ទូកដឹកជញ្ជូនភ្ញៀវទេសចររបស់ពលរដ្ឋក្នុងសហគមន៍ ឃុំតាតៃក្រោម ស្រុកកោះកុង ខេត្តកោះកុង ដែលកំពុងដឹកជញ្ជូនភ្ញៀវទេសចរជាតិនិងអន្តរជាតិ បានធ្វើដំណើរពីស្ពានភូមិដូង ឆ្លងកាត់ស្ទឹងតាតៃ ឆ្ពោះទៅតំបន់ទេសចរណ៍ធម្មជាតិទឹកធ្លាក់ ដែលមានចម្ងាយ៥គីឡូម៉ែត្រ។
នៅពេលធ្វើដំណើរតាមទូក អ្នកទេសចរអាចគយគន់ទេសភាព ធម្មជាតិ ព្រៃភ្នំ និងស្រូបយកខ្យល់អាកាសបរិសុទ្ធ។
អ្នកទេសចរម្នាក់មកពីភ្នំពេញ លោក វុន ឡេង ដែលកំពុងជិះទូកដែលដឹកជញ្ជូនដោយពលរដ្ឋក្នុងសហគមន៍ បានបង្ហាញការចាប់អារម្មណ៍ចំពោះតំបន់ទេសចរណ៍ធម្មជាតិតាតៃ។ លោកថា នេះជាលើកទី១ហើយដែលលោកនិងក្រុមគ្រួសារមកកម្សាន្តតំបន់នេះ ៖ "បាទសប្បាយដែលតើ វាប្លែកភ្នែកណា ហើយនាំកូនមកលេងទាំងអស់គ្នាសប្បាយណា (សុណង) លោកពូហេតុអីបានជ្រើសរើសយកតំបន់តាតៃ? បានឃើញកន្លែងហ្នឹងប្លែកហើយថ្មី កន្លែងហ្នឹងអាកាសធាតុល្អ ហើយព្រៃស្រស់ៗមើលទៅ តាមទូកចេះតែខ្លាចតិចៗដែរ ប៉ិនយើងមានអាវការពារពាក់ដែរ"។
ពលរដ្ឋខ្មែររស់នៅប្រទេសអូស្ត្រាលី អ្នកស្រី វណ្ណា និងក្រុមគ្រួសារមានគ្នាប្រមាណ១០នាក់ ដែលបានមកដល់តំបន់ទឹកធ្លាក់តាតៃ បានថ្លែងថា គាត់បានស្គាល់តំបន់ទេសចរណ៍ធម្មជាតិតាតៃនេះតាមរយៈការផ្សព្វផ្សាយពីទូរទស្សន៍ ៖ "ចៅៗចេះតែចង់មកឃើញ។ ឃើញហើយសប្បាយទេចៅ? សប្បាយៗ ទាំងអស់គ្នា ហើយត្រជាក់ស្រួល ខ្យល់អាកាសត្រជាក់ ចៅអត់មានដាក់ខោអាវងូតទឹកមក អត់ដឹងបើដឹងតែទឹកធ្លាក់ល្អអ៊ីចឹងដាក់ខោអាវមកហើយ បើដឹងថាទឹកធ្លាក់ល្អអ៊ីចឹងដាក់ខោអាវមកហើយ។ (សុណង) តើចង់ឲ្យមានការកែលម្អអ្វីទៀតទេ?ខ្ញុំមើលទៅល្អហើយ ប៉ុន្តែកន្លែងកាណូតចុះមកមិញអត់មានកំពង់ផែ ចុះមកដូចកុំឲ្យខ្លាច ព្រោះក្មេងៗវាខ្លាច"។
