"២០​ឆ្នាំ​នៃ​អំពើ​និទ្ទណ្ឌភាព​ក្រោម​ការ​ដឹកនាំ​របស់​លោក ហ៊ុន សែន"

អង្គការ​ឃ្លាំមើល​សិទ្ធិ​មនុស្ស​អន្តរជាតិ (Human Rights Watch) បាន​ចេញ​របាយការណ៍​មួយ​មាន ៦៨​ទំព័រ មាន​ចំណង​ជើង​ថា "ប្រាប់​ពួក​គេ​ទៅ​ថា ខ្ញុំ​ចង់​សម្លាប់​ពួក​គេ"។
ដោយ យន់ សាមៀន
2012-11-13
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ហ៊ុន សែន ០៧០៦១១ ៣០៥
០៦-កក្កដា-២០១១៖ លោក​នាយករដ្ឋមន្ត្រី ហ៊ុន សែន ថ្លែង​ក្នុង​ពិធី​បើក​ការដ្ឋាន​សាងសង់​ស្ពាន​នៅ​ក្រុង​តាខ្មៅ ខេត្ត​កណ្ដាល។
RFA

របាយការណ៍​អង្គការ​សិទ្ធិ​មនុស្ស​អន្តរជាតិ ជា​របាយការណ៍​ស៊ើប​អង្កេត​នៃ​ការ​សម្លាប់​រង្គាល​ក្រៅ​ប្រព័ន្ធ​ច្បាប់ ប្រព្រឹត្ត​ដោយ​អ្នក​ស្និទ្ធ​នឹង​លោក​នាយករដ្ឋមន្ត្រី ហ៊ុន សែន ដែល​បាន​​គ្រប់គ្រង​កម្ពុជា ដោយ​និទ្ទណ្ឌភាព​អស់​រយៈពេល​យូរ​ជាង ២០​ឆ្នាំ។ របាយការណ៍​នេះ​ផ្សាយ​មុន​ពេល​ដំណើរ​ទស្សនកិច្ច​ប្រធានាធិបតី​សហរដ្ឋ​អាមេរិក លោក បារ៉ាក់ អូបាម៉ា (Barak Obama) មក​ចូល​រួម​កិច្ចប្រជុំ​កំពូល​អាស៊ាន នៅ​ចុង​ខែ​វិច្ឆិកា នេះ។

នាយក​អង្គការ​សិទ្ធិ​មនុស្ស​អន្តរជាតិ ទទួល​បន្ទុក​នៅ​ទ្វីប​អាស៊ី លោក ប្រែត អាដាម (Brad Adams) និង​ជា​សហ​និពន្ធ​នាយក​នៃ​របាយការណ៍​រៀបរាប់​អំពី​និទ្ទណ្ឌភាព​រយៈពេល​ពីរ​ទសវត្សរ៍ ក្រោម​ការ​ដឹកនាំ​របស់​លោក​នាយក​រដ្ឋមន្ត្រី ហ៊ុន សែន មាន​ប្រសាសន៍​ថា របាយការណ៍​នេះ​ជា​ការ​ពិនិត្យ​សើរើ​ឡើង​វិញ​នូវ​ករណី​រំលោភ​សិទ្ធិ​មនុស្ស​ធ្ងន់ធ្ងរ​មួយ​ចំនួន ដែល​កើត​ឡើង​ក្នុង​រយៈពេល ២០​ឆ្នាំ និង​ដើម្បី​ស្វែង​រក​ការ​ពិត ថា​តើ​ក្នុង​រយៈពេល​កន្លង​មក​នេះ តើ​រដ្ឋាភិបាល​បាន​ចាត់​វិធានការ​អ្វី​ខ្លះ ចំពោះ​បុគ្គល​រំលោភ​សិទ្ធិ​មនុស្ស​ទាំង​នោះ​ឬ​ទេ។

