មាតាបិតាសិស្សសុំឲ្យអាជ្ញាធរលុបបំបាត់ល្បែងហ្គេមនៅខេត្តពោធិ៍សាត់
H072212PB
មាតាបិតា និងអាណាព្យាបាលសិស្សទាំងនោះសំណូមពរឲ្យអាជ្ញាធរជួយលុបបំបាត់ល្បែងហ្គេមនេះផង។
ប្រជាពលរដ្ឋនៅសង្កាត់ផ្ទះព្រៃ ក្រុងពោធិ៍សាត់ជាច្រើននាក់ បានឲ្យដឹងថា កូនចៅពួកគាត់បានវក់នឹងការលេងហ្គេមតាមកុំព្យូទ័រ និងគេចមិនចូលសាលារៀន។
បុរសឈ្មោះ សុខ ខេង ជាប្រជាពលរដ្ឋនៅភូមិចម្ការចេកខាងជើង សង្កាត់ផ្ទះព្រៃ ក្រុងពោធិ៍សាត់។គាត់បានឲ្យដឹងនៅព្រឹកថ្ងៃទី២២ កក្កដាថា កូនប្រុសគាត់បានគេចសាលាអស់ជាច្រើនថ្ងៃ រហូតដល់ពេលដែលគ្រូប្រចាំថ្នាក់ផ្ញើលិខិតមកព្រមាន ទើបគាត់ដឹង។ គាត់ថា ដល់គាត់តាមដានទៅទើបដឹងថា កូនគាត់គេចទៅលេងហ្គេម (Game)។
លោក សុខ ខេង៖ «វាប៉ះពាល់ដល់ក្មេងកូនខ្ញុំកូនគេ នៅម្ដុំផ្ទះខ្ញុំក្រោយប៉ុស្តិ៍លេខ ១០ មានបើកល្បែងហ្គេម ធ្វើឲ្យក្មេងៗ វាលែងរៀនលែងសូត្រ។ វានៅសម្ងំលេងហ្គេមនៅហ្នឹង។មិនដឹងជានៅក្នុងហ្នឹងមានអ្វីខ្លះបានជាក្មេងៗ វាវក់លែងចង់រៀនសូត្រអីអស់ហើយ»។
ស្ត្រីអ្នកភូមិដែលសុំមិនបញ្ចេញឈ្មោះ បានឲ្យដឹងបន្ថែមថា ត្រង់ម្ដុំខាងក្រោយប៉ុស្តិ៍លេខ ១០ និងខាងមុខសាលាបឋមសិក្សាពោធិ៍សាត់ជាដើម ក៏មានបើកល្បែងហ្គេមកុំព្យូទ័រយ៉ាងគគ្រឹកគគ្រេងដែរ។
សំឡេង៖ «ពីមុនមានល្បែងភ្នាល់បាល់។ តែឥឡូវគេបើកជាល្បែងហ្គេមស៊ីសងដាក់លុយ។កូនខ្ញុំអីទៅលេងនៅហ្នឹង ចោលរៀនចោលសូត្រអីអស់ហើយ។ យើងនិយាយយ៉ាងម៉េចក៏វាអត់ស្ដាប់ដែរវាលួចទៅលេងមិនចូលសាលាទេ»។
ប្រភពពីប្រជាពលរដ្ឋបានឲ្យដឹងថា ល្បែងហ្គេមកុំព្យូទ័រជាច្រើនកន្លែងកំពុងដំណើរការនៅទូទាំងក្រុងពោធិ៍សាត់។ ប្រជាពលរដ្ឋទាំងនោះបារម្ភថា បើអាជ្ញាធរគ្រប់លំដាប់ថ្នាក់ នៅតែបណ្ដោយឲ្យល្បែងហ្គេមជ្រកក្រោមផ្លាកសាលាបង្រៀនកុំព្យូទ័របន្តបើកដោយគ្មានការគ្រប់គ្រង និងត្រួតពិនិត្យដូច្នេះ កុមារ និងយុវវ័យជាច្រើន នឹងបាត់បង់អនាគត ដោយសារតែពួកគេវក់លេងហ្គេមបោះបង់ចោលការសិក្សា។
នាយប៉ុស្ដិ៍នគរបាលរដ្ឋបាលសង្កាត់ផ្ទះព្រៃលោក ពេជ្រ ស៊ីផាន់ ទទួលស្គាល់ថា ពិតជាមានការបើកល្បែងហ្គេមកុំព្យូទ័រ នៅក្នុងសង្កាត់នេះមែន។ ប៉ុន្តែលោកថា គេសុទ្ធតែមានច្បាប់អនុញ្ញាតពីមន្ទីរជំនាញ គឺមន្ទីរប្រៃសណីយ៍ និងទូរគមនាគមន៍។ ដូច្នេះ អាជ្ញាធរដែនដីមិនមានលទ្ធភាពអ្វីទៅហាមឃាត់គេបានឡើយ។
