កម្ពុជារំពឹងថានឹងទទួលបានភ្ញៀវទេសចរ៤,៥លាននាក់នៅឆ្នាំ២០១៥

ក្រសួងទេសចរណ៍នៃប្រទេសកម្ពុជា បានរំពឹងទុកថា នៅឆ្នាំ២០១៥ ខាងមុខ កម្ពុជានឹងអាចទទួលបានកំណើនភ្ញៀវទេសចរបរទេសប្រមាណ៤លាន៥សែននាក់។

ដោយ ហង្ស សាវយុត
2012-09-15

h091412hs.mp3

ទេសចរបរទេសដែលមកទស្សនាប្រាសាទអង្គរវត្ត នៅខេត្តសៀមរាប កាលពីអំឡុងខែមេសា ឆ្នាំ២០១០

RFA/Hang Savyouth

ក្នុងកំណើននោះដែរ គេក៏រំពឹងថា ខេត្តសៀមរាប ដែលជាតំបន់សម្បូរប្រាសាទបុរាណ ហើយមានសក្ដានុពលទាក់ទាញទេសចរបរទេសបំផុតនោះ នឹងអាចទទួលបានកំណើន២លាន៥សែននាក់។

ដើម្បីទាក់ទាញកំណើនទេសចរទៅតាមការរំពឹងទុកនេះ រដ្ឋាភិបាលកម្ពុជា បានរៀបចំផែនការជាច្រើនចំណុច សម្រាប់ឱ្យអ្នកទេសចរចាប់អារម្មណ៍ និងចង់មកទស្សនាកម្ពុជា។ តើផែនការទាំងនោះ មានចំណុចសំខាន់ៗអ្វីខ្លះ?

អាជ្ញាធរខេត្តសៀមរាប កំពុងរៀបចំត្រៀមខ្លួនធ្វើជាម្ចាស់ផ្ទះនៃវេទិកាទេសចរណ៍អាស៊ីបូព៌ាមួយ ដែលមានប្រទេសចំនួន១២ នឹងមកចូលរួមប្រជុំនៅចុងខែវិច្ឆិកា ឆ្នាំ២០១២ ខាងមុខ។

មន្ត្រីក្រសួងទេសចរណ៍នៃប្រទេសកម្ពុជា បានរំពឹងថា ការជួបប្រជុំនៃវេទិកាទេសចរណ៍អាស៊ីបូព៌ា (អ៊ីតូហ្វ=EATOF) នឹងជំរុញឱ្យមានជើងហោះហើរផ្ទាល់ ចេញពីបណ្ដាខេត្តរបស់ប្រទេសទាំងនោះ មកកាន់ខេត្តសៀមរាប ដែលនឹងអាចធ្វើឱ្យចំនួនភ្ញៀវទេសចរបរទេស កាន់តែមានកំណើនថែមទៀត។

លោក ថោង ខុន រដ្ឋមន្ត្រីក្រសួងទេសចរណ៍ នៃប្រទេសកម្ពុជា លោកបានមានប្រសាសន៍នៅក្នុងសន្និបាតបូកសរុបការងារទេសចរណ៍ប្រចាំឆ្នាំ២០១១ និងឆមាសទី១ នៃឆ្នាំ២០១២ ថា កម្ពុជានឹងរៀបចំព្រឹត្តិការណ៍ធំៗសំខាន់ៗចំនួន៨ ចាប់ពីពេលនេះ រហូតទៅដល់ចុងឆ្នាំ២០១២ ដើម្បីទាក់ទាញភ្ញៀវទេសចរបរទេស ឱ្យចូលមកទស្សនាកម្ពុជា កាន់តែច្រើនឡើងថែមទៀត។

