អង្គជំនុំជម្រះវិសាមញ្ញក្នុងតុលាការកម្ពុជា ដែលពលរដ្ឋនិយមហៅថា តុលាការកាត់ទោសអតីតមេដឹកនាំខ្មែរក្រម បានចេញសេចក្តីប្រកាសព័ត៌មាននៅថ្ងៃ២ ធ្នូនេះ ឲ្យដឹងថា លោក អាន់ឌ្រូ ខេលៃ (Andrew T. Cayley) មកពីប្រទេសអង់គ្លេស ត្រូវបានតែងតាំង ជាសហព្រះរាជអាជ្ញាអន្តរជាតិថ្មីជំនួសលោក រ៉ូប៊ឺត ពឺទីត ដែលបានសុំលាលែងចេញពីមុខតំណែង។
ការតែងតាំងលោក អាន់ឌ្រូ ខេលៃ មកពីចក្រភពអង់គ្លេសជាសហព្រះរាជអាជ្ញាអន្តរជាតិសម្រាប់តុលាការកាត់ទោសអតីតមេដឹកនាំខ្មែរក្រហម និងលោក នីកូឡាស គុមចាញ (Nicholas Koumjian) មកពីសហរដ្ឋអាមេរិក ជាសហព្រះរាជអាជ្ញាអន្តរជាតិបម្រុងនេះ គឺបន្ទាប់ពីមានការតែងតាំងពីអគ្គលេខាធិការអង្គការសហប្រជាជាតិ និងមានការអនុម័តយល់ព្រមពីឧត្តមក្រុមប្រឹក្សាអង្គចៅក្រមនៃប្រទេសកម្ពុជាផងដែរ។
លោក អាន់ឌ្រូ ខេលៃ ធ្លាប់បានធ្វើជាមេធាវីការពារក្តីឯកជនឲ្យលោក ឆាល ថេល័រ (Charles Taylor) នៅតុលាការពិសេសសម្រាប់ប្រទេសសេរ៉ាលីអូន និងលោក អ៊ីវ៉ាន ឃឺម៉ាក (Ivan Cermak) នៅក្នុងតុលាការឧក្រិដ្ឋកម្មអន្តរជាតិនៅអតីតប្រទេសយូហ្គោស្លាវី។
លោក អាន់ឌ្រូ ខេលៃ ធ្លាប់បានធ្វើជាអ្នកពិគ្រោះយោបល់ជាន់ខ្ពស់ឲ្យតុលាការឧក្រិដ្ឋកម្ម ICC ក្នុងនាមជាកម្រិតទទួលខុសត្រូវលើការស៊ើបអង្កេតនៅទីក្រុងដាហ្វ័រ និងជាបន្តបន្ទាប់ការស៊ើបអង្កេតសំណុំរឿងលើកដំបូងនៅទីក្រុងដាហ្វ័រ។
នៅក្នុងសេចក្តីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា បានសរសេរថា លោក អាន់ឌ្រូ ខេលៃ ធ្លាប់ធ្វើជាអ្នកប្រឹក្សាជាន់ខ្ពស់ឲ្យព្រះរាជអាជ្ញានៅតុលាការឧក្រិដ្ឋកម្មអន្តរជាតិសម្រាប់អតីតប្រទេសយូហ្គោស្លាវី។ គាត់ក៏ជាអ្នកទទួលខុសត្រូវសម្រាប់ការស៊ើបអង្កេតបន្ត ប្រឆាំងនឹងឧត្តមសេនីយ៍ វ៉ាក់ កូ ម្លាឌីក (Ratko Mladic) និងធ្លាប់បានដឹកនាំធ្វើការចោទប្រកាន់ជាអន្តរជាតិលើកដំបូងទៅលើសមាជិកកងទ័ពរំដោះកូសូវ៉ូ៕