លោក ប្រែត អាដាម បន្ត​ថា លទ្ធផល​នៃ​ការ​ស្រាវជ្រាវ​បង្ហាញ​ថា ជន​សង្ស័យ​ជា​អ្នក​ទទួល​ខុស​ត្រូវ​នៃ​ការ​រំលោភ​សិទ្ធិ​មនុស្ស និង​សម្លាប់​រង្គាល មិន​ត្រឹម​តែ​រដ្ឋាភិបាល​មិន​បាន​នាំ​មក​កាត់​ទោស ប៉ុន្តែ​បែរ​ជា​ដំឡើង​បុណ្យស័ក្តិ និង​តួនាទី ក្នុង​វិស័យ​យោធា​ទៅ​វិញ៖ «យើង​បោះ​ពុម្ព​របាយការណ៍​អំពី​និទ្ទណ្ឌភាព កើត​ឡើង​ក្នុង​រយៈពេល ២០​ឆ្នាំ ចាប់​តាំង​ពី​កិច្ច​ព្រមព្រៀង​សន្តិភាព​ទីក្រុង​ប៉ារីស។ ខ្ញុំ​គិត​ថា វា​មាន​សារសំខាន់​ណាស់​ដែល​យើង​ពិនិត្យ​ឡើង​វិញ​ចំពោះ​ករណី​រំលោភ​សិទ្ធិ​មនុស្ស​ធ្ងន់ធ្ងរ​ជាច្រើន​ករណី​នៅ​កម្ពុជា។ យើង​ក៏​ចង់​ដឹង​ដែរ​ថា តើ​រដ្ឋាភិបាល​បាន​ចាត់​វិធានការ​អ្វី​ខ្លះ?»

របាយការណ៍​គ្រប​ដណ្ដប់​រយៈពេល​ពីរ​ទសវត្សរ៍​នៃ​អំពើ​និទ្ទណ្ឌភាព​ក្រោម​កណ្ដាប់​ដៃ​លោក ហ៊ុន សែន គឺ​ជា​ការ​ចង​ក្រង​ឯកសារ​នៃ​ការ​សម្លាប់​សកម្មជន​នយោបាយ អ្នក​សារព័ត៌មាន អ្នក​នយោបាយ គណបក្ស​ប្រឆាំង និង​បុគ្គល​ដទៃ​ទៀត ដោយ​កម្លាំង​សន្តិសុខ​រដ្ឋាភិបាល ចាប់​តាំង​ពី​ឆ្នាំ​១៩៩១។ យ៉ាង​ហោច​ណាស់​ក៏​មាន​សកម្មជន​នយោបាយ​ប្រមាណ ៣០០​នាក់ ត្រូវ​បាន​សម្លាប់​ដោយ​ពាក់ព័ន្ធ​នឹង​នយោបាយ ក៏ប៉ុន្តែ​នៅ​មិន​ទាន់​មាន​ករណី​មួយ​ណា​ត្រូវ​បាន​ស៊ើប​អង្កេត​ឲ្យ​ត្រឹមត្រូវ ហើយ​ជន​សង្ស័យ​នៅ​មិន​ទាន់​ត្រូវ​បាន​នាំ​ខ្លួន​ប្រឈម​មុខ​នឹង​យុត្តិធម៌​នៅ​ឡើយ​ទេ។

នាយក​អង្គការ​សិទ្ធិ​មនុស្ស​អន្តរជាតិ បន្ត​ថា អ្នក​ប្រព្រឹត្ត​បទ​ល្មើស​ទាំង​នោះ​សុទ្ធ​តែ​ជា​មន្ត្រី​ជាន់​ខ្ពស់​រដ្ឋាភិបាល យោធា ប៉ូលិស និង​ចារកម្ម។ មន្ត្រី​ទាំង​នោះ​នៅ​តែ​មាន​តួនាទី និង​តំណែង​ក្នុង​ជួរ​រដ្ឋាភិបាល និង​យោធា។