ព្រឹត្តិការណ៍ទាំងនោះ ដូចជាការប្រណាំងកង់ ការរត់ប្រណាំងពាក់កណ្តាលម៉ារ៉ាថុន (Marathon) ការទទួលក្បួនរថយន្តអាស៊ាន-ឥណ្ឌា និងការប្រគំតន្ត្រីអន្តរជាតិអង្គរវត្ត ជាដើម។ ពិសេសជាងនេះ គឺខេត្តសៀមរាប ក៏នឹងធ្វើជាម្ចាស់ផ្ទះនៃកិច្ចប្រជុំវេទិកាទេសចរណ៍អាស៊ីបូព៌ា ចាប់ពីថ្ងៃទី២៧ ខែវិច្ឆិកា រហូតដល់ថ្ងៃទី១ ខែធ្នូ ផងដែរ៖ «យើងគិតទៅមានដល់ទៅ១២ មកតាំងពីនៅក្នុងតំបន់យើងនេះ មានថៃ មានឡាវ ហើយមានម៉ាឡេស៊ី។ តំបន់បូកនឹងបី គឺមានជប៉ុន កូរ៉េ ម៉ុងហ្គោលី និងមកពីរុស្ស៊ី។ ទាំងអស់វា១២ សុទ្ធតែទីក្រុងទេសចរណ៍ធំៗ ដែលទាំងអស់គ្នាត្រូវខិតខំក្នុងនាមជាម្ចាស់ផ្ទះ ក្នុងនាមជាប្រជាពលរដ្ឋ ជួយចូលរួមរៀបចំព្រឹត្តិការណ៍នេះឱ្យបានជោគជ័យ»។

រដ្ឋមន្ត្រីក្រសួងទេសចរណ៍ លោក ថោង ខុន បានស្នើសុំឱ្យអាជ្ញាធរពាក់ព័ន្ធនៅក្នុងខេត្តសៀមរាប ធ្វើការរៀបចំហេដ្ឋារចនាសម្ព័ន្ធរបស់ទីក្រុង ការតុបតែងសោភ័ណភាព និងអនាម័យទីក្រុងឱ្យបានល្អថែមទៀត ដើម្បីទាក់ទាញវិស័យទេសចរណ៍នេះ។

ក្នុងរយៈពេល៦ខែដើមឆ្នាំ២០១២ កម្ពុជាបានទទួលភ្ញៀវទេសចរបរទេសជាង១លាន៧សែននាក់។ ចំនួននេះ គឺកើនឡើង២៦.៨% បើប្រៀបធៀបទៅនឹងរយៈពេលដូចគ្នាកាលពីឆ្នាំ២០១១។ ក្រសួងទេសចរណ៍កម្ពុជា រំពឹងថា នៅឆ្នាំ២០១៥ កម្ពុជានឹងទទួលបានភ្ញៀវទេសចរបរទេសរហូតដល់ទៅ៤លាន៥សែននាក់។

កាលពីឆ្នាំ២០១១ កន្លងទៅ កម្ពុជាបានទទួលភ្ញៀវទេសចរបរទេសប្រមាណជាង២លាន៨សែននាក់ ដោយបានចំណូលជាតិប្រមាណជាង១.៩០០លានដុល្លារសហរដ្ឋអាមេរិក។

ចំណែកឯខេត្តសៀមរាប ដែលជាតំបន់មានសក្ដានុពលទេសចរណ៍បំផុតរបស់កម្ពុជា គឺបានទទួលភ្ញៀវទេសចរបរទេស ក្នុងរយៈពេល៦ខែដើមឆ្នាំ២០១២ ប្រមាណជាង១លាន៥០ម៉ឺននាក់។

