ការប្រកាសចូលកាន់ការងារថ្មីរបស់អ្នកពិគ្រោះយោបល់ឯករាជប្រចាំសាលាក្តីខ្មែរក្រហមត្រូវបានធ្វើឡើងដោយលោក រាជ សម្បត្តិ ប្រធានផ្នែកកិច្ចការសាធារណៈនៃសាលាក្តីខ្មែរក្រហម ក្នុងសន្និសីទសារព័ត៌មានប្រចាំសប្តាហ៍មួយកាលពីរសៀលថ្ងៃពុធ ទី២៣ ខែកញ្ញា។
លោក រាជ សម្បត្តិ បានមានប្រសាសន៍ថា ៖ «ខ្ញុំណែនាំឲ្យស្គាល់គឺឯកឧត្ដម អ៊ុត ឈន គាត់ត្រូវបានអង្គការសហប្រជាជាតិនិងរាជរដ្ឋាភិបាលកម្ពុជាតែងតាំងធ្វើជាអ្នកប្រឹក្សាយោបល់ឯករាជប្រចាំសាលាយើងនេះ»។
លោក អ៊ុត ឈន អគ្គសវនករជាតិកម្ពុជា ត្រូវបានរដ្ឋាភិបាលកម្ពុជា និងអង្គការសហប្រជាជាតិសម្រេចជ្រើសតាំងជាអ្នកពិគ្រោះយោបល់ឯករាជសម្រាប់សាលាក្តីខ្មែរក្រហម កាលពីថ្ងៃទី១១ ខែសីហា ឆ្នាំ២០០៩។
នៅក្នុងសន្និសីទសារព័ត៌មានកាលពីរសៀលថ្ងៃពុធ លោក អ៊ុត ឈន ថ្លែងទៅកាន់អ្នកកាសែតថា លោករីករាយនឹងការងារថ្មីនេះ ហើយបានចាប់ផ្តើមការងារជាបណ្តើរៗហើយ។
ចំពោះចំណោទថា តើលោកត្រូវចាប់ផ្តើមការងារដោយរបៀបណា លោក អ៊ុត ឈន ថ្លែង ៖ «ការងារដែលខ្ញុំធ្វើគឺផ្អែកតាមកិច្ចព្រមព្រៀងនេះ គឺខ្ញុំមានភារកិច្ចទទួលព័ត៌មានទាំងឡាយដែលអ្នកធ្វើការនៅក្នុងនេះអាចលើកសំណើឡើង។ បើពាក្យគេនិយាយក្នុងនេះ គេនិយាយថា ពាក្យបណ្ដឹងឬក៏តវ៉ា។ អ៊ីចឹងភារកិច្ចរបស់ខ្ញុំទី១ត្រូវទទួលពាក្យបណ្ដឹងឬក៏ពាក្យតវ៉ាដែលបងប្អូនលើកឡើងនៅក្នុងនេះ ខ្ញុំមិនគិតថា ពាក្យបណ្ដឹងឬក៏តវ៉ានោះត្រឹមត្រូវឬក៏ខុសយ៉ាងណាទេ គឺខ្ញុំទទួលទាំងអស់»។
ទាក់ទងនឹងការតែងតាំងលោក អ៊ុត ឈន ជាអ្នកពិគ្រោះយោបល់ឯករាជសម្រាប់សាលាក្តីខ្មែរក្រហម ត្រូវបុគ្គលិកខ្មែរមួយរូបដែលធ្វើការនៅសាលាក្តីខ្មែរក្រហម ថ្លែងស្វាគមន៍ថា ៖ «បើតាមស្ដាប់មើលជំហរគាត់អីគាត់ហ្នឹងល្អ ហាក់បីដូចថាកិច្ចព្រមព្រៀងហ្នឹងច្បាស់លាស់គួរឲ្យទុកចិត្តបាន»។
ការតែងតាំងជាអ្នកពិគ្រោះយោបល់ឯករាជសម្រាប់សាលាក្តីខ្មែរក្រហមរបស់លោក អ៊ុត ឈន ត្រូវបានឲ្យដឹងថា ជាមុខតំណែងបន្ថែមមួយទៀតលើមុខតំណែងបច្ចុប្បន្នរបស់លោកជាអគ្គសវនករជាតិកម្ពុជានៅក្នុងរាជរដ្ឋាភិបាលកម្ពុជា។
លោក អ៊ុត ឈន ថ្លែងថា លោកនឹងបើកឲ្យមានមធ្យោបាយទំនាក់ទំនងនិងភ្នាក់ងាររបស់លោកក្នុងពេលឆាប់ៗខាងមុខ។ លោកសង្ឃឹមថា អ្នកដែលមានបំណងដាក់ពាក្យបណ្តឹងផ្សេងៗនិងជឿទុកចិត្តលើការងាររបស់លោក ព្រោះលោកនឹងរក្សាការសម្ងាត់ជូនអ្នកដាក់ពាក្យបណ្តឹងទាំងនោះ។
សូមជម្រាបជូនថា ការតែងតាំងអ្នកពិគ្រោះយោបល់ឯករាជសម្រាប់សាលាក្តីខ្មែរក្រហម គឺជាយន្តការមួយដើម្បីពង្រឹងការគ្រប់គ្រងធនធានមនុស្សនៅក្នុងសាលាក្តីខ្មែរក្រហម រួមទាំងជាយន្តការប្រយុទ្ធប្រឆាំងអំពើពុករលួយផងដែរ បន្ទាប់ពីមានការចោទប្រកាន់ថា មានអំពើពុករលួយនៅក្នុងផ្នែករដ្ឋបាលសាលាក្តីខ្មែរក្រហមក្នុងពេលកន្លងមក៕