបានរឹបអូសទាំងនោះ មានប្រមាណជាង ៥លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
