រដ្ឋាភិបាលសន្យាថានឹងដោះស្រាយផលប៉ះពាល់ពីការផ្ដល់ដីសម្បទាន

ប្រមុខនៃរាជរដ្ឋាភិបាលមានប្រសាសន៍ថា ផលប៉ះពាល់ដែលកើតមានក្នុងបញ្ហាផ្ដល់ដីសម្បទានសេដ្ឋកិច្ចនាពេលកន្លងទៅ រាជរដ្ឋាភិបាលសម្រេចថា ត្រូវតែដោះស្រាយដោយកាត់ចេញដើម្បីប្រគល់ជូនប្រជាពលរដ្ឋ។

ដោយ មណ្ឌល កែវ
2012-10-02

pb.mp3

លោកនាយករដ្ឋមន្ត្រី ហ៊ុន សែន (ស្ដាំ) ជួបសំណេះសំណាលជាមួយប្រជាពលរដ្ឋ និងយុវជនស្ម័គ្រចិត្តចុះវាស់វែងដីធ្លី នៅខេត្តពោធិ៍សាត់ កាលពីថ្ងៃទី១ ខែតុលា ឆ្នាំ២០១២។

RFA/Momdulkeo

មានប្រសាសន៍ក្នុងពិធីចែកប័ណ្ណកម្មសិទ្ធិជូនប្រជាពលរដ្ឋនៅឃុំព្រងិល និងឃុំលាច ស្រុកភ្នំក្រវាញ ខេត្តពោធិ៍សាត់ នៅព្រឹកថ្ងៃទី១ ខែតុលា លោកនាយករដ្ឋមន្ត្រី ហ៊ុន សែន បានទទួលស្គាល់ថា កំហុសឆ្គងនាពេលកន្លងទៅក្នុងបញ្ហាផ្ដល់ដីសម្បទានសេដ្ឋកិច្ចនោះ គឺការគូសផែនទីដោយពុំបានសិក្សាជាមុនពីផលប៉ះពាល់ចំពោះប្រជាពលរដ្ឋ។ ហេតុនេះហើយទើបរាជរដ្ឋាភិបាលអនុវត្តគោលនយោបាយចាស់សកម្មភាពថ្មី ដោយពឹងផ្អែកលើកម្លាំងនៃក្រុមយុវជនស្ម័គ្រចិត្តចុះវាស់វែង ដើម្បីកាត់ចេញនូវផលប៉ះពាល់ទាំងនោះ។

លោកថា តំបន់ណាដែលរងផលប៉ះពាល់ត្រូវកាត់ចេញជូនប្រជាពលរដ្ឋសិនមុននឹងឲ្យក្រុមហ៊ុនដំណើរការលើដីសម្បទាននោះ៖ «យើងនាំគ្នាគូសផែនទីនៅឯទីក្រុងភ្នំពេញ តែយើងពុំបានដឹងថា តើប្រជាពលរដ្ឋរស់នៅក្នុងតំបន់នេះនោះទេ អ៊ីចឹងហើយបានជាឲ្យបទបញ្ជាកាត់ចេញតែម្ដង ដើម្បីប្រជាពលរដ្ឋ។ បើយោងតាមទីនេះគឺដែនជម្រកសត្វព្រៃភ្នំសំកុស យើងត្រូវកាត់ចេញរហូតទៅដល់ ១៤.៩៨១ហិកតារ ព្រោះយើងនាំគ្នាគូរក្នុងផែនទីនៅឯទីក្រុងភ្នំពេញ។ នេះហើយជាចំណុចខ្វះខាតដែលយើងត្រូវតែទទួលស្គាល់។ ដីសម្បទានសេដ្ឋកិច្ចក៏ដូច្នោះដែរ យើងបានគូក្នុងផែនទីដោយផ្អែកថា អាហ្នឹងជាដីគម្របព្រៃឈើឆ្នាំ២០០២ រួចហើយយើងក៏ប្រគល់ឲ្យក្រុមហ៊ុនសម្បទានសេដ្ឋកិច្ច...»។

របាយការណ៍របស់អាជ្ញាធរខេត្តបានបង្ហាញថា ខេត្តពោធិ៍សាត់ មានប្រជាពលរដ្ឋចំនួន ២៤.០០០គ្រួសារកំពុងរងផលប៉ះពាល់លើផ្ទៃដី ៧៨.០០០ហិកតារ ដែលតម្រូវឲ្យរាជរដ្ឋាភិបាល ជាពិសេសគឺអាជ្ញាធរខេត្តត្រូវដោះស្រាយ។

