គ្រូបង្រៀនមិនសប្បាយចិត្តចំពោះការកាត់ប្រាក់ខែបន្ថែមម៉ោងនៅខេត្តព្រះសីហនុ
h081312cp.mp3
លោកគ្រូ អ្នកគ្រូ អះអាងថា អនុប្រធានការិយាល័យអប់រំស្រុកកំពង់សីលា លោក ឡុង គឹមផា សុំឲ្យលោកគ្រូ អ្នកគ្រូ ដែលមានថ្នាក់បង្រៀនពីរវេនកាត់ប្រាក់ខែមួយខែដំបូងឲ្យមន្ទីរអប់រំខេត្ត។
លោកគ្រូម្នាក់សុំមិនឲ្យបញ្ចេញឈ្មោះ មានប្រសាសន៍ថា ចំពោះការកាត់ប្រាក់ខែនោះ អនុប្រធានការិយាល័យស្រុកមិនបានបញ្ជាក់ពីមូលហេតុច្បាស់លាស់ ថាតើការកាត់ប្រាក់ខែរបស់លោកគ្រូ អ្នកគ្រូនេះ យកទៅធ្វើអ្វីនោះឡើយ។
លោកអះអាងបន្តថា លោក គឹមផា បានចុះដល់សាលារៀន ថ្នាក់បឋមសិក្សា ហើយសុំឲ្យនាយកសាលានីមួយៗស៊ីញេយល់ព្រមចំពោះការកាត់ប្រាក់ខែនោះ៖ «គាត់អ្នកដើរតាមសាលារៀនឲ្យនាយកគ្រប់នាយកសាលាខ្លះ ចុះហត្ថលេខាឲ្យគាត់ឲ្យប្រាក់ខែគ្រូៗម្នាក់មួយខែ។ ការបង្រៀនពីរពេលហ្នឹង បង្រៀនព្រឹកផង ល្ងាចផង ដូចថាបើយើងបង្រៀនព្រឹក អាហ្នឹងបោះរដ្ឋទេ បើយើងបង្រៀនល្ងាច អាហ្នឹងស៊ីប្រាក់ខែ។ ខ្វះគ្រូបង្រៀន ដល់ពេលអ៊ីចឹងទៅ ខ្វះគ្រូបង្រៀន ប្រាក់ខែហ្នឹងមួយឆ្នាំ ឬ១០ខែទើបបើកម្ដង»។
លោកគ្រូរូបនោះឲ្យដឹងបន្តថា មានលោកគ្រូបង្រៀនជាច្រើនសម្ដែងការមិនពេញចិត្តចំពោះទង្វើរបស់អនុប្រធានការិយាល័យអប់រំស្រុក ដែលសុំឲ្យគ្រូកាត់ប្រាក់ខែរបស់ពួកគាត់ឲ្យទៅមន្ទីរអប់រំខេត្តនោះ។
ស្របគ្នានេះដែរ អ្នកគ្រូម្នាក់ទៀត នៅស្រុកកំពង់សីលា ដែរ ឲ្យដឹងថា នាងមិនសប្បាយចិត្តទាល់តែសោះចំពោះការកាត់ប្រាក់ខែដែលជាញើសឈាមរបស់នាង ប៉ុន្តែនាងមិនហ៊ាននិយាយ បើនិយាយទៅខ្លាចថ្នាក់លើគេរករឿង និងបញ្ឈប់នាងលែងឲ្យថ្នាក់បង្រៀនពីរពេលបន្តទៀត៖ «ដឹងថាគេសុំក៏នាំគ្នាឲ្យគេទៅ ព្រោះបើយើងមិនឲ្យគេ ខ្លាចគេមិនឲ្យលុយពេល ដូច្នេះចេះតែឲ្យគេទៅ»។
ប្រហាក់ប្រហែលគ្នានេះ អ្នកគ្រូម្នាក់ទៀត សុំមិនបញ្ចេញឈ្មោះ អះអាងថា បន្ទាប់ពីដឹងថាប្រាក់ខែរបស់ខ្លួនត្រូវគេកាត់ដោយឥតបានដឹងពីមូលហេតុច្បាស់លាស់បែបនេះ នាងហាក់មានអារម្មណ៍មិនសប្បាយចិត្តដែរ តែនាងមិនដឹងត្រូវធ្វើយ៉ាងណានោះឡើយ ព្រោះលោកគ្រូ អ្នកគ្រូម្នាក់ៗសុទ្ធតែត្រូវគេកាត់ប្រាក់ខែគ្រប់ៗគ្នា៖ «ពេលគេមកសុំហ្នឹង រាងអត់ចិត្តដែរ ប៉ុន្តែមិនដឹងធ្វើម៉េច បើគេមកសុំគ្រប់គ្នា ហើយគេឲ្យគ្រប់គ្នា ព្រោះអីនាយកខ្ញុំពេលគេចុះមក គាត់ក៏ឲ្យខ្ញុំទៅស្ដាប់ដែរ ព្រោះគាត់ខ្លាចពួកខ្ញុំថា គាត់កិបកេងអ៊ីចឹង តែតាមពិតខាងការិយាល័យអ្នកយក»។