ប្រធានផ្នែកដឹកជញ្ជូនភ្ញៀវរបស់សហគមន៍ទេសចរណ៍ធម្មជាតិតាតៃក្រោម លោក ជា ច័ន្ទសេដ្ឋា បានថ្លែងថា ទូកទេសចរណ៍របស់សហគមន៍សម្រាប់បម្រើសេវាកម្មដឹកជញ្ជូនភ្ញៀវកម្សាន្តមានចំនួន២២ទូក។ លោកថា ការនាំអ្នកទេសចរខ្មែរនិងបរទេស ជិះកម្សាន្តតាមទូកនេះ ទាំងទៅទាំងមកមានតម្លៃ១៦ដុល្លារដូចគ្នា។ លោកបន្តថា មានកន្លែងជាច្រើន ដែលភ្ញៀវមកកម្សាន្តនៅទីនេះ ហើយជាប់ចិត្ត ៖ "បាទដឹកពីមុខស្នាក់ការសហគមន៍ហ្នឹង ទៅទឹកជ្រោះ ពីសហគមន៍ទៅតាតៃកោះអណ្ដែតនៅតាតៃក្រោមនោះ ភ្ញៀវទៅលេងមានភូមិបុរាណៗមានច្រើនកន្លែង ដែលគេអភិរក្សដើមឈើមានតម្លៃនៅក្នុងស្រុកយើងហ្នឹង គាត់ទុកដើម្បីឲ្យភ្ញៀវទៅលេង ភ្ញៀវក៏ចូលចិត្តទៅលេងខាងក្រោមផង ខាងលើផង"។
ក្រៅពីការជិះទូកដែលដឹកជញ្ជូនដោយសហគមន៍ទេសចរណ៍មកតំបន់ទឹកធ្លាក់តាតៃនេះ អ្នកទេសចរខ្លះអុំទូកលេង ហែលទឹកលេង ងូតទឹកធ្លាក់តាមល្បាក់ថ្ម ជិះខ្សែរ៉តឆ្លងកាត់ស្ទឹង អង្គុយស្ទូចត្រី និងខ្លះស្រូបយកខ្យល់អាកាស ហើយទទួលទានអាហារថ្ងៃត្រង់រួមគ្នា។
អ្នកទេសចរណ៍បរទេសម្នាក់ដែលមកហែលទឹកលេងនៅទឹកធ្លាក់តាតៃជាមួយគូរសង្សាររបស់គាត់ លោក ចន ម៉ុំាំងហ្គ័រ (John Mungir)មកពីសហរដ្ឋអាមេរិក បានថ្លែងទាំងទឹកមុខរីករាយថា គាត់ចូលចិត្តធម្មជាតិនៅទីនេះ ៖ "ខ្ញុំមានអារម្មណ៍ល្អខ្លាំងណាស់ចំពោះធម្មជាតិនៅទីនេះ ពីព្រោះមើលទៅទឹកថ្លាល្អ មានផ្ទាំងថ្ម មានកូនត្រីតូចៗជាច្រើន ជាពិសេសមានកន្លែងហែលទឹកច្រើនកន្លែង មើលទៅស្រស់ស្អាត ណាស់ រីឯអាកាសធាតុវិញមិនក្ដៅពេកទេ"។
មគ្គុទ្ទេសក៍នាំភ្ញៀវទេសចរណ៍របស់ក្រុមហ៊ុន ហ្វ័ររីវឺ ខេត្តកោះកុង លោក ណែម ទីរិន ដែលកំពុងថតរូបឲ្យភ្ញៀវទេសចរនៅទឹកធ្លាក់តាតៃ បានរៀបរាប់ថា ក្នុងខេត្តកោះកុងមានតំបន់រមណីយដ្ឋានធម្មជាតិជាច្រើន។ ហើយថាទឹកធ្លាក់តាតៃនេះ ជាទីកន្លែងមួយដែលពេញនិយមនាពេលបច្ចុប្បន្នចំពោះភ្ញៀវដែលមកដល់ខេត្តកោះកុង ដាច់ខាតត្រូវតែឆ្លៀតចូលលេងនិងងូតទឹកទីនេះ និងមើលព្រៃកោងកាង ៖ "ទីមួយគឺកន្លែងនេះទឹកជ្រោះតាតៃ ទី២គឺនៅស្ពានក្រសោបព្រៃកោងកាង ហើយប្រជាជនខ្មែរភាគច្រើនគេចូលចិត្តទៅមើលសាហ្វារីវឺ សួនសត្វ និងកាស៊ីណូ។ នៅបឹងកាយ៉ាក ស្ពានក្រសោបក៏គេធ្វើជាលក្ខណៈកោងកាងដែរ តែគេធ្វើជាស្ពានមួយយប់ឡើងអាចដើរយប់ឡើងអាចឃើញអំពិលអំពែកដែលវាបិទបើកយប់ឡើងដូចដើមគ្រីស្តស្មាសអ៊ីចឹង ស្អាតខ្លាំងណាស់"។