លោក ប៊ុន ថាឫទ្ធិ ជាអភិបាលរងខេត្តសៀមរាប បានមានប្រសាសន៍ថា ក្នុងពេលដែលចំនួនទេសចរបរទេសកំពុងកើនឡើងនេះ គឺរាជរដ្ឋាភិបាលបានបង្កើតនូវគម្រោងមួយឈ្មោះថា "ក្រវាត់បៃតង" ដើម្បីជួយឱ្យប្រជាពលរដ្ឋនៅតាមបណ្ដាស្រុកជុំវិញតំបន់អង្គរ បានទទួលចំណូលពីវិស័យទេសចរណ៍ដែរ។ មន្ត្រីដដែលបានមានប្រសាសន៍ថា បច្ចុប្បន្ននេះអាជ្ញាធរជាមួយអង្គការអាល្លឺម៉ង់ មួយ កំពុងបណ្ដុះបណ្ដាលជំនាញដល់ប្រជាពលរដ្ឋ នៅតាមបណ្ដាស្រុកជុំវិញតំបន់អង្គរ ឱ្យចេះដាំបន្លែ ចិញ្ចឹមសត្វ រួមទាំងការបណ្ដុះបណ្ដាលជំនាញធ្វើវត្ថុអនុស្សាវរីយ៍ផង ដើម្បីឱ្យអ្នកស្រុកទាំងនោះបានស្រូបយកចំណូលពីវិស័យទេសចរណ៍។

លោក ប៊ុន ថាឫទ្ធិ៖ «កន្លងមកនេះ គ្រួសារមួយចំនួន តាមការស្រាវជ្រាវរបស់យើងក៏ដូចជាការចុះពិនិត្យផ្ទាល់ ឃើញថា មានការកើនឡើងជីវភាពរស់នៅរបស់គាត់។ តាមបណ្ដាស្រុក ហើយនិងឃុំជាគោលដៅមួយចំនួន ដែលយើងធ្វើការស្ទាបស្ទង់ចំណូលថវិកាសម្រាប់គ្រួសារគាត់ ក្នុង១ខែប្រហែល១៨០ដុល្លារដែរ។ អ៊ីចឹង យើងឃើញថា គោលនយោបាយរបស់រាជរដ្ឋាភិបាលក្នុងការផ្សារភ្ជាប់វិស័យទេសចរណ៍ទៅនឹងការកាត់បន្ថយភាពក្រីក្ររបស់ប្រជាពលរដ្ឋ យើងកំពុងតែដំណើរការអនុវត្តនៅតាមជុំវិញតំបន់អង្គរនេះ»។

ទោះយ៉ាងណា អាជ្ញាធរបានឱ្យដឹងថា កន្លងមកការអនុវត្តគម្រោងនេះ គឺនៅមិនទាន់ធ្វើឡើងគ្រប់ភូមិទាំងអស់ ដើម្បីឱ្យប្រជាពលរដ្ឋបានស្រូបយកចំណូលពីទេសចរណ៍នៅឡើយទេ។ បច្ចុប្បន្ន គម្រោងបានជ្រើសរើសយកភូមិមួយចំនួន ដែលមានសក្ដានុពល លទ្ធភាព និងភូមិសាស្ត្រ ដើម្បីអភិវឌ្ឍន៍ ដោយមានប្រជាពលរដ្ឋជាង១ម៉ឺន៨ពាន់គ្រួសារប៉ុណ្ណោះ ដែលបានទទួលចំណូលពីវិស័យទេសចរណ៍។

អាជ្ញាធរ រដ្ឋាភិបាល បានយល់ឃើញថា នៅខេត្តសៀមរាប ស្របពេលដែលភ្ញៀវទេសចរកើនឡើង គឺគេត្រូវការពង្រឹងលើផ្នែកសន្តិសុខ សណ្ដាប់ធ្នាប់សាធារណៈ រចនាសម្ព័ន្ធទីក្រុង អនាម័យ និងផ្នែកបម្រើសេវាឱ្យកាន់តែប្រសើរថែមទៀត។

លោកឧត្តមសេនីយ៍ត្រី សត ណាឌី ជាស្នងការនគរបាលខេត្តសៀមរាប បានមានប្រសាសន៍ថា សេវាដឹកជញ្ជូនភ្ញៀវទេសចរខ្លះ នៅមានបញ្ហាដែលធ្វើឱ្យអ្នកទេសចរមិនទាន់មានភាពកក់ក្តៅនៅឡើយ។ មន្ត្រីដដែលបានមានប្រសាសន៍ថា ក្រៅពីការពង្រឹងសន្តិសុខនៅក្នុងទីរួមខេត្ត និងតាមតំបន់ទេសចរណ៍ កម្លាំងនគរបាល បានចាប់ផ្ដើមរៀបចំប្រព័ន្ធសន្តិសុខនៅតាមសេវាដឹកជញ្ជូននានា ដើម្បីកាត់បន្ថយគ្រោះហានិភ័យនានាទៅលើភ្ញៀវទេសចរ។