លោក ប្រែត អាដាម បន្ត​ថា រដ្ឋាភិបាល​មិន​ត្រឹម​តែ​មិន​កាត់​ទោស​ជន​ទាំង​នោះ ប៉ុន្តែ​បែរ​ជា​ដំឡើង​តំណែង និង​ផ្តល់​រង្វាន់​ឲ្យ​ពួក​គេ​ទៅ​វិញ។ និទ្ទណ្ឌភាព​ទាំង​នោះ​បង្ហាញ​ឲ្យ​ពលរដ្ឋ​សាមញ្ញ​ឃើញ​ថា ឃាតករ​កំពុង​ឋិត​នៅ​ពី​លើ​ច្បាប់ ហើយ​កំពុង​តែ​ត្រូវ​បាន​ការពារ​ដោយ​មេ​ដឹកនាំ​ប្រទេស និង​មន្ត្រី​ជាន់​ខ្ពស់​យោធា៖ «គោល​បំណង​សំខាន់​របស់​យើង គឺ​ដើម្បី​រំលឹក​មនុស្ស​ទូទៅ​ថា មាន​មន្ត្រី​ជាន់​ខ្ពស់​ជាច្រើន​ក្នុង​ជួរ​កងទ័ព អាវុធហត្ថ ប៉ូលិស និង​រដ្ឋាភិបាល បាន​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ ប៉ុន្តែ​ជន​ទាំង​នោះ​មិន​ត្រូវ​បាន​នាំ​ខ្លួន​មក​កាត់​ទោស​ឡើយ។ ជន​ទាំង​នោះ​អាច​រួច​ខ្លួន​ពី​អំពើ​ឃាតកម្ម និង​ការ​រំលោភ​បំពាន​ផ្សេងៗ។ ជន​ទាំង​នោះ​មិន​ត្រឹម​តែ​មិន​ត្រូវ​បាន​នាំ​ខ្លួន​ទៅ​កាត់​ទោស ប៉ុន្តែ​បែរ​ជា​ត្រូវ​ដំឡើង​បុណ្យស័ក្តិ​ទៅ​វិញ»

ចំណង​ជើង​របស់​របាយការណ៍​អង្គការ​សិទ្ធិ​មនុស្ស "ប្រាប់​ពួក​គេ​ទៅ​ថា ខ្ញុំ​ចង់​សម្លាប់​ពួក​គេ" គឺ​ជា​សម្ដី​ដោយ​ផ្ទាល់​របស់ ហ៊ីង ប៊ុនហៀង មេ​បញ្ជាការ​រង​អង្គរក្ស​ផ្ទាល់​របស់​លោក ហ៊ុន សែន និង​ជា​អគ្គ​មេ​បញ្ជាការ​រង​នៃ​កង​យោធពល​ខេមរភូមិន្ទ ដែល​បាន​ឆ្លើយ​នឹង​សំណួរ​របស់​អ្នក​សារព័ត៌មាន ពាក់ព័ន្ធ​នឹង​ការ​ចោទ​ប្រកាន់​ថា លោក​មាន​ពាក់ព័ន្ធ​នឹង​ការ​គប់​គ្រាប់​បែក​ឆ្នាំ​១៩៩៧។ លទ្ធផល​នៃ​ការ​ស្រាវជ្រាវ​របស់​អង្គការ​សហប្រជាជាតិ និង​ការិយាល័យ​ស៊ើប​អង្កេត​សហព័ន្ធ​សហរដ្ឋ​អាមេរិក (FBI) កង​អង្គរក្ស​លោក ហ៊ុន សែន ដឹក​នាំ​ដោយ​លោក ហ៊ីង ប៊ុនហៀង ជា​អ្នក​នៅ​ពី​ក្រោយ​ការ​វាយ​ប្រហារ​ដោយ​គ្រាប់​បែក​លើ​ហ្វូង​បាតុករ​គាំទ្រ​គណបក្ស​ប្រឆាំង។

របាយការណ៍​បន្ត​ថា ឃាតករ​នៃ​ការ​សម្លាប់​រង្គាល មិន​ត្រឹម​តែ​ស្គាល់​មុខ​នោះ​ទេ ប៉ុន្តែ​ត្រូវ​បាន​ដំឡើង​តំណែង​បន្ថែម​ទៀត។

អង្គការ​សិទ្ធិ​មនុស្ស បាន​បញ្ចូល​ក្នុង​ឯកសារ​នៃ​ការ​សម្លាប់​ក្រៅ​ប្រព័ន្ធ​ច្បាប់ រួម​មាន​ករណី​សម្លាប់​សកម្មជន​គណបក្ស​ប្រឆាំង​ក្នុង​អំឡុង​ពេល​នៃ​ការ​រៀបចំ​ការ​បោះ​ឆ្នោត​ដោយ​អង្គការ​សហប្រជាជាតិ។ ឃាតកម្ម​លើ​លោក ធន ប៊ុនលី ជា​និពន្ធ​នាយក​សារព័ត៌មាន​ប្រឆាំង​ការ​សម្លាប់​មន្ត្រី​គណបក្ស​ហ៊្វុនស៊ិនប៉ិច ប្រមាណ ១០០​នាក់ រួម​ទាំង​រដ្ឋលេខាធិការ​ក្រសួង​មហាផ្ទៃ លោក ហូ សុខ ការ​ជះ​ទឹក​អាស៊ីត​លើ​តារា កញ្ញា តាត ម៉ារីណា ឃាតកម្ម​លើ​រូប​ប្រធាន​សហជីព​សេរី​កម្មករ លោក ជា វិជ្ជា លោក ឃឹម សំបូរ អ្នក​សារព័ត៌មាន​ប្រឆាំង និង​លោក ឈុត វុទ្ធី និង​មន្រ្តី​ជាន់​ខ្ពស់​គណបក្ស​ហ៊្វុនស៊ិនប៉ិច លោក ឱម រដ្ឋសាឌី។

