កសិករខេត្តពោធិ៍សាត់ពិគ្រោះយោបល់លើសេចក្ដីព្រាងច្បាប់របស់ក្រសួងកសិកម្ម

ក្រសួងកសិកម្ម រុក្ខាប្រមាញ់ និងនេសាទ បានតាក់តែងសេចក្ដីព្រាងច្បាប់ចំនួន២ គឺសេចក្ដីព្រាងច្បាប់ស្ដីពីការគ្រប់គ្រង និងការប្រើប្រាស់ដីកសិកម្ម និងសេចក្ដីព្រាងច្បាប់ ស្ដីពីសហគមន៍កសិកម្ម ដែលកំពុងក្លាយជាក្ដីកង្វល់ចំពោះប្រជាកសិករកម្ពុជា។

ដោយ មណ្ឌល កែវ
2012-09-05

h090412pb.mp3

លោក ជា សុភ័ក្ត្រ សមាជិកក្រុមប្រឹក្សាភិបាលបណ្ដាញពហុវិស័យ កំពុងសម្របសម្រួលក្នុងការពិគ្រោះយោបល់លើសេចក្ដីព្រាងច្បាប់នៃការគ្រប់គ្រង និងការប្រើប្រាស់ដីកសិកម្ម និងសហគមន៍កសិកម្មរបស់ក្រសួងកសិកម្ម កាលពីថ្ងៃទី៣ ខែកញ្ញា ឆ្នាំ២០១២។

RFA/Mondul keo

តំណាងកសិករក្នុងខេត្តពោធិ៍សាត់ ប្រមាណ៥០នាក់ នៅព្រឹកថ្ងៃទី៤ ខែកញ្ញា បានមកជួបជុំគ្នាដើម្បីពិគ្រោះយោបល់លើសេចក្ដីព្រាងច្បាប់ចំនួន២ ដែលក្រសួងកសិកម្មបានតាក់តែងឡើង កាលពីចុងឆ្នាំ២០១១។

មន្ត្រីនៃបណ្ដាញពហុវិស័យ គឺលោក ជា សុភ័ក្ត្រ បានឲ្យដឹងថា នាពេលខាងមុខនេះរាជរដ្ឋាភិបាល ពិសេសគឺក្រសួងកសិកម្ម នឹងចេញច្បាប់២ ដែលអាចមានផលប៉ះពាល់ដល់ប្រជាកសិករ។ ហេតុនេះហើយ ទើបបណ្ដាញពហុវិស័យក្នុងនាមជាតំណាងឲ្យប្រជាកសិករ បង្កើតឲ្យមានកម្មវិធីពិគ្រោះយោបល់ជាមួយកសិករ ដើម្បីពិនិត្យមើលថា តើច្បាប់ទាំង២នេះ មានវិសាលភាពគ្របដណ្ដប់ និងប៉ះពាល់យ៉ាងណាខ្លះដល់ប្រជាកសិករ។

លោកថា នៅពេលរកឃើញមានផលប៉ះពាល់នោះ បណ្ដាញពហុវិស័យនឹងយកយោបល់នេះទៅពិគ្រោះជាមួយក្រសួងកសិកម្ម ដើម្បីស្នើសុំការកែប្រែនូវចំណុចប៉ះពាល់ទាំងនោះ៖ «អ៊ីចឹង យើងពិនិត្យមើលថា តើមានផលប៉ះពាល់អីខ្លះ ចំពោះវិសាលភាពនៃច្បាប់ហ្នឹងមកលើក្រុមកសិករ។ នៅពេលដែលយើងរកឃើញចំណុចពិសេសៗ ឬចំណុចដែលជាបញ្ហាប៉ះពាល់ ពួកយើងនឹងធ្វើសំណើទៅក្រសួង ឬក៏ពេលក្រសួងមានការពិគ្រោះថ្នាក់ជាតិ យើងនឹងនាំមតិយោបល់ផ្ទាល់ពីបងប្អូនកសិករហ្នឹង ជូនទៅក្រសួង ដើម្បីធ្វើការពិចារណា ឬក៏ថ្លឹងថ្លែងទៅលើផលប៉ះពាល់ទាំងឡាយនោះ»។

