លោក ហ៊ុន សែន៖ ដីសម្បទានសេដ្ឋកិច្ចត្រូវបង់ពន្ធ៥ដុល្លារក្នុង១ហិកតារ
h092812tn-a1.mp3
នៅក្នុងកិច្ចប្រជុំពេញអង្គ នៅគណៈរដ្ឋមន្ត្រី នៅថ្ងៃទី២៨ ខែកញ្ញា លោក ហ៊ុន សែន បានសម្រេចឲ្យក្រុមហ៊ុនវិនិយោគ ដែលទទួលបានដីសម្បទានសេដ្ឋកិច្ច ត្រូវបង់ថ្លៃឈ្នួលដីចំនួន ៥ដុល្លារសហរដ្ឋអាមេរិកក្នុងមួយហិកតារ ចាប់ពីឆ្នាំទី៦ នៃការវិនិយោគ ដោយមិនរើសអើងបែងចែកប្រភេទដីដែលត្រូវធ្វើផលិតកម្មក្នុងវិស័យកសិកម្ម ឬដីប្រភេទផ្សេងឡើយ។
លោកនាយករដ្ឋមន្ត្រី ហ៊ុន សែន បញ្ជាក់ថា ថ្លៃឈ្នួលដីចំនួន ៥ដុល្លារសហរដ្ឋអាមេរិក ក្នុង១ហិកតារនេះ នឹងត្រូវកើនឡើង ១% ជារៀងរាល់ឆ្នាំ។ តែនៅក្នុងកិច្ចប្រជុំគណៈរដ្ឋមន្ត្រីនោះ លោក ហ៊ុន សែន មិនបានបញ្ជាក់ពីកាលបរិច្ឆេទ នៃការអនុវត្តប្រមូលពន្ធនៅពេលណាឲ្យច្បាស់នោះទេ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក បេង ហុងសុជាតិខេមរ៉ូ មានប្រសាសន៍ថា ការយកពន្ធលើដីសម្បទានសេដ្ឋកិច្ច ជារឿងធម្មតាសម្រាប់ប្រទេសជាទូទៅ។ លោកបន្តថា ដំណាក់កាលដំបូង ដីវិនិយោគឲ្យក្រុមហ៊ុន នៅមិនទាន់ផ្តល់ផលចំណេញអ្វីដល់អ្នកវិនិយោគទេ។
ប៉ុន្តែ នៅពេលដំណាក់កាលណាមួយ ដីវិនិយោគទាំងនោះនឹងផ្តល់ផលចំណេញឲ្យអ្នកវិនិយោគវិញ ហើយអ្នកវិនិយោគត្រូវបែងចែកផលចំណេញខ្លះ មកឲ្យរដ្ឋតាមរយៈការបង់ពន្ធដារលើដីវិនិយោគនោះឯង៖ «ថវិកាជាតិនឹងកើនឡើង ពីព្រោះថារយៈពេលមួយគេឲ្យថា tax break។ តែនៅពេលដែលចាប់ពេលវេលាហ្នឹងទៅ សម្បទាននឹងមានកាតព្វកិច្ចបង់ពន្ធភាគរយ ហើយពន្ធនឹងកើនឡើង។ ហេតុអីក៏កើនឡើង ព្រោះផលិតផលរបស់ដីដើម្បីរកចំណេញមកជូនអ្នកវិនិយោគ ក៏មានកើនឡើងទៅតាមពេលវេលាដែរ ក្រោយពេលដែលដីនោះធ្វើផលិតកម្មពេញកម្លាំង»។
តាមស្ថិតិក្រុមហ៊ុនវិនិយោគដីសម្បទាន ដែលបានចុះកិច្ចសន្យាជាមួយក្រសួងកសិកម្ម រុក្ខាប្រមាញ់ និងនេសាទ គិតត្រឹមថ្ងៃទី៨ ខែមិថុនា ឆ្នាំ២០១២ បង្ហាញថា មានក្រុមហ៊ុនចំនួន១១៧ វិនិយោគលើផ្ទៃដីចំនួន ១.១៨១.៥២២ហិកតារ។
លោក ហ៊ុន សែន ក៏បានរំលឹក និងបញ្ជាក់ជាថ្មីទៀត នៅក្នុងកិច្ចប្រជុំគណៈរដ្ឋមន្ត្រីថា ការផ្អាកជាបណ្ដោះអាសន្ននូវការផ្តល់ដីសម្បទានដីសេដ្ឋកិច្ច ត្រូវបន្តក្នុងរយៈពេលវែង ហើយអាចនឹងឈានទៅដល់ពេលដែលគាត់ចូលនិវត្តន៍ពីឆាកនយោបាយ។ លោកថា ក្រុមហ៊ុនដែលទទួលសិទ្ធិគ្រប់គ្រងសម្បទានសេដ្ឋកិច្ច អាចនឹងរកដៃគូក្រុមហ៊ុនវិនិយោគបាន តែមិនអនុញ្ញាតឲ្យមានការផ្ទេរសិទ្ធិគ្រប់គ្រងទេ។ ក្នុងលក្ខខណ្ឌបើក្រុមហ៊ុនណារំលោភនោះ នឹងត្រូវដកហូតសិទ្ធិគ្រប់គ្រង ហើយដីសម្បទានសេដ្ឋកិច្ចដែលបានពីការដកហូតនោះ ទុកធ្វើជាដីសម្បទានសង្គមកិច្ចជូនប្រជាពលរដ្ឋវិញ។
អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា លោក សុរិយា ស៊ូប៊ែឌី ក្នុងឱកាសថ្លែងការណ៍នៅមុខក្រុមប្រឹក្សាអង្គការសហប្រជាជាតិទទួលបន្ទុកសិទ្ធិមនុស្ស កាលពីថ្ងៃពុធ ទី២៦ កញ្ញា បានទទូចឲ្យរដ្ឋាភិបាលធ្វើកំណែទម្រង់ ដើម្បីបង្កើតឱ្យមានតម្លាភាព និងការអនុវត្តច្បាប់ ចំពោះការផ្តល់ និងរៀបចំដីសម្បទានសេដ្ឋកិច្ច និងសម្បទានផ្សេងៗទៀត។
លោក សុរិយា ស៊ូប៊ែឌី បន្តថា ការផ្តល់ដីសម្បទាននៅប្រទេសកម្ពុជា ធ្វើឡើងដោយគ្មានតម្លាភាព និងមិនផ្អែកតាមច្បាប់។ លោកថា ច្បាប់នៅលើក្រដាសផ្សេង ប៉ុន្តែការអនុវត្តផ្ទុយទៅនឹងច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
ខ្ញុំជាប្រជាពលរដ្ឋក្រីក្រ ខ្ញុំសុំដីសប្បទានសេដ្ឋកិច្ច 10ហិចតា ដើម្បីដាំដំណាំផងបានទេ? ១ហិចតាប៉ុន្មាន? បង់ពន្ធ5ដុល្លារ ខ្ញុំក៏មានលទ្ធភាពបង់ពន្ធជូនរដ្ឋបានដែ...
