តំណាងអង្គការសុខភាពពិភពលោក អ្នកស្រី អាយដា យូរីកលី(Ayda Yurekli) មានប្រសាសន៍ថា តាមបទពិសោធន៍នៃការអនុវត្តរបស់ប្រទេសជាច្រើន ការយកពន្ធខ្ពស់ទៅលើផលិតផលថ្នាំជក់ នឹងជួយអោយទៅដល់សុខភាពសាធារណៈ និងជំរុញវិស័យសេដ្ឋកិច្ចជាតិ។
អង្គការសុខភាពពិភពលោកអះអាងថា ប្រសិនបើអាចធ្វើបាន រដ្ឋាភិបាលកម្ពុជា អាចដាក់អត្រានៃការយកពន្ធស្មើនឹងចំនួន ៧០ភាគរយ នៃផលិតផលថ្នាំជក់ដែលលក់បាននៅលើទីផ្សាក្នុងប្រទេសកម្ពុជា ធ្វើជាគោលដៅនៃការដំឡើងពន្ធ។ ប្រសិនបើពន្ធលើផលិតផលថ្នាំជក់អាចទៅដល់ចំណុចគោលដៅនោះ ចំនួនអ្នកជក់បារីនឹងមានការថយចុះច្រើន ចំណែករដ្ឋាភិបាលក៏អាចបានប្រាក់ចំណូលខ្ពស់ទៅតាមនោះដែរ។
របាយការណ៍ក្នុងឆ្នាំ២០១០ នៅពេលដែលពន្ធលើផលិតផលថ្នាំជក់ដំឡើងដល់ ១០ភាគរយ បានធ្វើអោយថវិកាដែលបានពីការប្រមូលពន្ធកើនឡើងពី ៤៥ពាន់លានរៀល ទៅ ២៣១,៥លានរៀល។ ប៉ុន្តែវាបានធ្វើអោយការជក់បារីមានការថយចុះតែបន្តិចបន្តួចប៉ុណ្ណោះ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ហង់ ជួនណារ៉ុន បានបង្ហាញថា ពន្ធ ១០ភាគរយទៅលើផលិតផលថ្នាំជក់ ធ្វើអោយកម្ពុជា មានអត្រាពន្ធទាបជាងគេក្នុងចំណោមប្រទេសក្នុងតំបន់ ដែលក្នុងនោះវៀតណាម មាន ៥៦% ប្រទេសថៃ ៨៥% និងឡាវពី ១៥% ទៅ ៣០%។ បើទោះជាយ៉ាងណា ការដំឡើងពន្ធលើផលិតផលថ្នាំជក់នឹងបង្កអោយមានផលប៉ះពាល់មួយចំនួន ដូចជាអំពើគេចពន្ធនឹងកើនឡើង ប៉ះពាល់ការងារកសិករខ្មែរដែលជាអ្នកដាំថ្នាំជក់។ ចំណែកការចំណាយលើការថែទាំសុខភាពគឺខ្ពស់ជាងប្រាក់ប្រមូលពន្ធ។
បើទោះជាយ៉ាងណា ក្រុមការងាររបស់ក្រសួងសេដ្ឋកិច្ច និងហិរញ្ញវត្ថុ ត្រូវការពត៌មានមួយចំនួនទាក់ទងនឹងផលប៉ះពាល់ពីការដំឡើងពន្ធ។
ប្រធានអង្គការចលនា ដើម្បីសុខភាពកម្ពុជា វេជ្ជបណ្ឌិត មុំ គង់ មានប្រសាសន៍ថា លោកសង្ឃឹមថា រដ្ឋាភិបាលកម្ពុជា នឹងពិចារណាចំពោះការអំពាវនាវរបស់អង្គការសុខភាពពិភពលោក ព្រោះកម្ពុជា ក៏ជាប្រទេសម្ចាស់ហត្ថលេខីលើអនុសញ្ញា ស្ដីពីការត្រួតពិនិត្យថ្នាំជក់។
របាយការណ៍ពីចំនួនអ្នកជក់បារីនៅកម្ពុជា បានអោយដឹងថា អត្រាអ្នកជក់បារីនៅក្នុងឆ្នាំ២០១១ បានថយចុះមកត្រឹម ៤២,៥% គឺទាបជាងឆ្នាំ ២០០៨ ដែលមានអត្រា ៤២,៥%។ យ៉ាងនេះក្ដីចំនួនអ្នកជក់បារីនៅកម្ពុជា ពុំបានថយចុះទេ ក្នុងរយៈពេលនេះ គឺនៅរក្សាចំនួនជិត ២លាននាក់ (១.៩២៤.០០០) ដដែល ក្នុងឆ្នាំ២០០៨ និងជិត ២លាននាក់ (១.៩៩៣.០០០) ក្នុងឆ្នាំ២០១១)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។