ការទទួលខុសត្រូវលើប្រព័ន្ធអប់រំនៅកម្ពុជា
ho.mp3
សម្រាប់កម្ពុជា អ្នកសិក្សាស្រាវជ្រាវមើលឃើញថា ការទទួលខុសត្រូវលើគុណភាពសិក្សាអប់រំនៅមានកម្រិត ឬមានគុណភាពទាបនៅឡើយ ប្រើធៀបនឹងប្រទេសជិតខាងនៅក្នុងតំបន់។
អ្នកតាមដាន និងសិក្សាពីបញ្ហាអភិវឌ្ឍន៍សង្គមបានចង្អុលបង្ហាញថា ប្រទេសមួយដែលមានអ្នកដឹកនាំដែលមានគុណធម៌ មានការទទួលខុសត្រូវខ្ពស់ និងមានការរីកចំរើនឆាប់រហ័សទៅបាននោះ ត្រូវការជាចម្បង គឺធនធានមនុស្ស។ ធនធានមនុស្សនោះទៀតសោត គឺត្រូវតែប្រសូតចេញពីគ្រឹះស្ថានបណ្ដុះបណ្ដាលចំណេះដឹងដែលមានការទទួលខុសត្រូវគុណភាពជាចម្បង។
ការអប់រំនៅប្រទេសកម្ពុជា គេឃើញមានរបៀបអប់រំពីរជាសំខាន់ គឺការអប់រំក្នុងប្រព័ន្ធ និងការអប់រំក្រៅប្រព័ន្ធ ហើយប្រព័ន្ធទាំងពីរនេះ ត្រូវតែមានការយកចិត្តទុកដាក់ស្មើគ្នា ដោយរដ្ឋជាអ្នកដើរតួយ៉ាងសំខាន់លើបញ្ហានេះ។
ទាក់ទងបញ្ហានេះ អ្នកស្រាវជ្រាវលើការអភិវឌ្ឍសង្គម លោក កែម ឡី មានប្រសាសន៍ថា ការទទួលខុសត្រូវលើការអប់រំនៅកម្ពុជា នៅមានកម្រិតតិចតួចនៅឡើយ។ លោកថា ជារូបភាពខាងក្រៅគេឃើញមានសាលា ឬសកលវិទ្យាល័យច្រើន មានអ្នកចូលរៀនច្រើនគួរឲ្យកត់សម្គាល់ ប៉ុន្តែសិស្សទាំងនោះមិនប្រាកដថា នឹងមានការទទួលខុសត្រូវរហូតពេលរៀនចប់ពីមួយកម្រិតទៅមួយកម្រិតនោះគេនឹងបានទទួលការងារធ្វើ ឬក៏យ៉ាងណា។
លោកបន្តថា អ្នកគ្រប់គ្រងលើវិស័យនេះក៏មិនបានបង្ហាញឲ្យឃើញពីការទទួលខុសត្រូវខ្ពស់ដែរ ទាក់ទងនឹងការតម្រង់ទិសដល់យុវសិស្សឲ្យមានទំនុកចិត្តលើមុខវិជ្ជាដែលខ្លួនបានរៀន និងចំណង់ចំណូលចិត្តរបស់គេទៅអនាគត។
ចំណែកលោក សុខ ទូច ជាបណ្ឌិតផ្នែកវិទ្យាសាស្ត្រនយោបាយ និងជាសកលវិទ្យាធិការនៃសាកលវិទ្យាល័យខេមរៈ មានប្រសាសន៍ថា ជាការលំបាកមួយសម្រាប់ការវាយតម្លៃចំពោះការទទួលខុសត្រូវលើការអប់រំ ប៉ុន្តែលោកទទួលស្គាល់ថា ផ្នែកវិទ្យាសាស្ត្រពិត កម្ពុជាកំពុងឈានជំហានក្រោយគេឆ្ងាយ បើប្រៀបធៀបនឹងប្រទេសនៅក្នុងតំបន់។
លោកថា ការអប់រំនៅកម្ពុជា កំពុងទាញយកបរិមាណជាងគុណភាព ហើយចំពោះការសិក្សា និស្សិតច្រើននិយមរត់តាមទីផ្សារការងារជាងតាមចំណង់ចំណូលចិត្ត ឬទេពកោសល្យរបស់ខ្លួន។
លោកបន្តថា អ្នកទទួលខុសត្រូវលើបញ្ហានេះ គឺក្រសួងអប់រំ ដែលជាស្ថាប័នអាណាព្យាបាល បន្ទាប់មកសង្គមជាតិ និងសង្គមគ្រួសារ ក៏ចូលរួមយ៉ាងសំខាន់ នោះទើបការអប់រំរបស់យុវជនទទួលបានលទ្ធផលជាវិជ្ជមានត្រឡប់មកវិញ។