ភ្ញៀវទេសចរដែលមកកម្សាន្តខេត្តនេះក្នុងមួយឆ្នាំៗ មានជាង៦ម៉ឺននាក់។ ហើយតំបន់ទេសចរណ៍ធម្មជាតិតាតៃ គឺមានភ្ញៀវទៅលេងកម្សាន្តប្រមាណជាង៣ពាន់ទៅ៤ពាន់នាក់ដោយសារក្នុងមួយឆ្នាំ រមណីយដ្ឋាននេះទើបតែអភិវឌ្ឍន៍ឡើងនៅឆ្នាំ២០០៩ នេះបើតាមការអះអាងរបស់លោក ប៊ុន បៀវ ប្រធានមន្ទីរទេសចរណ៍ខេត្តកោះកុង។
ប្រធានសហគមន៍ទេសចរធម្មជាតិតាតៃក្រោម លោក ទេព ម៉ាឡា មានប្រសាសន៍ថា ដើម្បីចូលរួមចំណែកពង្រឹងវិស័យទេសចរធម្មជាតិក្នុងសហគមន៍នេះ ពលរដ្ឋដែលរកបានពីការផ្ដល់សេវាកម្មជូនភ្ញៀវទេសចរបានរួមចំណែកសម្រាប់ការងារអភិវឌ្ឍន៍ទេសចរណ៍តំបន់នេះបន្តិចបន្តួច។ លោកថា ក្នុង១ខែសហគមន៍អាចទទួលបានប្រាក់ចំណូលជាង១លានរៀល ទៅ២លានរៀល អាស្រ័យទៅលើភ្ញៀវទេសចរណ៍ដែលមកកម្សាន្តមិនទៀងទាត់នោះទេ ៖ "សហគមន៍បានថវិកាមកពីណា ថវិកាទី១សេវាទូកបង់ឲ្យ៥ពាន់រៀល សេវាទី២លក់សំបុត្រនៅច្រកចូលតំបន់ទឹកធ្លាក់ គ្រាន់តែបង់ឲ្យយោធាអស់២៥ភាគរយ។ អ៊ីចឹងសហគមន៍បានផ្នែកតូចមួយបានផលប្រយោជន៍ពីភ្ញៀវដែលចូលមក សហគមន៍ក៏អត់បានប្រាក់ខែដែរគាត់បានផលប្រយោជន៍ពីហ្នឹងមកគាត់ទ្រទ្រង់គណៈកម្មការខ្លះគាត់បែងចែកទៅផ្នែករដ្ឋបាល មានធ្វើផ្លាកសញ្ញា មានធ្វើធុងសំរាមមានអីធ្វើគ្រប់យ៉ាង លុយហ្នឹងបានមកតម្កល់៥០ភាគរយសម្រាប់ទ្រទ្រង់គណៈកម្មការ"។
សហគមន៍ទេសចរណ៍តាតៃនេះ បានអំពាវនាវឲ្យភ្ញៀវទេសចរដែលមកកម្សាន្តតំបន់នេះ ចូលរួមថែរក្សាបរិស្ថាន និងគ្រប់គ្រងសំរាម ព្រោះតំបន់ទេសចរណ៍ធម្មជាតិតាតៃជាប្រភពចំណូលមួយដ៏សំខាន់ដែលបានផ្ដល់ការងារឲ្យពលរដ្ឋក្នុងសហគមន៍ នាំឲ្យពលរដ្ឋក្នុងឃុំតាតៃក្រោម មានជីវភាពធូរធារ និងបានដកខ្លួនពីការប្រកបមុខរបរនេសាទ និងកាប់រានព្រៃឈើ ហើយងាកមកអភិរក្សធនធានធម្មជាតិសម្រាប់ទាក់ទាញភ្ញៀវទេសចរវិញ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។