Sep 30, 2012 09:31 AM
ហែន ស៊ុន
ពី ក្រសាំងទួលសុំសួរថាប្រាក់បានពីពន្ធដានេះនឹងចូលទៅក្នុងកុងហ៊ុន
សែនប៉ុន្មានភាគរយ?បរិវាប៉ុន្មានភាគរយ?តើមានសល់
សម្រាប់ជាតិទេ?ច្បាស់ជាអត់ហើយបានជាមិនឆ្លើយ។
Sep 29, 2012 09:54 PM
សីហា
ពី ភ្នំពេញខ្ញុំឆ្ងល់ណាស់ អំពីរបាយការណ៏របស់អ្នករាយការណ៏ពិសេសរបស់អង្គការសហប្រជាជាតិ ។ កន្លងមករកឃើញថា ការផ្តល់ដីសម្បទានមិនតម្លាភាព និងមិនសុច្ចរិត។ តើធ្វើយ៉ាងម្តេចដើម្បីដាក់ទោសដល់អ្នកប្រព្រឹត្ត និងអ្នកដឹកនាំ? ខ្ញុំជារាស្រ្តសាមញ្ញម្នាក់មិនដឹងជាធ្វើយ៉ាងម្តេចទេ! (គ្មានអាវុធ លុយ និង អំណាច) តើរបាយការណ៏នោះមានដែលបានបង្ខំអោយរដ្ឋាភិបាលធ្វើតាមទេ។ បើទេ ខ្ញុំយល់ថា អ្នករាយការណ៏នោះនឹងមិនស្រុកស្រួលទេ ឬក៏ឈប់មកទៅដើម្បីកុំអោយអស់លុយបេសកម្ម។
Sep 29, 2012 10:22 AM
Lee Theang Chek
ពី Bangkokមតិទី២
៣)រដ្ឋបានតាមដានពួកក្រុមហ៊ុនអស់នោះទេ។
៤)សម្បទានធនធានរ៉ែដូច្នោះដែរ ពួកក្រុមហ៊ុនបរទេសមិនថាចិន យួន ត្រូវរុករកស្រាវជ្រាវធនធានរ៉ែក្រោមដី នៅពេលរុករកឃើញពួកនេះមិនរាយការណ៍ជូនរដ្ឋាភិបាលទេ តែបែរជាធ្វើអាជីវកម្មខុសច្បាប់ទៅវិញ ដោយសារពួកសារពុករលួយនេះឯង។ សូមទៅមើលអាជីវកម្មរ៉ែមាស នៅព្រុំដែនមណ្ឌលគិរី និងក្រចេះ និងខេត្តសៀមរាបផង។ កាលពីដើមឆ្នាំនេះមានដីបាក់ស្លាប់កម្មករជិត១០នាក់ដែរ។
Sep 29, 2012 10:09 AM
Lee Theang Chek
ពី Bangkokមតិទី១ ដីសម្បទានសេដ្ឋកិច្ចមានបញ្ហាដូចខាងក្រោមៈ
១)មុនធ្វើដីសម្បទានសេដ្ឋកិច្ចមិនសិក្សាលទ្ធភាពផលប៉ះពាល់របស់ប្រជាពលរដ្ឋននិងបរិស្ថាន
២)នៅពេលក្រុមហ៊ុនបានទទួលដីសម្បទានសេដ្ឋកិច្ចរួច ព័ទ្ធរបងកាប់ឈើប្រណិតឲ្យអស់សិន នៅពេលកាប់ឈើអស់ ទុកដីចោលរួចរាយការណ៍ឲ្យរដ្ឋ រួចរដ្ឋត្រូវដកយកវិញដោយសារ ក្រុមហ៊ុនមិនបានគោរពល័ក្ខខណ្ឌ។ នេះជាកលល្បិចកាប់បំផ្លាញព្រៃឈើ។ យើងត្រូវកាត់ទោសពួកវា ជាឧក្រិដ្ឋជនបំផ្លាញព្រៃឈើ។
Sep 29, 2012 10:08 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
