គិតមកដល់ថ្ងៃទី២១ ខែមិថុនា នេះ គឺជាថ្ងៃទី៣ហើយ ដែលកម្មកររោងចក្រ អ៊ឹម.វ៉េ បាននាំគ្នាធ្វើកូដកម្មយ៉ាងស្ងៀមស្ងាត់ ដើម្បីទាមទារឲ្យថៅកែរោងចក្រផ្ដល់ប្រាក់អត្ថប្រយោជន៍ចំនួន៤ចំណុច។
កម្មការិនី ឈ្មោះ សុធា អាយុ ២២ឆ្នាំ ដែលបានដើរចេញពីរោងចក្រនៅព្រឹកថ្ងៃទី២១ ខែមិថុនា បញ្ជាក់ពីមូលហេតុដែលកម្មករ កម្មការិនីនាំគ្នាធ្វើកូដកម្មនេះថា ដោយស្ថានភាពជីវភាពរបស់ពួកគេបានជួបការលំបាក ព្រោះទំនិញលើទីផ្សារចេះតែឡើងថ្លៃឥតឈប់។ ចំណែកប្រាក់ខែរបស់កម្មករ កម្មការិនី នៅរោងចក្រ អ៊ឹម.វ៉េ មិនមានការប្រែប្រួលសោះ។
កម្មការិនី សុធា បន្តថា កម្មករ កម្មការិនី នៅរោងចក្រនានា គេបានទទួលប្រាក់អត្ថប្រយោជន៍លើ៤ចំណុចនេះរួចអស់ហើយ នៅឡើយតែរោងចក្រ អ៊ឹម.វ៉េ មិនព្រមផ្ដល់ ទើបកម្មករ កម្មការិនី នាំគ្នាធ្វើកូដកម្មដូច្នេះ៖ «បើសិនជារបស់របរវាថោកនោះ មិនអីទេ តែឥឡូវស្អីក៏វាថ្លៃដែរ។ អញ្ចឹង សុំឲ្យខាងរោងចក្រហ្នឹង ដំឡើងលុយឲ្យពួកខ្ញុំមក។ ដែលធ្វើកូដកម្មនេះ គឺសុំតែប៉ុណ្ណឹងទេ»។
ចាប់តាំងពីថ្ងៃទី១៩ ខែមិថុនា មកម្ល៉េះ ដែលកម្មកររោងចក្រ អ៊ឹម.វ៉េ បាននាំគ្នាធ្វើកូដកម្មយ៉ាងស្ងៀមស្ងាត់ ដើម្បីទាមទារឲ្យថៅកែរោងចក្រផ្ដល់ប្រាក់អត្ថប្រយោជន៍លើ៤ចំណុច គឺប្រាក់ថ្លៃធ្វើដំណើរចំនួន ១០ដុល្លារ ប្រាក់ថ្លៃការស្នាក់នៅ ១០ដុល្លារ ប្រាក់រង្វាន់ទៀងទាត់បន្ថែម ៣ដុល្លារលើប្រាក់ដែលមានស្រាប់ ៧ដុល្លារ និងប្រាក់ធ្វើការបន្ថែម នៅថ្ងៃអាទិត្យ និងថ្ងៃបុណ្យចំនួន ១ដុល្លារ។
យ៉ាងនេះក្ដី លោក យិន ណាក់ ដែលជាប្រធានរដ្ឋបាល និងជាតំណាងឲ្យថៅកែរោងចក្រ អ៊ឹម.វ៉េ បានឲ្យដឹងនៅល្ងាចថ្ងៃទី២១ ខែមិថុនា ថា ភាគីរោងចក្របានយល់ព្រមមួយផ្នែក ចំពោះការទាមទាររបស់កម្មករ កម្មការិនី ហើយ។ លោកថា កម្មករ កម្មការិនី ទាំងអស់បានយល់ព្រមចូលធ្វើការវិញនៅថ្ងៃទី២២ ខែមិថុនា៖ «បាទ! ខាងភាគីរោងចក្រសម្រេចផ្ដល់ឲ្យ២ចំណុច។ ទី១ គឺប្រាក់ស្នាក់នៅ និងប្រាក់ធ្វើដំណើរ គឺយើងសម្រេចផ្ដល់ឲ្យ ៥ដុល្លារ។ ចំណែកពាក់ព័ន្ធនឹងលុយព្រីម យើងសម្រេចបន្ថែមឲ្យ ២ដុល្លារទៀត គឺសរុប ៩ដុល្លារ»។
ទាក់ទិនចំពោះបញ្ហានេះ ប្រធានសហជីពសេរីកម្មករកម្ពុជា លោក ជា មុនី មានប្រសាសន៍ថា ការចរចាគ្នាយ៉ាងតឹងតែងរយៈពេល១ថ្ងៃកន្លះ រវាងសហជីពសេរីកម្មករកម្ពុជា និងភាគីរោងចក្រ សម្រេចបានជាបណ្ដោះអាសន្ននូវដំណោះស្រាយមួយ ដែលទោះបីជាកម្មករ កម្មការិនី មិនទាន់ពេញចិត្តនោះទេ។
ប៉ុន្តែ ដោយលោកយល់ថា ដើម្បីជៀសវាងការខាតបង់ផលប្រយោជន៍ទាំងសងខាង លោកបានអង្វរឲ្យកម្មករ កម្មការិនីទាំងអស់ ចូលធ្វើការវិញនៅថ្ងៃទី២២ ខែមិថុនា សិន ហើយលោកនឹងបន្តការចរចាបន្ថែមនៅពេលក្រោយទៀត៖ «ចំណុចសំខាន់នោះ គឺភាគីរោងចក្រមិនកាត់ប្រាក់រង្វាន់របស់បងប្អូនកម្មករទេ ចំពោះការធ្វើកូដកម្មប៉ុន្មានថ្ងៃនេះ។ ចំពោះការផ្ដល់មិនគ្រប់តាមការទាមទារនោះ គឺវាជារឿងចរចា។ ប៉ុន្តែទោះបីជាមិនបានតាមសំណូមពរ តែយើងពីអត់ ឥឡូវបានមួយចំនួន ដូច្នេះយើងនាំគ្នាទទួលយកសិនទៅ ហើយខ្ញុំនឹងបន្តចរចាបន្តទៀតនៅថ្ងៃខាងមុខ»។
រោងចក្រ អ៊ឹម.វ៉េ គឺជារោងចក្រមួយដែលមានទីតាំងស្ថិតនៅក្នុងក្រុងកំពង់ឆ្នាំង។ រោងចក្រនេះ ជាញឹកញាប់តែងកើតមានការតវ៉ាពីសំណាក់កម្មករ កម្មការិនី ពីស្ថានភាពលំបាកក្នុងការងារ ការគាបសង្កត់ និងការបំបិទសិទ្ធិពីសំណាក់ថៅកែរោងចក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។