វិទ្យុ​អាស៊ីសេរី មិន​អាច​ទាក់​ទង​លោក ហ៊ីង ប៊ុនហៀង បាន​ទេ នៅ​ថ្ងៃ​អង្គារ ទី១៣ វិច្ឆិកា។

មន្ត្រី​នាំ​ពាក្យ​ទីស្ដីការ​គណៈរដ្ឋមន្ត្រី លោក ផៃ ស៊ីផាន បាន​បដិសេធ​មិន​ទទួល​យក​របាយការណ៍​នោះ។ លោក​ចាត់​ទុក​ថា របាយការណ៍​អង្គការ​សិទ្ធិ​មនុស្ស គ្រាន់​តែ​ជា​របាយការណ៍​មួយ​ដើម្បី​បំផ្លាញ​រដ្ឋាភិបាល​កម្ពុជា៖ «យើង​ធ្វើ​ការ​ដោះស្រាយ​ជា​បន្ត​បន្ទាប់ របាយការណ៍​ជា​យុទ្ធនាការ​បំផ្លាញ»

លោក ផៃ ស៊ីផាន ក៏​បាន​បដិសេធ​របាយការណ៍​អង្គការ​សិទ្ធិ​មនុស្ស ដែល​បាន​លើក​ឡើង​ថា កង​អង្គរក្ស​លោក ហ៊ុន សែន ពាក់ព័ន្ធ​នឹង​ការ​ធ្វើ​រដ្ឋ​ប្រហារ និង​បោក​គ្រាប់​បែក៖ «វា​ជា​សេរីភាព​របស់​គេ របាយការណ៍​ជាក់​ស្ដែង យើង​មិន​ឃើញ​ដូច​នេះ»

លោក ប្រែត អាដាម បន្ថែម​ថា តារាង​នៃ​ការ​សម្លាប់​ក្រៅ​ប្រព័ន្ធ ធ្វើ​ឲ្យ​មាន​ការ​ព្រឺ​ខ្នង ដោយ​សារ​តែ​អាជ្ញាធរ​គ្មាន​ចាត់​វិធានការ​ដើម្បី​នាំ​ជន​សង្ស័យ​ទៅ​កាត់​ទោស ហើយ​រដ្ឋាភិបាល​បែរ​ជា​ការ​ពារ​ពួក​ទាំង​នោះ​វិញ។ លោក​បន្ថែម​ទៀត​ថា រដ្ឋាភិបាល​អាច​ព្យាយាម​បញ្ចប់​និទ្ទណ្ឌភាព​នៅ​កម្ពុជា ដោយ​ការ​បង្កើត​សេវាកម្ម​ប៉ូលិស​ប្រកប​ដោយ​វិជ្ជាជីវៈ និង​ឯករាជ្យ។ ចំណែក​ប្រព័ន្ធ​យុត្តិធម៌ ក៏​ត្រូវ​បង្កើត​ឲ្យ​មាន​លក្ខណៈ​ឯករាជ្យ។ ចៅក្រម​ត្រូវ​តែង​តាំង​ដោយ​ស្ថាប័ន​ឯករាជ្យ។ ស្ថាប័ន​ឯករាជ្យ​ត្រូវ​មាន​តួនាទី​ស៊ើប​អង្កេត និង​ដាក់​ពិន័យ​ចៅក្រម ឬ​ព្រះរាជ​អាជ្ញា​ណា​ដែល​ប្រព្រឹត្ត​ល្មើស​ទៅ​នឹង​ក្រម​សីលធម៌។ មន្ត្រី​ជាន់​ខ្ពស់ ប៉ូលិស និង​ចៅក្រម ត្រូវ​ហាម​ឃាត់​ចូល​រួម ឬ​កាន់​តួនាទី​សំខាន់​ក្នុង​គណបក្ស​នយោបាយ។

