សំណង់ផ្ទះល្វែងកើនឡើងខ្ពស់
h082312as.mp3
អ្នកវិភាគអចលនទ្រព្យបានអះអាងនៅថ្ងៃទី២៣ សីហា ថា ឆ្នាំ២០១២ ជាចំណុចឆ្នាំចាប់ផ្ដើមនៃការសាងសង់ផ្ទះល្វែងដែលមាននិន្នាការកើនឡើងខ្ពស់។
ប្រធានក្រុមហ៊ុន ប៊ុនណា រៀលធី (Bonna Realty Group) លោក ស៊ឹង ប៊ុណ្ណា មានប្រសាសន៍ថា ច្បាប់សាងសង់សំណង់មានការកើនឡើងនៅឆ្នាំ២០១២ នេះ ប៉ុន្តែសកម្មភាពសាងសង់ចេញជារូបរាងសម្រេច តាមការប៉ាន់មានតែជិតពាក់កណ្ដាលប៉ុណ្ណោះ។ លោកបញ្ជាក់ទៀតថា ទីផ្សារផ្ទះល្វែងនៅក្នុងឆ្នាំ២០១២ នេះ មានតម្រូវការខ្ពស់ ឬមានការចាប់អារម្មណ៍ពីអតិថិជនច្រើនជាងឆ្នាំមុន។
លោកមានប្រសាសន៍បន្ថែមទៀតថា កត្តានេះដោយសារតែការហូរចូលនៃអ្នកវិនិយោគបរទេសជាច្រើនផងដែរ ដែលបានសុំច្បាប់អនុញ្ញាតសាងសង់គម្រោងផ្ទះសម្បែងនេះ។ ទោះជាយ៉ាងណាក៏ដោយ លោក ប៊ុណ្ណា បញ្ជាក់ថា នៅប្រទេសកម្ពុជា ក្នុងចំណោមចំនួនអ្នកដែលមានតម្រូវការទិញផ្ទះពិតប្រាកដ ក៏មានចំនួនអ្នកដែលទិញផ្ទះល្វែង ហើយបង្កកទុករង់ចាំលក់ដើម្បីយកចំណេញ (speculation) នៅពេលនេះមានប្រមាណ ១០%។
ការអះអាងនេះធ្វើឡើងនេះ គឺស្របពេលដែលរបាយការណ៍វិទ្យាស្ថានបណ្ដុះបណ្ដាលស្រាវជ្រាវដើម្បីអភិវឌ្ឍកម្ពុជាបង្ហាញ ការស្នើសុំសាងសង់គម្រោងផ្ទះល្វែងបានកើនឡើងរហូតដល់ជាង ៨០០% គិតជាទឹកប្រាក់ជាង ២៦លានដុល្លារអាមេរិក នៅដើមត្រីមាសឆ្នាំ២០១២។ ប៉ុន្តែអ្នកវិភាគអចលនទ្រព្យយល់ថា សកម្មភាពជាក់ស្ដែងនៃការសាងសង់មានប្រមាណតែ ៣០% ហើយអ្នកដែលមានលទ្ធភាពទិញផ្ទះបានមានប្រមាណតែជាង ២០% ប៉ុណ្ណោះ។
របាយការណ៍ដដែលបានបន្ដថា នៅខែមីនា ឆ្នាំ២០១២ តម្លៃស្នើសុំគម្រោងសាងសង់នៅរាជធានីភ្នំពេញ កើនឡើងប្រមាណ ៦០% ធៀបនឹងខែមុខ ឬកើនប្រមាណ ៥៥០% ធៀបនឹងឆ្នាំមុន។
ម្យ៉ាងវិញទៀត តម្លៃគម្រោងសាងសង់ផ្ទះល្វែងកើនប្រមាណជាង ៦៧% ធៀបនឹងខែមុន ឬកើនប្រមាណជាង ៨៥០% ធៀបនឹងឆ្នាំមុនមានតម្លៃដល់ ២៦លានដុល្លារ និងគម្រោងសាងសង់ផ្សេងទៀត កើនឡើងជាង ៥២០% ធៀបនឹងឆ្នាំមុន ឬកើនជាង ៦០០% ធៀបនឹងឆ្នាំមុន ដែលមានតម្លៃជាង ១២២លានដុល្លារ។
