មន្រ្តីអាវុធហត្ថនិងនគរបាលមួយរូបដែលសុំមិនបញ្ចេញឈ្មោះបានមានប្រសាសន៍សម្ដែងនូវសេចក្តីរីករាយដោយបានទទួលប្រាក់ឧបត្ថម្ភអាហារនោះ ក្រោយពីបាននាំគ្នាធ្វើការតវ៉ាមក ៖ «សប្បាយចិត្តណាស់! ជួយការឧបត្ថម្ភហូបចុករបស់យើងហ្នឹង។ អរគុណដែលវិទ្យុអាស៊ីសេរីបានជួយផ្សាយឲ្យថ្នាក់លើដឹង។ ឥឡូវហ្នឹងបានប្រគល់លុយប្រគល់កាក់ហ្នឹងឲ្យគ្រប់ចំនួនហើយ អរគុណចំពោះថ្នាក់លើដែលខិតខំឧបត្ថម្ភលុយហ្នឹងបើកបានឲ្យគ្រប់ៗចំនួនទាំងអស់ ពីខែ១០មក រហូតដល់ខែ១ហ្នឹង»។
អ្នកយកព័ត៌មានវិទ្យុអាស៊ីសេរី អ្នកស្រី អ៊ុក សាវបូរី រាយការណ៍ឲ្យដឹងថា កាលពីខែធ្នូ ឆ្នាំ២០០៩ និងខែមករា ឆ្នាំ២០១០ ក្រុមមន្រ្តីអាវុធហត្ថនិងនគរបាលប្រចាំការនៅក្រៅសាលាក្តីខ្មែរក្រហម បានត្អូញត្អែរពីបញ្ហាប្រាក់ឧបត្ថម្ភអាហារប្រចាំថ្ងៃក្នុងមួយថ្ងៃ ១៥.០០០រៀលរបស់ពួកគាត់ប្រមាណ ៥០នាក់ បានអាក់ខានបើកដោយមិនបានប្រាប់ពីមូលហេតុ។
មន្រ្តីជាន់ខ្ពស់ក្រសួងមហាផ្ទៃ លោកឧត្តមសេនីយ៍ ម៉ៅ ចាន់តារា បានបំភ្លឺថា ការយឺតយ៉ាវមិនបានបើកប្រាក់ឧបត្ថម្ភអាហារដល់មន្រ្តីអាវុធហត្ថប្រចាំការនៅក្រៅសាលាក្តីខ្មែរក្រហមទាំងនោះគឺមកពីរដ្ឋកំពុងខ្វះថវិកា៕