ព្រៃលិចទឹកប្រមាណ៤ពាន់ហិកតារនៅកំពង់ធំត្រូវកាប់រានយកដី

ប្រធានសហគមន៍នេសាទនៅក្នុងឃុំកំពង់គោ ស្រុកកំពង់ស្វាយ ខែត្រកំពង់ធំ បានឲ្យដឹងនៅថ្ងៃទី៨ កក្កដា ថា ក្រុមឈ្មួញ និងប្រជាពលរដ្ឋបានកាប់ព្រៃលិចទឹកនៅតំបន់បឹងរៀល អស់ប្រមាណ ៤ពាន់ហិកតារហើយ ដើម្បីយកដីធ្វើស្រែប្រាំង។

ដោយ ទីន ហ្សាការីយ៉ា
2012-07-09

zr.mp3

សកម្មភាពគ្រឿងចក្រឈូសឆាយដីនៅតំបន់ព្រៃលិចទឹក យកធ្វើស្រែប្រាំង នៅក្នុងខេត្តកំពង់ធំ កាលពីថ្ងៃទី២៤ ខែមិថុនា ឆ្នាំ២០១២។

RFA/Tin Zakariya

ប្រធានសហគមន៍នេសាទឃុំកំពង់គោ លោក ទុយ យ៉ុង មានប្រសាសន៍ថា នៅព្រឹកថ្ងៃទី៨ កក្កដា នេះ លោកបានស្នើឲ្យមន្ត្រីកងរាជអាវុធហត្ថស្រុកជួយចុះបង្ក្រាបក្រុមឈ្មួញកាប់ព្រៃលិចទឹកនៅតំបន់បឹងរៀល ពីព្រោះថា កន្លងមកលោកបានរាយការណ៍ទៅថ្នាក់ខែត្រជាច្រើនលើកមកហើយ ប៉ុន្តែពុំមានការអន្តរាគមន៍ពីថ្នាក់ខែត្រក្នុងការចុះបង្ក្រាបបទល្មើសកាប់ព្រៃលិចទឹកនេះទេ។

លោក ទុយ យ៉ុង បានបញ្ជាក់ថា លោកព្រួយបារម្ភព្រៃលិចទឹកនឹងបាត់បង់អស់នៅតំបន់បឹងរៀល និងតំបន់ដទៃទៀតនៅក្នុងខែត្រកំពង់ធំ ដោយសារតែក្រុមឈ្មួញបានប្រើប្រាស់សិទ្ធិរបស់ខ្លួន ថាខ្លួនមានអាជ្ញាប័ណ្ណពីអាជ្ញាធរខែត្រក្នុងការកាប់រានព្រៃនៅតំបន់អភិរក្សធ្វើស្រែប្រាំង។

លោក ទុយ យ៉ុង៖ «ការកាប់ព្រៃលិចទឹកហ្នឹងធ្វើឲ្យបាត់បង់ជម្រកត្រីពង និងជម្រកសត្វគ្រប់ប្រភេទ និងប្រជាជនយើង ខ្ញុំមិនដឹងជារកផលត្រីបាន ឬមិនបានទេនៅរដូវវស្សា ដោយសារតែប្រជាពលរដ្ឋកាប់រានព្រៃលិចទឹកអានាធិបតេយ្យ និងក្រុមហ៊ុនមួយចំនួនកាប់បំផ្លាញព្រៃលិចទឹក»។

ការបំផ្លាញព្រៃលិចទឹកយកដីធ្វើស្រែប្រាំងនេះ នៅបន្ទាប់ពីលោកនាយករដ្ឋមន្រ្តី ហ៊ុន សែន បានអំពាវនាវកាលពីថ្ងៃទី១ កក្កដា នៅក្នុងឱកាសប្រារព្ធទិវាមច្ឆាជាតិលើកទី១០ ឲ្យប្រជាពលរដ្ឋដាំព្រៃលិចទឹកឡើងវិញនៅតំបន់អភិរក្ស ដោយព្រមានចំពោះជនទាំងឡាយណាដែលបានកាប់បំផ្លាញព្រៃលិចទឹក និងស្នើឲ្យអង្គភាពប្រឆាំងអំពើពុករលួយចាត់ការទៅលើមន្ត្រីដែលប្រព្រឹត្តអំពើពុករលួយក្នុងការអនុញ្ញាតឲ្យកាប់ព្រៃលិចទឹកនេះ។