ចំពោះគម្រោងសាងសង់ភូមិគ្រឹះធ្លាក់ចុះជាង ៩៧% ធៀបនឹងខែមុន ឬធ្លាក់ចុះជាង ៣៩% ធៀបនឹងឆ្នាំមុនមកត្រឹម ១.៧លានដុល្លារអាមេរិក។ ការកើនឡើងសាងសង់ផ្ទះល្វែងនេះ ដោយសារតែការរើបឡើងនៃសេដ្ឋកិច្ចនៅប្រទេសកម្ពុជា រួមទាំងការកើនឡើងចំណូលរបស់ប្រជាជនបានកើនឡើងខ្ពស់ ជាពិសេសនៅរាជធានីភ្នំពេញ។
យ៉ាងណាក៏ដោយអ្នកវិភាគមួយចំនួនយល់ឃើញថា ក្នុងចំណោមអ្នកដែលគ្មានលទ្ធភាពទិញផ្ទះ ប៉ុន្តែស្ថាប័នផ្ដល់ឥណទាន ឬគ្រឹះស្ថានមីក្រូហិរញ្ញវត្ថុ បានផ្ដល់ជំនួយផ្នែកហិរញ្ញវត្ថុដល់អ្នកខ្វះលទ្ធភាពទិញផ្ទះ ដែលកត្តានេះធ្វើឲ្យចំនួនអ្នកដែលទិញផ្ទះមានការកើនឡើង។
អគ្គនាយកប្រតិបត្តិឥណទាននៃធនាគារអេស៊ីលីដា លោក អ៊ិន ស៊ីផាន់ មានប្រសាសន៍ថា ចំនួនសរុបអ្នកដែលខ្ចីលុយទិញផ្ទះសម្បែងរបស់ធនាគារអេស៊ីលីដា រហូតដល់ពេលនេះមានជាង ៩ម៉ឺននាក់ ដែលមានទំហំសាច់ប្រាក់ ១២០លានដុល្លារអាមេរិក ហើយទំហំប្រាក់កម្ចីដែលមានអតិថិជនច្រើនជាងគេ គឺចន្លោះពី ៣ម៉ឺន ទៅ ៧ម៉ឺននាក់។
លោកមានប្រសាសន៍បន្ថែមថា លក្ខខណ្ឌនៃការស្នើសុំខ្ចីប្រាក់ គឺត្រូវមានប្រភពចំណូលច្បាស់លាស់ មានការធានាពីក្រុមគ្រួសារត្រូវមានប្រាក់យ៉ាងហោចណាស់ ៣០% ទៅ ៤០% នៃតម្លៃផ្ទះ ឬអតិថិជនអាចខ្ចីប្រាក់ពីអតិថិជនច្រើនជាងនេះ រហូតដល់ ១០០% ប្រសិនបើមានវត្ថុបញ្ចាំផ្សេងមកដាក់ធានា ហើយអត្រាការប្រាក់ជាទូទៅ ១២% ក្នុងមួយឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
CheyVorman007
ពី AngKor Watសង្ឃឹមថាបួនដប់ឆ្នាំទៀតប្រទេសខ្មែរគ្មានអ្នកក្រអាចរស់នៅក្នុង
ទីក្រុងទៀតទេ ព្រោះបក្សពួកលោកបណ្ឌិតខំអភិវឌ្ឍន៏កាត់
បន្ថយអ្នកតោកយ៉ាកឃ្ទាតទៅរស់នៅក្បែជ្រោះអស់ហើយ
តែដល់គេសម្លឹងឃើញទឹកជ្រោះអាចរកលុយចែកគ្នាបាន
គេទៅដេញពួកគាត់ទៀត ដោយចោទថាពួកជនអនាធិបតិយ
ឫអាចចោទថាជាក្រុមអបគមផងដែរ សូមជូនពរ៏អោយក្រុម
លោកបណ្ឌិតមានសុខភាពមាំមួនឈ្នះអស់ពួកអារាស្រ្តក្រៗ
Aug 23, 2012 11:19 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
