រដ្ឋាភិបាលសុំឲ្យសហរដ្ឋអាមេរិកលុបចោលបំណុល៤០០លានដុល្លារ

រដ្ឋមន្ត្រីក្រសួងការបរទេសកម្ពុជា លោក ហោ ណាំហុង និងជាឧបនាយករដ្ឋមន្ត្រី កាលពីយប់ថ្ងៃទី២១ ខែមិថុនា ឆ្នាំ២០១២ បានបញ្ជាក់ថា ប្រទេសកម្ពុជានៅតែបន្តសុំឲ្យសហរដ្ឋអាមេរិក លុបចោលបំណុលដែលកម្ពុជាបានជំពាក់ចំនួនជាង ៤០០លានដុល្លារអាមេរិក កាលពីទសវត្សឆ្នាំ១៩៧០ ដល់ឆ្នាំ១៩៧៥ គ្រប់គ្រងដោយសេនាប្រមុខ លន់ នុល កន្លងមក។

ដោយ សុខ សេរី
2012-06-22

h062212ts1.mp3

លោក ហោ ណាំហុង រដ្ឋមន្ត្រីក្រសួងការបរទេសកម្ពុជា និងជាឧបនាយករដ្ឋមន្ត្រី ធ្វើសន្និសីទកាសែត នាអាកាសយានដ្ឋានអន្តរជាតិភ្នំពេញ កាលពីយប់ថ្ងៃទី២១ខែមិថុនា ឆ្នាំ២០១២។

RFA/Sok Serey

លោកនាយករដ្ឋមន្ត្រី ហ៊ុន សែន កាលពីឆ្នាំ២០១១ កន្លងទៅនេះ ក៏បានសុំឲ្យសហរដ្ឋអាមេរិក លុបចោលបំណុលនេះដែរ ឬក៏សុំឲ្យសហរដ្ឋអាមេរិក បង្វែរបំណុលនោះមកជាការអភិវឌ្ឍន៍ខាងវិស័យកសិកម្ម ដោយលោកបានចាត់ទុកថា បំណុលនោះ គឺជាបំណុលកខ្វក់ ដែលលោកសេនាប្រមុខ លន់ នុល បានខ្ចីមកធ្វើសង្គ្រាមនៅប្រទេសកម្ពុជា។

រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានមានប្រសាសន៍នៅក្នុងសន្និសីទកាសែត កាលពីយប់ថ្ងៃទី២១ ខែមិថុនា ឆ្នាំ២០១២ នៅឯអាកាសយានដ្ឋានអន្តរជាតិភ្នំពេញថា កម្ពុជានៅតែបន្តការចរចា ដើម្បីបញ្ចប់រឿងបំណុលនេះជាស្ថាពរ។

លោក ហោ ណាំហុង៖ «កន្លងមក កម្ពុជាបានសំណូមពរ ឲ្យធ្វើយ៉ាងណាឲ្យគិតការប្រាក់បំណុលដើម របស់បញ្ហានេះ គិតអំពីរយៈពេលសងបំណុលនេះ។ ទី៣ទៀត ធ្វើយ៉ាងណាប្រែក្លាយបំណុលនេះ ទៅជាជំនួយដល់កម្ពុជាកម្រិតណា ប៉ុន្មានភាគរយ ជំនួយដល់កម្ពុជា ប៉ុន្មានភាគរយទៀត កម្ពុជានឹងសង។ យើងបន្តការចរចា ដើម្បីរកដំណោះស្រាយទៀត»។

ទាក់ទងនឹងបំណុលនេះដែរ អ្នកនាំពាក្យគណបក្ស សម រង្ស៊ី លោក យឹម សុវណ្ណ និងជាតំណាងរាស្ត្រ បានមានប្រសាសន៍ថា គណបក្ស សម រង្ស៊ី ក៏មានជំហរដូចគ្នានឹងរដ្ឋាភិបាលដែរ៖ «ការដែលខ្ចីបុលគេ មិនមែនស្រួលទេ គឺគេតាមទារបំណុលមួយជីវិត យើងត្រូវតែសងគេ។ ការប្រើប្រាស់បំណុលទាំងឡាយណា សម្រាប់រៀនសូត្រពីបទពិសោធន៍ ក្នុងពេលអតីតកាល ត្រូវតែធ្វើម៉េច ការប្រើប្រាស់បំណុលណាក៏ដោយ គឺដើម្បីបម្រើផលប្រយោជន៍ប្រជាពលរដ្ឋពិតប្រាកដ ឲ្យដល់ដៃប្រជាពលរដ្ឋ១០០%»។

កាលពីឆ្នាំ២០១១ និងដើមឆ្នាំ២០១២ កន្លងទៅនេះ ឧបការីរងរដ្ឋមន្ត្រីក្រសួងការបរទេសសហរដ្ឋអាមេរិក លោក ជូសឹប យន់ (Joseph Yun) បានមកចរចាជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ចំនួនពីរលើករួចមកហើយ និងបានជួបចរចាជាមួយរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ ជាច្រើនលើកទៀត ដើម្បីទាមទារឲ្យកម្ពុជាសងបំណុលនោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។