លោក ពេជ្រ ស៊ីផាន់៖ «ខាងខ្ញុំធ្លាប់ទៅសួរនាំគេដែរ គេបានឲ្យលិខិតអនុញ្ញាតពីមន្ទីរប្រៃសណីយ៍ និងទូរគមនាគមន៍ឲ្យមើល។ ដល់តែគេមានច្បាប់អ៊ីចឹង យើងក៏មិនដឹងធ្វើអីគេដែរហ្នឹង»។
ទាក់ទិនចំពោះបញ្ហានេះ ប្រធានមន្ទីរប្រៃសណីយ៍ និងទូរគមនាគមន៍ ខេត្តពោធិ៍សាត់ គឺលោក អ៊ូ ឆៃ មានប្រសាសន៍ថា មន្ទីរចេញច្បាប់អនុញ្ញាតឲ្យសាមីជនបើកធ្វើអាជីវកម្មអ៊ីនធើរណិត (Internet) ពុំមែនឲ្យបើកល្បែងហ្គេមនោះទេ។ លោកថា មន្ទីរវប្បធម៌ ជាអ្នកត្រួតពិនិត្យបញ្ហាហ្គេមក្នុងកុំព្យូទ័រនេះ។
លោក អ៊ូ ឆៃ៖ «បាទ! អាហ្នឹងយើងផ្ដល់ច្បាប់ឲ្យគេបើកអ៊ីនធើរណេតមើលព័ត៌មានផ្សេងៗ។តែបើខាងហ្គេម គឺខាងមន្ទីរវប្បធម៌ជាអ្នកគ្រប់គ្រង»។
យ៉ាងនេះក្ដី ប្រធានមន្ទីរវប្បធម៌ និងវិចិត្រសិល្បៈខេត្តពោធិ៍សាត់លោក អ៊ុក សាវុធ មានប្រសាសន៍ថា មន្ទីរធ្លាប់បានហាមឃាត់កន្លែងអាជីវកម្មអ៊ីនធើរណេត មិនឲ្យបើកលេងប្រភេទហ្គេម ដែលមានលក្ខណៈជាល្បែងស៊ីសងទេ។ ជាពិសេស គឺកន្លែងអាជីវកម្មអ៊ីនធើរណេត ដែលមានទីតាំងនៅជិតសាលារៀន។ លោកថា នឹងចុះទៅធ្វើការត្រួតពិនិត្យបញ្ហានេះក្នុងពេលដ៏ឆាប់ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
សុំមិនបពេ្ចញឈ្មោះ
ពី ភ្នំពេញហេ្គមអាចញ្ឈប់បាន ព្រោះក្នុងប្រទេសមានបំរើសេវាអនឡញហេ្គម(Server Online Games) និយាយឲចំបើបិតទីកន្លែងផ្តល់សេវាហ្តេម
Jul 23, 2012 10:27 AM
Dara
ពី Phnom Penhល្បែងហ្គេមមានគ្រប់កន្លែងក្នុងក្រុងភ្នំពេញ ធ្វើឲយុវសិស្សភាគច្រើនគេចសាលានិងបោះបង់ការសិក្សា អនាគតរបស់យុវជនប្រឈមនឹងផលវិបាកដ៏ធ្ងន់ធ្ងរ ព្រោះថាយុវជន ជាទំពាំងស្នងឫស្សី។ទោះបី ចំណូលដែលបានមក ពី ល្បែងហ្គេមនេះ វាមិនស្មើនឹងការខាតបង់ របស់យុវជន ប្រទេសជាតិ ប្រឈមនឹងការបាត់បង់ធនធានមនុស្ស ដែលធ្វើឲការអភិវឌ្ឍន៍មានចលនាថយក្រោយ មិនអាចប្រៀបជាមួយបណ្តាប្រទេសក្នុងតំបន់។
Jul 23, 2012 02:15 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
