ក្រុមអ្នកស៊ីឈ្នួលបើកទ្បានដឹកទំនិញនៅក្នុងស្រុកពាមរ ខេត្តព្រៃវែង បានអះអាងថា សមត្ថកិច្ចនគរបាលមូលដ្ឋានតែងតែស្ទាក់ទ្បានរបស់ពួកគាត់ជារៀងរាល់ថៃ្ងនៅតាមស្ពាន ដើម្បីទារប្រាក់រវាងពី១៥.០០០រៀលទៅ២០.០០០រៀល ដោយមិនទាន់គិតការទារប្រាក់៥.០០០រៀលនៅតាមកន្លែងដទៃទៀតនៅទ្បើយទេ។
ប្រជាពលរដ្ឋម្នាក់ជាអ្នកស៊ីឈ្នួលបើកទ្បានដឹកទំនិញ ដូចជាស្រូវ នៅក្នុងស្រុកពាមរ ខេត្តព្រៃវែង បានថែ្លងថា លោកស៊ីឈ្នួលបើកទ្បានដឹកស្រូវឲ្យគេក្នុងតម្លៃប្រមាណ៦ម៉ឺនរៀលក្នុងមួយថៃ្ង នៅសល់ត្រឹមតែ២ឬ៣ម៉ឺនរៀលតែប៉ុណ្ណោះ ហើយនៅពេលខ្លះទៀត គឺអស់គ្មានសល់តែម្តង ដោយសារតែបង់ប្រាក់ឲ្យទៅក្រុមនគរបាលនៅតាមផ្លូវច្រើនកន្លែងជារៀងរាល់ថៃ្ង។
ពលរដ្ឋអ្នកស៊ីឈ្នួលបើកឡានដឹកទំនិញនៅស្រុកពាមរ បានឲ្យដឹងដូច្នេះ ៖ «ខ្ញុំសូមឲ្យអភិបាលខេត្តជួយកុំឲ្យយកលុយនៅស្ពាន ព្រោះយកលុយរាល់ថ្ងៃ ជួនកាលមួយថ្ងៃ២០.០០០ម៉ឺន មួយថ្ងៃ១៥.០០០ ហើយបង់គ្រប់តែកន្លែង។ ខ្ញុំដឹកទំនិញចំណេញបន្តិចបន្តួចគ្រាន់តែបង់ឲ្យប៉ូលិសវាអស់ទៅហើយ គាត់យកច្រើនកន្លែងណាស់»។
ប្រជាពលរដ្ឋឈ្មោះ អន់ សំអឿន នៅក្នុងស្រុកពាមរនោះ បានថែ្លងថា ៖ «៤-៥នាក់នៅគល់ស្ពានដែក ស្ថិតនៅភូមិពាមរ ឃុំពាមរ ស្រុកពាមរ ខេត្តព្រៃវែងហ្នឹង ចាំកាក់ទារលុយឡាន ក្នុងឡានមួយដឹកទំនិញពីកំពង់ចាម ដឹកស្រូវអីមក គឺមួយឡាន១៥.០០០ទៅ២០.០០០រៀល។ រកបានបួនប្រាំម៉ឺនមួយថ្ងៃ ហើយគាត់ទារលុយអនាធិបតេយ្យ។ អ្នកខ្លះមិនមែនឡានខ្លួនគាត់ទេ គាត់ស៊ីឈ្នួលដឹកឲ្យគេ មួយថ្ងៃគេឲ្យពីរបីម៉ឺន ឲ្យលុយហូបបាយត្រឹមមួយម៉ឺនអី បង់អស់ហើយ»។
ប្រភពពីប្រជាពលរដ្ឋរងគ្រោះបានឲ្យដឹងថា ក្រុមអ្នកបើកបរទ្បានដឹកទំនិញចំនួនប្រមាណ៤០គ្រឿងនៅក្នុងស្រុកពាមរ័នោះ តែងតែរងគ្រោះដូចៗគ្នា។ កន្លែងដែលមានការជំរិតទារប្រាក់ច្រើនជាងគេ គឺនៅត្រង់ចំណុចស្ពានពាមរតែម្តង។
អភិបាលស្រុកពាមរ ខេត្តព្រៃវែង លោក សៅ ប្រសិទ្ធ បានមានប្រសាសន៍បំភ្លឺថា លោកបានស្រាវជ្រាវនិងបានដោះស្រាយរឿងនេះរូចហើយ។
លោក សៅ ប្រសិទ្ធ មានប្រសាសន៍ដូច្នេះ ៖ «អត់មានទេ ខ្ញុំស្រាវជ្រាវទៅមានសុំគេ៥.០០០(រៀល)មានមែន សារភាពត្រង់។ ឡានធ្ងន់យើងមិនឲ្យឆ្លងកាត់ទេខ្លាចបាក់ស្ពានទៅរឿងខ្ញុំតែម្ដង ខ្ញុំដឹងតែធ្ងន់ជាងគេហើយ ប៉ុន្តែដល់មានដល់មួយម៉ឺនពីរម៉ឺន អត់មានទេ។ ខ្ញុំកំពុងដាក់កម្លាំងខ្ញុំស្រាវជ្រាវទៀត»។
ប្រជាពលរដ្ឋខែ្មរនៅតាមបណ្តារខេត្តនានា ជារឿយៗតែងតែតវ៉ានិងទម្លាយរឿងអាស្រូវជំរិតទារប្រាក់នោះ នៅពេលដែលពួកគាត់ដឹកទំនិញកសិផលមកកាន់ទីផ្សារ។
លោកនាយករដ្ឋមន្រ្តី ហ៊ុន សែន នៃប្រទេសកម្ពុជា កន្លងមកបានប្រកាសបញ្ជាឲ្យអាជ្ញាធរនៅខេត្តនានា ពិនិត្យនិងលុបបំបាត់ក្រុងត្រូលខុសច្បាប់ទាំងនោះ៕