លោក ហ៊ុន សែន បានប្រកាសថា នៅក្នុងខែត្រកំពង់ធំ ក្នុងស្រុកស្ទោង រដ្ឋាភិបាលបានរកឃើញថា ព្រៃលិចទឹកនៅក្នុងតំបន់៣ ត្រូវគេកាប់បំផ្លាញយ៉ាងអនាធិបតេយ្យ៖ «ស្រុកស្ទោង ខែត្រកំពង់ធំ អនុញ្ញាតឲ្យកាប់ព្រៃនៅក្នុងតំបន់បីតែម្ដង អ៊ីចឹងទេ សកម្មភាពនេះមហន្តរាយហើយ។ នៅថ្ងៃទី៩ កក្កដា ព្រះមហាក្សត្រព្រះអង្គយាងទៅដាំកូនឈើហើយ យើងត្រូវតែដាំកូនឈើ អ៊ីចឹងទេយើងអំពាវនាវឲ្យដាំព្រៃលិចទឹក បែរជាយើងនាំគ្នាកាប់ព្រៃលិចទឹក»។

ទាក់ទងទៅនឹងបញ្ហានេះ ក្រុមប្រជាពលរដ្ឋនៅខែត្រកំពង់ធំ បានលើកឡើងថា ការអនុញ្ញាតឲ្យមានការកាប់ព្រៃលិចទឹកនៅតំបន់អភិរក្សនេះ ដោយសារអាជ្ញាធរខែត្រ និងនាយខណ្ឌជលផលខែត្រ មិនវិធានការតឹងរ៉ឹងក្នុងការទប់ស្កាត់បទល្មើសនេះ។ ក្រុមប្រជាពលរដ្ឋបានអះអាងថា បញ្ហាទាំងនេះវាជាប់ទៅនឹងអំពើពុករលួយរបស់មន្ត្រីពាក់ព័ន្ធ ពិសេសនាយខណ្ឌជលផលខែត្រជាដើម។

វិទ្យុអាស៊ីសេរីមិនអាចទាក់ទងនាយខណ្ឌរដ្ឋបាលជលផលខែត្រកំពង់ធំ លោក ប៉ែន វណ្ណារិទ្ធិ ដើម្បីសុំការបំភ្លឺអំពីបញ្ហានេះបានទេ នៅថ្ងៃទី៨ ខែកក្កដា ឆ្នាំ២០១២។

ប៉ុន្តែមន្ត្រីជលផលមួយរូបសុំមិនបញ្ចេញឈ្មោះ បានទទួលស្គាល់ថា នៅតំបន់បឹងរៀល មានសកម្មភាពកាប់ព្រៃលិចទឹកមែនកន្លងមក។ លោកបានចុះទៅបង្ក្រាបដែរ តែមិនអាចទប់ស្កាត់បានទាំងស្រុងទេ ពីព្រោះថា ថ្នាក់លើរបស់លោកមិនមានវិធានការតឹងរ៉ឹងក្នុងការបង្ក្រាប៖ «ឥឡូវកាប់អស់ លែងទៅជាព្រៃទៀតហើយ នៅក្នុងតំបន់បីហ្នឹង។ ប្រហែលជាអ្នកកាប់ព្រៃហ្នឹងជាប់ពាក់ព័ន្ធនឹងអ្នកធំហើយបានជាគេហ៊ានធ្វើ ខ្ញុំក៏មិនដឹងធ្វើម៉េចដែរ មិនហ៊ានទេ»។

របាយការណ៍របស់សហគមន៍នេសាទនៅឃុំកំពង់គោ បានសរសេរថា ព្រៃលិចទឹកដែលត្រូវខូចខាត ឬបាត់បង់ ហើយចាំបាច់ត្រូវដាំឡើងវិញ នៅខេត្តកំពង់ធំ មានទំហំប្រមាណជាង ៣ពាន់ហិកតារ នៅតំបន់ដែលគេកាប់បំផ្លាញកន្លងមក។ ការកាប់បំផ្លាញព្រៃលិចទឹកនេះ គឺធ្វើឡើងដោយក្រុមអ្នកមានលុយ និងមានអំណាច ដើម្បីយកដីធ្វើស្រែ និងធ្វើអាងស្តុកទឹកនៅចន្លោះឆ្នាំ១៩៩០ មកដល់បច្ចុប្បន្ន ទោះបីជារដ្ឋាភិបាលបានប្រកាសហាមឃាត់ក៏ដោយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។