ដោយមានការសម្របសម្រួលពីមន្ត្រី នៃបណ្ដាញពហុវិស័យ ប្រជាកសិករភាគច្រើនយល់ឃើញថា មាត្រាខ្លះនៃសេចក្ដីព្រាងច្បាប់នេះ បានរឹតត្បិតសិទ្ធិសេរីភាពរបស់ប្រជាកសិករក្នុងការបង្កើតសមាគម និងម្យ៉ាងទៀត ពួកគាត់ត្រូវជាប់កាតព្វកិច្ចនានាជាច្រើនទៀត ដែលប្រជាកសិករខ្មែរមិនអាចរ៉ាប់រងបាន ដោយការយល់ដឹងរបស់ពួកគាត់នៅមានកម្រិត។ ម្យ៉ាងទៀត ការកំណត់ទោសព្រហ្មទណ្ឌ ដោយគ្រាន់តែកសិករខកខានមិនបានបំពេញតាមលក្ខខណ្ឌតម្រូវខ្លះក្នុងច្បាប់ ហាក់មានភាពធ្ងន់ធ្ងរ ដែលកសិករមិនអាចទទួលយកបាន។

លោក សួង សារ៉ាត់ ជាប្រជាកសិករភូមិផ្សារលើ សង្កាត់លលកស ក្រុងពោធិ៍សាត់ លោកបានឲ្យដឹងថា បន្ទាប់ពីការពិគ្រោះយោបល់គ្នាអស់ជាច្រើនម៉ោង កសិករភាគច្រើនយល់ឃើញថា សេចក្ដីព្រាងច្បាប់ទាំង២ ដែលក្រសួងកសិកម្មកំពុងរៀបចំឡើងក្នុងបំណងធានាឲ្យបាននូវការគ្រប់គ្រងដីកសិកម្មប្រកបដោយនិរន្តរភាព និងដើម្បីលើកកម្ពស់ការចូលរួមដោយស្ម័គ្រចិត្តរបស់ប្រជាពលរដ្ឋខ្មែរ ក្នុងក្របខណ្ឌនៃប្រព័ន្ធផលិតកម្ម កសិកម្ម មានចំណុចជាច្រើនដែលប្រជាកសិករមិនអាចទទួលយកបាន៖ «ទាក់ទងនឹងការបង្កើតច្បាប់នេះ យើងឃើញថា មានមាត្រាខ្លះអាចទទួលយកបាន តែក៏មានមាត្រាខ្លះ យើងមិនអាចទទួលយកបានទេ។ យើងគិតថា យើងទាមទារឲ្យមានការកែប្រែមាត្រាខ្លះៗ ដើម្បីឲ្យមានភាពងាយស្រួលទាំងអស់គ្នា ទាំងរដ្ឋាភិបាល និងទាំងប្រជាពលរដ្ឋផង»។

យ៉ាងនេះក្ដី ការពិគ្រោះយោបល់នេះក៏មានការគាំទ្រចំពោះមាត្រាជាច្រើន ក្នុងសេចក្ដីព្រាងច្បាប់ទាំង២ ដែលរួមមានមាត្រាទាំងឡាយក្នុងជំពូកទី៦ នៃច្បាប់ស្ដីពីការគ្រប់គ្រង និងការប្រើប្រាស់ដីកសិកម្ម។ ច្បាប់នេះបានគាំទ្រឲ្យមានការរក្សានូវដីស្រែ និងចម្ការវិលជុំ ដែលជាប្រភេទកសិកម្មពនេចរ នៃជនជាតិដើមភាគតិចជាដើម។

បណ្ដាញពហុវិស័យ គឺជាអង្គការក្រៅរដ្ឋាភិបាលមួយដែលបានធ្វើសកម្មភាពទូទាំងប្រទេសកម្ពុជា ដោយផ្ដោតលើការជួយគ្នាទៅវិញទៅមក ដើម្បីជំរុញឲ្យមានការតស៊ូមតិលើគ្រប់វិស័យ រួមមានវិស័យជលផល វិស័យកសិកម្ម និងសេវាកម្មផ្សេងៗ។ បណ្ដាញពហុវិស័យធ្លាប់មានជោគជ័យក្នុងការជំរុញការតស៊ូមតិក្នុងវិស័យសេវាកម្មនាពេលកន្លងទៅ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។