តុលាការខេត្តកោះកុងចេញសាលក្រមករណីសម្លាប់លោក ឈុត វុទ្ធី
ay.mp3
សំណុំរឿងឃាតកម្មបាញ់សម្លាប់សកម្មជនការពារព្រៃឈើ លោក ឈុត វុទ្ធី កាលពីខែមេសា ត្រូវចៅក្រមតុលាការខេត្តកោះកុង កាត់ក្ដីឲ្យបុរសជាប់ចោទឈ្មោះ រ៉ាន់ បូរ័ត្ន ជាសន្តិសុខក្រុមហ៊ុន ធីមប៊ឺ ហ្គ្រីន (Timber Green) ជាប់ក្នុងពន្ធនាគារតែ ៦ខែ និងទោសចំនួន ១ឆ្នាំកន្លះទៀត ត្រូវព្យួរទោស។ គិតមកដល់ថ្ងៃប្រកាសសាលក្រម ថ្ងៃទី២២ ខែតុលា ឆ្នាំ២០១២ ជនជាប់ចោទត្រូវរួចខ្លួនពីពន្ធនាគារ។
សាលក្រមនេះប្រកាសដោយលោកចៅក្រម ខាន់ សុផារី ប្រធានក្រុមប្រឹក្សាជំនុំជម្រះរបស់តុលាការសាលាដំបូងខេត្តកោះកុង។
សវនាការឃាតកម្មលោក ឈុត វុទ្ធី ធ្វើឡើងកាលពីថ្ងៃទី៤ ខែតុលា ឆ្នាំ២០១២ ប៉ុន្តែតុលាការមិនប្រកាសសាលក្រមភ្លាមៗទេ ដោយពន្យារពេលមកដល់ថ្ងៃទី២២ ខែតុលា។
ទាក់ទិនបញ្ហានេះលោក អំ សំអាត មន្ត្រីស៊ើបអង្កេតជាន់ខ្ពស់អង្គការលីកាដូ មានប្រសាសន៍ថា គ្មានអ្វីចម្លែកទេចំពោះសាលក្រមលើសំណុំរឿងឃាតកម្មលោក ឈុត វុទ្ធី នេះ ព្រោះតុលាការខេត្តកោះកុង ចង់បិទសំណុំរឿងនេះតាំងពីដើមទីមកម្ល៉េះ ដោយប្រកាសថា ជនជាប់ចោទជាឃាតកបាញ់សម្លាប់លោក ឈុត វុទ្ធី ជាប៉េអិម ឈ្មោះ អ៊ិន រតនា បានស្លាប់ក្នុងព្រឹត្តិការណ៍ផ្ទុះអាវុធថ្ងៃទី២៦ ខែមេសា ឆ្នាំ២០១២ នោះដែរ។
សំណុំរឿងនេះ បុរសឈ្មោះ រ៉ាន់ បូរ័ត្ន ជាសន្តិសុខក្រុមហ៊ុន ធីមប៊ឺ គ្រីន (Timber Green) ជាជនជាប់ចោទតែម្នាក់គត់ដែលត្រូវតុលាការចោទប្រកាន់តាមរយៈការបាញ់សម្លាប់ប៉េអិម ឈ្មោះ អ៊ិន រតនា ដោយអចេតនាក្នុងព្រឹត្តិការណ៍ផ្ទុះអាវុធនោះ។
ចៅក្រមតុលាការបានប្រកាសថា ប៉េអិម អ៊ិន រតនា ពិតជាបានបាញ់សម្លាប់លោក ឈុត វុទ្ធី បន្ទាប់មកឈ្មោះ រ៉ាន់ បូរ័ត្ន បានទៅដណ្ដើមកាំភ្លើងពី អ៊ិន រតនា ដើម្បីរារាំងកុំឲ្យមានការផ្ទុះអាវុធទៀត ក៏រាលកៃកាំភ្លើងត្រូវឈ្មោះ អ៊ិន រតនា ស្លាប់នឹងកន្លែងកើតហេតុជិតក្រុមហ៊ុន Timber Green ដែលមានគំនរឈើ និងវល្លិល្មៀត។
យុវជន ឆឺយ ឧត្តមរស្មី ត្រូវជាកូនសពលោក ឈុត វុទ្ធី បានច្រានចោលសាលក្រមរបស់តុលាការខេត្តកោះកុង និងចាត់ទុកសវនាការនោះថា មិនបានផ្ដល់យុត្តិធម៌ដល់គ្រួសារគេទេ។
ឃាតកម្មលើសពលោក ឈុត វុទ្ធី កើតមានបន្ទាប់ពីរូបលោក និងអ្នកកាសែតចំនួន ២នាក់ទៀត បានព្យាយាមចុះថតយករូបភាព និងយកព័ត៌មានជុំវិញសកម្មភាពកាប់បំផ្លាញព្រៃឈើអនាធិបតេយ្យក្នុងខេត្តកោះកុង កាលពីថ្ងៃទី២៦ ខែមេសា ឆ្នាំ២០១២។
សំណុំរឿងនេះ លោកព្រះរាជអាជ្ញារងខេត្តកោះកុង ស្រី ម៉ាក់នី តំណាងអយ្យការនៅរក្សាការចោទប្រកាន់ពីបទមនុស្សឃាតដោយអចេតនាតាមមាត្រា ២០៧ នៃក្រមព្រហ្មទណ្ឌ លើឈ្មោះ រ៉ាន់ បូរ័ត្ន ជាជនជាប់ចោទតែម្នាក់គត់ក្នុងសំណុំរឿងឃាតកម្មលើមន្ត្រី (កងរាជអាវុធហត្ថ) ប៉េអិមឈ្មោះ អ៊ិន រតនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ម៉េងកំពង់ធំ
មែនវើយសំលាប់មនុស្សម្នាក់ជាប់គុក៦ខែពិតជាពិសេសមែន
តោះ ពួកយើងនាំគ្នាសំលាប់មនុស្សលេង ជាប់គុក៦ខែមានអី អស្ចារ្យណ តោះ តោះ នាំ គ្នាទៅ...
Oct 23, 2012 12:45 AM
វាសនា
ពី កណ្តាលជារឿងធម្មតារបស់តុលាការខ្មែរដែលស្ថិតក្នុងឥទ្ធិពលអ្នកមានអំណាចឬមានប្រាក់។ខ្ញុំថា វាជារឿងប្រក្រតីដែលអំពើរអយុត្តិធម៌រមែងកើតមានក្នុងសង្គមអយុត្តិធម៌ វាជារឿងខុសប្រក្រតីទៅវិញទេដែលមានភាពយុត្តិធម៌ក្នុងសង្គមអយុត្តិធម៌។ភាពអយុត្តិធម៌នឹងកើនឡើងជាដរាបបើទាំងអស់គ្នានៅតែគាំទ្រសង្គមបច្ចុប្បន្ន។
Oct 23, 2012 12:03 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