លោកឧត្តមសេនីយ៍ត្រី សត ណាឌី៖ «អ្នកបម្រើសេវាដឹកជញ្ជូនទាំងអស់នេះ តម្រូវឱ្យគាត់មកទាក់ទងជាមួយនឹងស្ថាប័នប៉ូលិស ដើម្បីយើងរៀបចំនូវទម្រង់បែបបទមួយចំនួន សម្រាប់ធានាដល់ការងារគ្រប់គ្រងរបស់គាត់ នៅពេលដែលមានបញ្ហាក្នុងការងារដឹកជញ្ជូន។ ពេលមានបញ្ហាកើតឡើង ស្ថាប័នប៉ូលិសងាយស្រួលក្នុងការងារកំណត់មុខសញ្ញា ក៏ដូចជាងាយស្រួលនៅក្នុងការងារស្រាវជ្រាវរក»។

លោក ប៊ុន ណារិទ្ធិ អគ្គនាយកអាជ្ញាធរអប្សរា បានមានប្រសាសន៍ថា នៅស្របពេលដែលកំណើនភ្ញៀវទេសចរបរទេសកាន់តែកើនឡើងនៅក្នុងខេត្តសៀមរាប គឺអាជ្ញាធររបស់លោក កាន់តែគិតទៅដល់កិច្ចការការពារប្រាសាទបុរាណនានា និងទេសភាពដែលជាបេតិកភណ្ឌពិភពលោក។ លោកបានបញ្ជាក់ថា ដូចជាការចង់ធ្វើផ្លូវខ្លះនៅក្នុងតំបន់អង្គរ ឱ្យធំទូលាយសម្រាប់ងាយស្រួលឱ្យឡានចៀសគ្នា ដើម្បីផលចំណេញពីទេសចរណ៍ តែផ្ទុយពីកិច្ចការការពារបេតិកភណ្ឌពិភពលោកនោះ គឺមិនអាចធ្វើទៅបានឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (3)

ចុចត្រង់នេះដើម្បីបន្ថែមយោបល់របស់អ្នក

Vuth Lee

ពី Lowell, Massachusetts,U.S.A

I think the idea of Suryavarman II who were believed an Angkor Wat builder during 12th century absolutely was not aim at for tourist industry as today, but to show the world that Cambodia was a powerful country in term of its civilization(the condition that exists when people have developed effective ways of organizing a society and care about art, science, etc.) and never intended to be under control of any country. Our ancient Khmer history had proofed this-Cambodia was once a Khmer Empire in South East Asia. Lately, many previous Khmer leaders had decreased Khmer power and they also had reduced our Motherland's size significantly, but Hun Sen is the worst Khmer leader who had sold Khmer's souls to Youn-the Khmer historical enemy.

Sep 16, 2012 12:47 PM

កូន ខ្មែរ

ពី ភព

គិតតែពីចង់បានមិនគិតពីវិធីការពារ រក្សាឱ្យបានយូរអង្វែង
គ្រាន់ឱ្យខ្មែរជំនាន់ក្រោយបានស្គាល់ផងទេ។តាជូជកបែក
ពោះព្រោះអ្វី?អ្នកកាន់ពុទ្ធសានាដឹងរឿងនេះច្បាស់ណាស់។

Sep 15, 2012 08:40 PM

Sam Khemarak Phibal

ពី Siem Reap

How I believe ??? Angkor Wat was built by THE RIGHT KHMER LEADER long times ago for supporting to people in country, they can living with income from tourists. BUT ANGKOR WAT WAST SOLD TO YUON BY HUN SEN. HOW CAMBODIAN CAN BENEFIT from ANGKOR WAT?

Sep 15, 2012 10:29 AM