វិទ្យុអាស៊ីសេរី មិនអាចសុំការបកស្រាយពីលោក ឡុង គឹមផា បានទេ នៅថ្ងៃទី១៣ សីហា ឆ្នាំ២០១២ នេះ ដោយលោកប្រាប់ថា បើសិនចង់ដឹងពីបញ្ហានេះ សុំទាក់ទងទៅមេរបស់លោក គឺលោក ទៅ ថន៖ «ព្រោះខ្ញុំអត់ដឹងដែរទេរឿងហ្នឹង បើចង់ដឹងទៅសួរមេខ្ញុំទៅ មេខ្ញុំបានដឹង»។
យ៉ាងនេះក្ដី ប្រធានមន្ទីរអប់រំខេត្តព្រះសីហនុ លោក កែវ ឡាយ បដិសេធថា មន្ទីរអប់រំខេត្តគ្មានគោលការណ៍ណាមួយអនុញ្ញាតមន្ត្រីការិយាល័យស្រុកកាត់ប្រាក់ខែរបស់លោកគ្រូ អ្នកគ្រូ នោះឡើយ។
លោកបញ្ជាក់ថា បើសិនករណីនោះកើតឡើងមែន លោកនឹងចាត់វិធានការតាមផ្លូវច្បាប់ ដាក់ពិន័យលើមន្ត្រីរូបនោះ៖ «ខ្ញុំនឹងធ្វើការរឿងហ្នឹងឲ្យ បើសិនរឿងហ្នឹងជារឿងពិត ពីព្រោះមន្ទីរអត់មានរឿងអីទៅកាត់ប្រាក់ខែគ្រូនោះទេ។ ព្រោះខ្ញុំយល់ណាស់ពីជីវភាពរបស់គ្រូបង្រៀន អ៊ីចឹងបញ្ហារបស់គាត់ត្រូវបើកឲ្យគាត់ឲ្យពេញលេញ»។
បញ្ហាខ្វះគ្រូបង្រៀន នៅស្រុកកំពង់សីលា ខេត្តព្រះសីហនុ តម្រូវឲ្យមានគ្រូបង្រៀនបន្ថែមម៉ោង ហើយការបន្ថែមម៉ោងនេះ ត្រូវក្រសួងគិតប្រាក់ខែបន្ថែមដល់លោកគ្រូ អ្នកគ្រូ ទាំងនោះ ប៉ុន្តែប្រាក់ខែបន្ថែមម៉ោងនោះ ត្រូវបើកក្នុងរយៈពេល១០ខែម្ដង។
កន្លងមក ការកាត់ប្រាក់ខែបន្ថែមម៉ោងគឺគេកាត់ត្រឹម១០%ប៉ុណ្ណោះ ប៉ុន្តែនៅខែនេះ អនុប្រធានការិយាល័យអប់រំស្រុក បានឲ្យគ្រូបង្រៀនទាំងនោះកាត់ប្រាក់ខែមួយខែឲ្យដល់មន្ត្រីការិយាល័យអប់រំស្រុក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
សិត សំបុក
គាតប្រាក់ខែតិចហើយ កាត់ពីគាតទៀតហូបមិនឆ្អែតទេ ពិតជាពូកវាខ្វះលុយចាក់ប្រេងទ្បានហើយ។
Aug 15, 2012 02:32 AM
អ្នកអានអនាមិក
ពី phnom penhពួកគាតដីងថាលោកគ្រូអ្នកគ្រូមិន គាមទ្រលោកហ៊ុនសែន ធ្វើនេះធ្វើអោយកូនខ្មែរកានតែល្ងងទៅៗ ក្រុមន្ត្រីថ្នាកលើមិន ធ្វើការងារខំចាយលុយបំផ្លាញ់ជាតិ។
Aug 15, 2012 02:19 AM
Sitha
ពី Phnom Penhការកាត់ប្រាក់របស់គ្រូបង្រៀន មិនមែនមានតែនៅក្រុងកំពង់សិលានោះទេ គឺមានគ្រប់ទីកន្លែង។ ប្រាក់បៀវត្សរបស់មន្ត្រីរដ្ឋាភិបាលនៅមានកំរិតទាប ហេតុនេះចង់រឺមិនចង់មន្ត្រីដែលធ្វើការត្រូវចេះស្វែងរក ខ្លួនឯងបន្ថែម ទើបអាចរស់នៅចិញ្ចឹមកូនប្រពន្ធបានស្រួល ង ហើយមន្ត្រីអស់នោះត្រូវខិតខំរក សំរាប់ផ្គត់ផ្គន់ ថ្នាក់លើគេផង ដើម្បីរក្សាតំណែង របស់គេផង ។
ជាទូទៅនៅស្រុកខ្មែរ អោយតែរឿងបើកប្រាក់ ក្នុងការងាររដ្ឋ គឺតែងតែមានការកាត់ តាំងពីថ្នាក់ជាតិ រហូតដល់ថ្នាក់មូលដ្ឋាន។គ្រប់ស្ថាប័ន!!!
Aug 14, 2012 09:38 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