អភិបាលខេត្តពោធិ៍សាត់ គឺលោក ខូយ សុខា បានឲ្យដឹងថា ក្នុងភូមិសាយ ឃុំព្រងិល និងភូមិប៉ែន ឃុំលាច ក្រុមយុវជនស្ម័គ្រចិត្តបានចុះវាស់វែង និងកាត់ចេញពីដីសម្បទានសេដ្ឋកិច្ចរបស់ក្រុមហ៊ុនភាពីម៉ិច និងធ្វើប័ណ្ណកម្មសិទ្ធិជូនប្រជាពលរដ្ឋ ៦៨៦គ្រួសាររួចរាល់ជាស្ថាពរ។ ដីរងផលប៉ះពាល់មានទំហំ ១.៩៩៧,៧៨ហិកតារ និងមាន ១.១០២ក្បាលដី។

លោក ខូយ សុខា៖ «លទ្ធផល និងទីតាំងដីដែលចេញវិញ្ញាបនបត្រថ្ងៃនេះលើដីតែមួយប្រភេទ គឺដីសម្បទានសេដ្ឋកិច្ចរបស់ក្រុមហ៊ុនភាពីម៉ិច ស្ថិតក្នុងភូមិសាយ ឃុំព្រងិល និងភូមិប៉ែន ឃុំលាច ដែលបានបញ្ចប់ការងារវាល និងការងារការិយាល័យកាលពីខែសីហា ឆ្នាំ២០១២...»។

យ៉ាងនេះក្ដី ជារឿយៗគេតែងសង្កេតឃើញថា មានប្រជាពលរដ្ឋជាច្រើនបានតវ៉ាដោយពួកគេចោទប្រកាន់ថា អាជ្ញាធរខេត្តបានមើលរំលង ឬលំអៀងទៅលើភាគីក្រុមហ៊ុន និងបង្វែរមិនឲ្យក្រុមយុវជនស្ម័គ្រចិត្តទៅវាស់វែងដីឲ្យពួកគេ។

របាយការណ៍របស់ក្រសួងរៀបចំដែនដីនគរូបនីយកម្ម និងសំណង់បញ្ជាក់ថា ដីសម្បទានសេដ្ឋកិច្ចរបស់ក្រុមហ៊ុនចំនួន ៣ ក្នុងខេត្តពោធិ៍សាត់ ដែលមានទំហំ ៧៨.០០០ហិកតារ បានរងផលប៉ះពាល់មកលើប្រជាពលរដ្ឋចំនួន ២៤.០០០គ្រួសារក្នុងខេត្តនេះ ដែលតម្រូវឲ្យក្រុមយុវជនស្ម័គ្រចិត្តត្រូវជួយវាស់វែងកាត់ចេញប្រគល់មកឲ្យប្រជាពលរដ្ឋ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

សុខ

ពី ស្វាយរៀង

រដ្ធាភិបាលនឹងដោះស្រាយពេលណាសេះដុះស្នែង។

Oct 13, 2012 06:27 PM

អ្នកអានអនាមិក

ខ្ញុំគាំទ្រមតិទាំងអស់របស់អស់លោក បងៗ សូមជំរាបទៅប្រជា ពលរដ្ឋទាំងអស់ថា ឈប់ចាញ់បោក ការសន្យាបោកបា្រស់ទាំងអស់របស់ លោកហ៊ុនសែនទៀត។ ការសន្យាទាំងអស់រហូតមកដល់ ឥឡូវនេះ យើងជួបតែទឹកភ្នែកទេ។ គេចង់បានតែសន្លឹក ឆ្នោតទេ។ សូមបោះឆ្នោតដើម្បីខ្លួនយើង និង ប្រទេសយើង ការពាទឹកដីយើង និង លទ្ធិប្រជាធិបតេយ្យ។

Oct 03, 2012 07:45 AM

អ្នកអានអនាមិក

គួតឲ្យចង់សើច! ដឹកនាំប្រទេសយូរឆ្នាំហើយ មិនដឹងថាប្រជាជនរស់នៅតំបន់ណា?! នេះបានហៅថា រវល់តែផ្កាប់មុខនឹងអំណាច លែងដឹងខ្យល់អ្វីអស់ហើយ!

Oct 03, 2012 05:15 AM

អ្នកអានអនាមិក

it's just another empty promise by hun sen to get people to vote for him. beung kak people are still homeless right now. Khmer people please wake up! Do vote for the right candidate! have your lives got any better after 30 years of hun sen's rule?

Oct 02, 2012 09:10 PM