ទីភ្នាក់ងារព័ត៌មានបារាំង អា.អេហ្វ.ប៉េ ផ្សាយកាលពីថ្ងៃអាទិត្យបានឲ្យដឹងថា ទំនប់វារីអគ្គិសនីចំនួន១០ ក្នុងនោះចំនួន៦ ដែលជាជំនួយឧបត្ថម្ភរបស់ចិន នឹងចាប់ផ្តើមដំណើរការសាងសង់នៅឆ្នាំ២០១០ ហើយនៅពេលបញ្ចប់នៅឆ្នាំ២០១៩ កម្ពុជានឹងអាចផលិតថាមពលអគ្គិសនី បាន២០៤៥ មេហ្គាវ៉ាត់ សម្រាប់ចែកចាយដល់បណ្តាខេត្តនានានៅកម្ពុជា ។
កាលពីដើមខែមករា ឆ្នាំ២០០៨ អង្គការបណ្តាញទន្លេអន្តរជាតិ ដែលមានមូលដ្ឋាននៅអាមេរិក បានព្រមានថា ការសាងសង់ទំនប់របស់ចិន នឹងនាំឲ្យប៉ះពាល់ដល់ប្រព័ន្ធអេកូសេដ្ឋកិច្ចនិងបំផ្លាញដល់ប្រភពធនធានធម្មជាតិ ដូចជាការសាងសង់ទំនប់កំចាយ នៅឧទ្យានជាតិភ្នំបូកគោ ខេត្តកំពតរបស់ក្រុមហ៊ុន Sinohydro Corporation ដែលនឹងអាចបណ្តាលឲ្យទឹកលិចផ្ទៃដីទំហំ ២០០០ហិកតានៃតំបន់អភិរក្សព្រៃ នៅទីនោះ ។
បន្ថែមពីនេះ ក្រុមការពារបរិស្ថាន ក៏បានសម្ដែងក្តីព្រួយបារម្ភថា រដ្ឋាភិបាលកម្ពុជាដែលបានយល់ព្រមលើគម្រោងសាងសង់ទំនប់វារីអគ្គិសនី នៅស្ទឹងតាតៃ របស់ក្រុមហ៊ុន China National Heavy Machinery Corporation និងនៅឫស្សីជ្រុំក្រោម របស់ក្រុមហ៊ុន Michelle Corporation ដែលមានតម្លៃទឹកប្រាក់សរុប ជាង ១.០០០លានដុល្លារអាមេរិក នៅលើផ្ទៃដីទំហំ ១.៦០០ ហិកតា ស្ថិតក្នុងតំបន់អភិរក្សព្រៃជួរភ្នំក្រវាញនោះ រដ្ឋាភិបាលកម្ពុជា មិនបានធ្វើការវិភាគនិងត្រួតពិនិត្យឲ្យបានត្រឹមត្រូវអំពីផលវិបាក ដែលនឹងអាចប៉ះពាល់ដល់ ភោគផលធម្មជាតិនិងសត្វព្រៃ នៅតំបន់នោះឡើយ ។
មន្ត្រីស្ថានទូតចិននៅកម្ពុជា បានប្រតិកម្មថា គោលដៅរបស់រដ្ឋាភិបាលចិនគឺជួយកម្ពុជា ពុំមែនចង់បំផ្លាញបរិស្ថាននៅកម្ពុជា ដូចការចោទប្រកាន់នោះទេ ហើយថា គម្រោងសាងសង់ទំនប់វារីអគ្គិសនីទាំងនោះ បានទទួលការអនុម័តយល់ព្រមពីសភាជាតិនិងរដ្ឋាភិបាលខ្មែរ កាលពីថ្មីៗនេះ ៕