មន្ត្រីក្រសួងអប់រំជាច្រើន នៅថ្ងៃពុធ ទី២៤ តុលា សុំមិនធ្វើអត្ថាធិប្បាយលើបញ្ហានេះទេ ដោយសារមានភារៈរវល់ច្រើន។ ប៉ុន្តែលោកនាយករដ្ឋមន្ត្រី ហ៊ុន សែន កាលពីថ្មីៗនេះ បានប្រកាសថា នឹងកែទម្រង់វិស័យអប់រំឲ្យបានប្រសើរថែមទៀត នៅពេលដ៏ឆាប់ខាងមុខនេះ។
ប្រធានបណ្ដាញរួបរួមដើម្បីគណនេយ្យភាពសង្គម លោក សន ជ័យ មានប្រសាសន៍ថា រដ្ឋាភិបាលគួរតែបង្ហាញពីការទទួលខុសត្រូវលើវិស័យនេះឲ្យច្បាស់លាស់ ដោយត្រូវដាក់វិស័យអប់រំជាវិស័យសំខាន់ ចម្បងជាគេក្នុងចំណោមវិស័យដទៃទៀត។
ក្រុមអ្នកឃ្លាំមើលលើវិស័យនេះ បានផ្ដល់យោបល់ថា ការទទួលខុសត្រូវនេះគេត្រូវគិតតាំងពីថ្នាក់ក្រោមមក រហូតដល់ថ្នាក់ខ្ពស់ទើបជាការប្រសើរ ហើយការអប់រំដែលមានការទទួលខុសត្រូវនោះ ត្រូវចាំបាច់បញ្ចូលការអប់រំលើសីលធម៌សង្គមឲ្យបានច្រើន ហើយអ្នកដឹកនាំសង្គមត្រូវតែទុកនូវគំរូល្អសម្រាប់អ្នកសិក្សា ធ្វើយ៉ាងណាឲ្យពួកគេយល់ច្បាស់ពីតម្លៃនៃទំពាំងស្នងឫស្សីរបស់ជាតិទៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
លោកស្រប
ពី ភ្នំពេញមុននឹងមានយោបល់លើការទទួលខុសត្រូវ និងទឹសដៅរបស់ការអប់រំ សូមអស់លោកបើកភ្នែកមើល ឬរកព៌័តមាន មានជាអាទ៍គេហ៍ទំព័ររបស់ក្រសួងអប់រំ នោះអស់លោកនឹងជ្រួតជ្រាប មិនអគតិបែបនេះទេ។
Oct 26, 2012 06:44 PM
ចូច
ពី អកឡិនដរាបណា អ្នកដឹកនាំមិនអោយតម្លៃដល់អ្នកចេះដឹងទេ (អ្នកអប់រំ) នោះការនិយាយរបស់គាត់ ដែលថាចង់អភិវឌ្ឈ ប្រទេសជាតិ គឺជាការនិយាយបោកប្រាស់រាស្ត្រសុទ្ធសាធ។ ប្រទេសជាតិ មានតែអ្នកល្ងង់ តើអភិវឌ្ឈយ៉ាងម៉េចកើត។ អ្នកដឹកនាំល្ងង់ ប្រើមនុស្សល្ងង់ក្នុងការដឹកនាំជាតិ ពិតជាគួរអោយអស់សំណើចណាស់។
Oct 25, 2012 11:05 AM
ចូច
ពី អកឡិនឆ្នាំនេះ សិស្សដែលទទួលបាននិទ្ទេសA មានចំនួន105នាក់ គឺជាចំនួនច្រើនបំផុតនៅក្នុងប្រវត្តិសាស្ត្ររបស់ដែកចូ។ តើអស់លោកមិនជឿថា ស្រុកខ្មែរបច្ចុប្បន្ន ការអប់រំមានគុណភាពទេឬ? បើអស់លោកមិនជឿ បានន័យថា អស់លោកគឺសុទ្ធតែពួកប្រឆាំងនឹងចន្តប្រវត្តិសាស្ត្រដែកចូ។ បើតាមមាត្រាទី...នៃមាត្រារបស់សម័យដែកចូ គឺអស់លោកអាចជាប់ពន្ធនាគារ ពីបទធ្វើដំណើរច្រាស់ទិស ចរន្តប្រវត្តិសាស្ត្ររបស់ដែកចូ។
Oct 25, 2012 10:37 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