បច្ចុប្បន្ន អគ្គស្នងការ​នគរបាល​ជាតិ លោក​នាយ​ឧត្តមសេនីយ៍ នេត្រ សាវឿន ត្រូវ​ជា​សាច់​ញាតិ​របស់​លោក​នាយក​រដ្ឋមន្ត្រី ហ៊ុន សែន ចំណែក​ឯ​ប្រធាន​តុលាការ​កំពូល ឌិត មុន្ទី ជា​មន្ត្រី​ជាន់​ខ្ពស់​គណបក្ស​ប្រជាជន​កម្ពុជា។

លោក ប្រែត អាដាម បន្ត​ថា លោក ហ៊ុន សែន បាន​កាន់​កាប់​តំណែង​អស់​រយៈពេល ២៧​ឆ្នាំ ហើយ​ថ្មីៗ​នេះ លោក ហ៊ុន សែន អះអាង​ថា លោក​នឹង​បន្ត​កាន់​តំណែង​រយៈពេល ៣០​ឆ្នាំ​ទៅ​មុខ​ទៀត ដូច្នេះ ជន​រង​គ្រោះ​ពិបាក​ទ្រាំ​រង់ចាំ​យុត្តិធម៌​ណាស់។ លោក ប្រែត អាដាម បាន​ស្នើ​សុំ​ឲ្យ​ប្រធានាធិបតី​សហរដ្ឋ​អាមេរិក លោក បារ៉ាក់ អូបាម៉ា ក្នុង​ដំណើរ​ទស្សនកិច្ច​ជា​ប្រវត្តិសាស្ត្រ​នៅ​កម្ពុជា នៅ​ពាក់​កណ្ដាល​ខែ​វិច្ឆិកា ត្រូវ​ទាម​ទារ​លោក ហ៊ុន សែន ជា​សាធារណៈ ឲ្យ​រដ្ឋាភិបាល​កម្ពុជា ធ្វើ​កំណែ​ទម្រង់​ពិត​ប្រាកដ ដើម្បី​ឲ្យ​ពលរដ្ឋ​កម្ពុជា អាច​ទទួល​បាន​សិទ្ធិ និង​សេរីភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (25)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

លោក ហ៊ុន សែន កុំគិតថាប្រទេសកម្ពុជា ជារបស់លោកតែម្នាក

Nov 15, 2012 07:01 AM

ក្មែរ

ខ្មែរទាំងអស់សូមកុំអស់សង្ឃឹម យើងត្រូវតស៊ូដល់ទីបញ្ចប់ដើម្បីរំដោះជាតិចេញពីភាពអយុត្តិធម៌នេះ។ ជាតិខ្មែរមិនមែនជារបស់ជនរឺក្រុមណាមួយទេគឺរបស់់យើងទាំងអស់គ្នា។

Nov 15, 2012 12:56 AM

Adolf Hitler

Great report, but who care? Corrupted government leader and his slave will not take time listening or reading this great report. The corrupted government of Cambodia continues to demolish all rights and expand its power within the country. Now H.S starts following Adolf Hitler rules by build-up a team the so-called "Youth Dejo". This team will not listen to any others command, but only H.S. This team can reports to H.S directly if they found betrayal... This team is the special person which train to lead the country by follow H.S command. Please read Adolf Hitler for more!

Nov 14, 2012 11:34 AM

អ្នក​អាន​អនាមិក

i hate us

Nov 14, 2012 09:52 AM

អ្នក​អាន​អនាមិក

Sincerely Thanks you Mr. Brad Adam for payming much attention to Cambodia. I am regret that the rural area people don't have a wide media. They did not konw what happened because Almost all media are for Hun Sen, say good about Hun Sen that make them confused that Hun Sen is a good leader. Pai Sipan, I wonder if you are not Cambodian you always deny all the true stories even from Human Rights Watch, do you want to live like Kopuchea Krom (Cambodia underneath). Hun Sen, can you do something for your nation? Stop killing Cambodian people more. We just want to live in peace and complete freedom. I hope president Obama can help us from this bad situation.

Nov 14, 2012 05:16 AM

មើល​មតិ​ទាំង​អស់.